თამამად შეიძლება ითქვას, რომ ფუტსალის უმთავრესი ლიგის მე-16 ტური ჩემპიონისთვის მარცხიანი, სტუდენტებისთვის კი შედეგიანი აღმოჩნდა. ნიუ ვიჟენ ჯორჯიანსმა ზედიზედ 39 მატჩიანი მოგებათა სერია მარცხით შეწყვიტა. ამ ტურში სამმა სტუდენტურმა გუნდმა იმარჯვა და ცხრილშიც პოზიციები გაიუმჯობესა... ეს მოკლედ, დეტალურად კი თანმიმდევრობას მივყვეთ.

ლიგის დებიუტანტ წალენჯიხას კავკასიელებმა უკვე მესამედ მოუგეს. თუმცა, სიმართლე რომ ითქვას, კსუ-ს მეტოქე გაუძალიანდა კიდეც... მეგრელთა გუნდის მეკარე საბა ჯომიდავას დამსახურებით, მატჩის საწყისი 14 წუთი უგოლოდ გაილია. თამაში სტუდენტების კარნახით წარიმართა, თბილისელთა მხოლოდ მე-11 დარტყმას მოჰყვა შედეგი. მე-15 წუთზე გამოცდილმა ნიკა მანგოშვილმა ორი მეტოქის გარემოცვიდან, ზუსტი დარტყმით ანგარიში გახსნა, 1:0. მეორე ტაიმშიც კსუ-ს უპირატესობა აშკარა იყო. 28-ე წუთზე გიორგი ხაბალაევის გარჯა, თამაზ ვახანიამ დააფასა და სხვაობა გააორმაგა, 2:0. 36-ე წუთზე ბექა ბექაურის გამჭოლი პასით, საბა ტყეშელაშვილმა მატჩის საბოლოო ანგარიში დააფიქსირა, 3:0. კსუ-მ მესამე ადგილზე გამაგრდა, წალენჯიხა კი ისევ მე-7 საფეხურზეა.

ტურის ცენტრალურ მატჩად ნიუ ვიჟენ ჯორჯიანსისა და პსპ-ს დაპირისპირება იყო შერაცხული და სრულიად ლოგიკურადაც. თამაში, რომელსაც ინტრიგა არ აკლდა, საინტერესოდ დაიწყო და ასევე წარიმართა. ჯორჯიანსელებმა თავიდანვე შეუტიეს, ბესიკ არველაძის ბიჭებმა კონტრშეტევებზე თამაში არჩიეს. საგოლე მომენტი ორივე კართან არაერთი შეიქმნა, მაგრამ თითქმის ნახევარი ტაიმი უგოლოდ გაილია. მე-10 წუთზე გიორგი აფციაური სამ მეტოქეს გასცდა, მეკარესაც დაასწრო და ანგარიში გახსნა, 0:1. ჯორჯიანსელებმა შეტევები გაამწვავეს, მაგრამ უშედეგოდ. მე-13 წუთზე მეკარე ნიკოლოზ ფხაკაძის გრძელი გადაცემა მალხაზ მურცხვალაძემ მახვილი კუთხიდან კარში გადაგზავნა, 0:2. ავთანდილ ასათიანი ბიჭებმა შეტევები გაამწვავეს, რასაც შედეგიც მალე მოჰყვა. დავით ხეჩიკაშვილის დარტყმისას, ფარმაცევტების მეკარე ფხაკაძემ მეტად რთული ბურთი მოიგერია. მე-16 წუთზე მახმადამინოვმა მეტოქეს ბურთი აართვა, მეურვეებს დაასწრო და ანგარიშში სხვაობა შეამცირა, 1:2. მახმადამინოვი ამას არ ასჯერდა და ხუთ წუთში მეორედაც გაიტანა, 2:2. ტაიმის დარჩენილ დროში არაფერი შეცვლილა, მეორე ნახევარი ფარმაცევტების იერიშებით დაიწყო. ნიუ ვიჟენმაც შეტევებით უპასუხა და თამაში ორმხრივი შეტევებით გაგრძელდა. 30-ე წუთზე მიხეილ თევზაძის წამოწყებული იერიში მელტონ ახალაიამ გოლად აქცია, 2:3. ჯორჯიანსელები მდევრის როლს არ შეეგუენ და მეტოქის კარი დაბომბეს, მაგრამ პსპ-ს მეკარე ფხაკაძეს დარჩენილ დროში გოლი არ გაუშვია. ნიუ ვიჟენმა ჯარიმების ლიმიტი ამოწურა და ფარმაცევტებს სხვაობის გაორმაგების შანსი ჰქონდათ, მაგრამ ჯორჯიანსის მეკარე ალექსანდრე ჯამბურიამ ნიკოლოზ კურტანიძის პენალტი მოიგერია. საბოლოოდ, პსპ-მ მოქმედ ჩემპიონს სეზონის პირველი მარცხი (2:3) აგემა და ლიდერთან ჩამორჩენა 11 ქულამდე შეამცირა.

დრამატული გამოდგა ქუთაისში გამართული შეხვედრა, რომელშიც იმერლებმა თსუ მიიღეს. მასპინძელთა ბომბარდირმა ირაკლი გვეტაძემ მე-2 წუთზე გახსნა ანგარიში, 1:0. სამიოდე წუთში გიორგი ნათენაძემ სხვაობა გააორმაგა, 2:0. სტუდენტები თამაშში დაბრუნებას შეეცადნენ და ეს შეძლეს კიდეც. მეათე წუთზე საბა მაჩიტიძემ გაიტანა, წუთნახევარში კი საბა მაჩიტიძემ წონასწორობა აღადგინა, 2:2. მერე ისევ ქუთაისის ჯერი დადგა და ნიკა ხაჭაპურიძემ მასპინძლები დააწინაურა, 3:2. მეორე ტაიმიც იმერელთა სწრაფი გოლით დაიწყო. 21-ე წითზე გვეტაძემ ქუთაისს ორბურთიანი ფორა აღუდგინა, 4:2. თუმცა, სტუდენტებიც არ იყვნენ უქმად და მაჩიტიძემ ანგარიში მინიმუმამდე შეამცირა, 4:3. კიდევ 3 წუთში ჯემალ დეისაძემ 2 ბურთიანი ჰანდიკაპი აღადგინა, 5:3. ამან თსუ გაახელა და მათ არათუ ანგარიშის გათანაბრება, წინ გასვლაც კი შეძლეს. ჯანიკო გიორგაიამ ორი, ლაშა ერქომაიშვილმა ერთი ბურთი გაიტანა და სტუმრები დაწინაურდნენ, 5:6. ქუთათურებს მხსნელად ისევ გვეტაძე მოევლინათ (ჯამში ჰეთ თრიკი შეასრულა), რომელმაც ანგარიში გაათანაბრა, 6:6. სტუდენტებმა კიდევ ერთხელ შეძლეს ქამბექი და მატჩის ბოლოსწინა წუთზე ჯანიკო გიორგაიამ (რომელმაც ამ შეხვედრაში 4 გოლი გაიტანა) თსუ-ს გამარჯვება მოუტანა, 6:7. ამ მოგებით თსუ-მ მეოთხე ადგილზე აინაცვლა და მესამეადგილოსან კსუ-ს 2 ქულით ჩამორჩება.

თუ ილიაუნი არმიასთან წააგებდა, მაშინ არმიელებთან ჩამორჩენა 14-მდე გაიზრდებოდა და მე-5 ადგილისთვის ბრძოლაში მხოლოდ თეორიული შანსიღა რჩებოდა. მოგების შემთხვევაში კი ჩამორჩენა 8 ქულამდე მცირდებოდა, რაც სტუდენტებისთვის დამატებითი მოტივაცია გახლდათ. თამაში ლადო ბურდულის ბიჭებმა უკეთ დაიწყეს, მაგრამ ილიაუნის მეკარე გურამ ბალხამიშვილმა კარის მშრალად შენახვა შეძლო. სტუდენტებმა კონტრშეტევებზე ააწყვეს თამაში და ამან შედეგიც გამოიღო.  მე-4 წუთზე კი რომან კუხიანიძის ჩინებული პასით ლაშა კურტანიძემ ანგარიში გახსნა, 1:0. ამან ლადო ბურდულის ბიჭები გაახელა. მათ მეტოქეზე ზეწოლა გააძლიერეს, ილიაუნმა კი დაცვიდან თამაში გააგრძელა. ტაიმის შუაწელს სტუდენტებმა ჯარიმების ლიმიტი ამოწურეს, მაგრამ სიფრთხილეს უმატეს და პენალტს გადაურჩნენ. მე-18 წუთზე ომარ ასაშვილმა სხვაობა ორამდე გაზარდა, 2:0. წუთიც არ იყო გასული და ოთარ ბერეჩიკიძემ ერთი ბურთი გაქვითა, 2:1. მეორე ტაიმი ფრო უხვგოლიანი გამოდგა. 23-ე წუთზე ბაკურ ნანეიშვილმა ანგარიში გაათანაბრა, 2:2. სტუდენტებმა წამებში უპასუხეს, ლაშა კურტანიძის პასი ასაშვილმა დააფასა, 3:2. ილიაუნი კონტრიერიშებიდან შეტევებზე გადავიდა და კურტანიძემ ამჯერად გიორგი ქურხულს გაატანინა, 4:2.  ოთხ წუთში ბერეჩიკიძემ კიდევ ერთხელ შეამცირა სხვაობა, 4:3. თუმცა, 38-ე წუთზე კუხინიძემ ორბურთიანი ფორა აღადგინა, 5:3. დარჩენილ 2 წუთში ბერეჩიკიძემ კიდევ ერთი ბურთის გატანით ჰეთ თრიკი შეასრულა, მაგრამ ილიაუნმა მაინც მოიგო და მეხუთეზე მყოფ არმიას, ახლა უკვე 8 ქულით ჩამორჩება. ილიაუნის ამ გამარჯვებამ ორი სტუდენტური გუნდი ახეირა - თსუ-მ არმიას 2 ქულით გადაუსწრო, კსუ-მ კი 4-ქულიანი ფორა შეიქმნა.