თსუ-სთან მარცხის შემდეგ, პსპ-მ ზედიზედ 4 მატჩი მოიგო და ილიაუნთანაც გამარჯვება დაგეგმა. მოგება უნდოდა არმიის მძლეველ ილიაუნსაც. მოედანზე კარგი სანახაობა გაჩაღდა. ორივე გუნდს შეეძლო გატანა, მაგრამ შესვენებამდე ტაბლოზე ნულები არ შეცვლილა. მეორე ნახევარიც პსპ-ს უპირატესობით წარიმართა და ტაიმის შუაწელს ანგარიშიც გაიხსნა. 29-ე წუთზე, მოედნის ცენტრში მიხეილ თევაზაძე ბურთი ბრძოლით მოიპოვა და ზუსტი გასროლით ფარმაცევტები დააწინაურა, 1:0. პსპ ამას არ დასჯერდა და იერიშები გააგრძელეს, მაგრამ მეორე გოლი დაუგვიანდათ. სტუდენტებმა მეკარიანად შეუტიეს და მატჩის ბოლო წუთებში მოედანზე უკეთესი სანახაობა გაჩაღდა. 39-ე წუთზე, ილიაუნის შეტევისას ლევან სვანიძემ აუტისას ბურთი ჩაჭრა და შორი მანძილიდან ზუსტი დარტყმით ცარიელ კარში გადაგზავნა, 2:0. პსპ-მ ზედიზედ მეხუთე მატჩი მოიგო, მეორეზე გამაგრდა და ლიდერს 11 ქულით ჩამორჩება.

ავთანდილ ასათიანის ბიჭებმა კარგად იცოდნენ, რომ კსუ-სთან, ტურის ცენტრალურ მატჩში, მეტად რთული თამაში ექნებოდათ. ეს მაშინ, როცა კავკასიელებმა ზედიზედ 3 მატჩი მოიგეს და მესამე ადგილის შესანარჩუნებლად ბოლომდე იბრძოლებდნენ. მოქმედმა ჩემპიონებმა თამაშის სტარტზევე შეუტიეს. მე-3 წუთზე ვახტანგ ჯვარაშვილის ფლანგური გარღვევისას, მისი დარტყმული ბურთი სტუდენტების მეკარე ბექა გოგსაძემ მოიგერია, მაგრამ ბურთი ნიკა მანგოშვილს მოხვდა და კარში აღმოჩნდა, 0:1. გაშვებულმა გოლმა კსუ გაახელა, წონასწორობის აღდგენის შანსიც მალევე ჰქონდათ, მაგრამ ნიუ ვიჟენი მეკარე ალექსანდრე ჯამბურიამ იხსნა. მეტოქეებმა ერთმანეთს პრესინგი შესთავაზეს, რასაც მე-11 წუთზე გოლი მოჰყვა - ჯვარაშვილმა მოწინააღმდეგის პასი ჩაჭრა, ბურთი დავით ხეჩიკაშვილს მიუვიდა, რომელმაც ჩინებული შანსი ხელიდან არ გაუშვა და ფორა გააორმაგა, 0:2. სტუდენტები მდევრის როლს არ შეეგუენ, მე-13 წუთზე გიორგი ხაბალაევმა ფლანგური გარღვევისას, გარი წერეთელს გამჭოლი გადაცემა გაუკეთა და მანაც თანაგუნდელს გარჯა გოლით დაუფასა, 1:2. მეორე ტაიმიც ორმხრივი იერიშებით დაიწყო. 24-ე წუთზე შოთა თოფურიამ ხეჩიკაშვილი მოძებნა, რომელმაც დუბლი შეასრულა და ორბურთიანი ფორა აღადგინა, 1:3. მალევე ჯორჯიანსელებს სხვაობის გაზრდის შანსი მიეცათ, მაგრამ მეკარე გოგსაძემ კსუ იხსნა. თუმცა, 27-ე წუთზე შოხრუნ მახმადამინოვმა სტუდენტთა მეკარის პასი ჩაჭრა და მოწინააღმდეგის შანსები თამაშის გადარჩენისა, მინიმუმამდე შეამცირა, 1:4. ჯორჯიანსელებმა იერიშებთან ერთად პრესინგიც გააგრძელეს და 34-ე წუთზე ანგარიში ისევ გაზარდეს, რონინიოს პასით მახმადაინოვმაც დუბლი მიითვალა, 1:5. ამას სტუდენტებმა 36-ე წუთზე მანგოშვილის ერთადერთი გოლით უპასუხეს, 2:5. ცხრილის ლიდერმა ჯორჯიანსმა 11-ქულიანი ფორა შეინარჩუნა. ამ მარცხით კსუ ცხრილში ერთი საფეხურით, მეოთხეზე დაქვეითდა და მდევარ არმიას მხოლოდ ერთი ქულით უსწრებს.

თსუ-ელებმა უკვე იცოდნენ კსუ-ს მარცხის ამბავი და ისიც, რომ წალენჯიხასთან მოგებით მეოთხედან მესამე ადგილზე აინაცვლებდნენ. თუმცა, თსუ-მ პირველ ტაიმში საერთოდ ბურთის გატანა ვერ მოახერხა. ეს კი სტუმართა გუნდის მეკარე ლაშა გორდულავას საიმედო თამაშით გახლდათ განპირობებული. უგოლო პირველის შემდეგ, მეორე ტაიმიც იგივე სცენარით წარიმართა - თსუ უტევდა, სტუმრები თავს იცავდნენ და ეპიზოდურად უტევდნენ კიდეც, მაგრამ უგოლოდ. მშრალი სერია 27-ე წუთზე შეწყდა, როცა იური ჩანგელიამ საჯარიმო დარტყმით ანგარიში გახსნა, 0:1. სტუდენტებმა იერიშები გაამწვავეს, 34-ე წუთზე ჯანიკო გიორგაიას გამჭოლი გადაცემით გიორგი ჩიმაკაძემ ანგარიში გაათანაბრა, 1:1. თსუ-მ შეტევები გააგრძელა და ორიოდე წუთში ზურაბ ლუკავამ თავისივე იერიში დააგვირგვინა, 2:1. წალენჯიხამ ბოლომდე იბრძოლა, მაგრამ შედეგი აღარ შეცვლილა. თსუ-მ მოიგო და 30 ქულით მესამე ადგილზე აინაცვლა.

წინა ტურში ილიაუნთან მარცხის გამო, არმიელებს რეაბილიტაციისთვის მოგება ესაჭიროებოდათ და ქუთაისს სტარტზევე შეუტიეს. არმია სწრაფი გოლებით დაწინაურდა - მე-3 წუთზე ოთარ ბერეჩიკიძემ ანგარიში გახსნა. წუთიც არ იყო გასული და მანვე დუბლი მიითვალა, 2:0. ამას იმერლებმა მე-10 წუთზე გიორგი ხუნდაძის გოლით უპასუხეს, 2:1. ორიოდე წუთში ბერეჩიკიძემ ჰეთ თრიკი ჩაიწერა, 3:1. ორიოდე წუთში ნანეიშვილის ჩაწოდებისას სტუმრებმა ბურთი საკუთარ კარში ჩაჭრეს, 4:1. არმია ამას არ დასჯერდა და მე-16 წუთზე ვანო ბექაურმა ფლანგური გარღვევა გოლით დააგვირგვინა, 5:1. მეორე ტაიმში ქუთაისელებმა მეტად მოინდომეს. 22-ე წუთზე ირაკლი გვეტაძემ სხვაობა შეამცირა, 5:2. ექვს წუთში სტუმრებმა ისევ საკუთარ კარში ჩაჭრეს ბურთი, 6:2. იმერლებმა ბრძოლა გააგრძელეს და 35-ე წუთზე გვეტაძემ მეორე ბურთიც გაიტანა, 6:3. ქუთათურები მატჩის გადარჩენას შეეცადნენ, მაგრამ ერთი გოლის მეტი ვერ გაიტანეს - 38-ე წუთზე ხუნდაძემ საბოლოო ანგარიში დააფიქსირა, 6:4. ამ მოგებით არმია მე-5 ადგილზე დარჩა და ქულით ჩამორჩება მეოთხეზე მყოფ კსუ-ს, ხოლო მესამე საფეხურზე არჩევებულ თსუ-სთან 2 ქულა აშორებს.