კავკასიელებმა პსპ შეაჩერეს

პსპ-ს 5-მატჩიანი მოგებათა სერია კსუ-მ შეწყვიტა და მესამე ადგილზე დაბრუნდა. ჩემპიონმა მორიგი ქულები დაკარგა. ქუთაისმა ილიაუნთან ფრე გაახერხა... ეს ამბები მოხდა ფუტსალის მთავარი ლიგის დრამატულ მე-18 ტურში. სჯობს თანმიმდევრობას მივყვეთ...

აქამდე, რეგულარულ ჩემპიონატის 9 მატჩიდან, ნიუ ვიჟენ ჯორჯიანსმა თსუ-ს 5-ჯერ მოუგო, 2 მატჩი ფრედ დასრულდა და სტუდენტებმა 2-ჯერ იმარჯვეს. თსუ-მ ამ სტატისტიკის სათავისოდ შეცვლა ჩაიფიქრეს და ტაიმნახევარზე მეტი დროის განმავლობაში, ჩემპიონს უგებდა კიდეც... ყველაფერი კი პირიქით დაიწყო. ჯორჯიანსელებმა სტარტზევე მოიპოვეს ბურთზე კონტროლი და სწრაფი გოლით დაწინაურებას შეეცადნენ. სტუდენტებმა კონტრშეტევაზე თამაში არჩიეს. მეკარე დვალიშვილმა თსუ-ს კარი არაერთხელ იხსნა. მე-6 წუთზე ჯორჯიანსელთა შეტევისას, საბა მაჩიტიძემ რონინიოს ბურთი მოპარა და ანგარიში გახსნა, 0:1. თსუ-ს მალევე სხვაობის გაორმაგება შეეძლო, მაგრამ ერქომაიშვილისა და ლუკავას დარტყმებს მეკარე ალექსანდრე ჯამბურია გადაეფარა. მე-9 წუთზე ჩიმაკაძის პასით ალექსი ტკაჩოვმა სხვაობა ორამდე გაზარდა, 0:2. ჯორჯიანსელებმა მეტოქეზე ზეწოლა გააძლიერეს, ბურთის გატანა არაერთხელ შეეძლოოთ, მაგრამ თსუ-მ ტაიმი მოიგო. ჯორჯიანსელები მდევრის როლში ყოფნას არ შეეგუენ და მეორე ტაიმიც შეტევებით დაიწყეს, მაგრამ  თსუ-ს მეკარე დვალიშვილის წყალობით, გოლი დაუგვიანდათ. 28-ე წუთზე შოხრუნ მახმადამინოვმა ანგარიშში სხვაობა მიმიმუმამდე შეამცირა, 1:2. ჩემპიონებმა შეტევები გააგრძელეს და 33-ე წუთზე მახმადამინოვმა შორეული გასროლით დუბლი ჩაიწერა და ანგარიში გაათანაბრა. თამაში ორმხრივი შეტევებით გაგრძელდა, მაგრამ ანგარიში აღარ შეხვლილა, მატჩი ფრედ 2:2 დასრულდა.

ილიაუნმა ქუთაისთან მატჩის დასაწყისში უპირატესობა კი მოიპოვა, მაგრამ ტაიმის ნახევარზე მეტი უგოლოდ გაილია. მე-12 წუთზე ქურხულის პასით ნიკა გვაზავამ ანგარიში გახსნა და სტუდენტები დაწინაურდნენ, 1:0. გოლის შემდეგ იმერლები გააქტიურდნენ, მათ თამაშიც გაათანაბრეს და ანგარიშიც - მე-18 წუთზე, პრესინგის ხარჯზე ხაჭაპურიძემ მოედნის ცენტრში ბურთი მოიპოვა, მისი პასით ირაკლი გვეტაძემ გოლი გაიტანა, 1:1. მეორე ტაიმში ორმხრივი შეტევები გაგრძელდა, მაგრამ თითო გოლი მხოლოდ მატჩის მიწურულს გაიტანეს, რაც ორი გუნდის მეკარეების დამსახურებაა. იმერელთა კიპერმა ზურაბ მწყერაშვილმა ზედიზედ 3 რთული ბურთი მოიგერია, მაგრამ 37-ე წუთზე გიორგი ქურხულის საჯარიმო დარტყმისას უძლური აღმოჩნდა, 2:1. იმერლებმა ჯარიმების ლიმიტი ამოწურეს, მაგრამ პენალტს გადაურჩნენ და მატჩის დასრულებამდე 5 წამით ადრე გიორგი ხუნდაძემ ანგარიში გაათანაბრა, 2:2. იმერლებმა ილიაუნთან პირველი ფრე გაახერხა და მნიშვნელოვანი ქულა მოიპოვა. ცხრილის ფსკერზე მყოფი ქუთაისი, მეშვიდეზე მყოფ წალენჯიხას 2 ქულით ჩამორჩება და თუ მომდევნო ტურში მეგრელების ძლევას შეძლებს, მაშინ ფლეი აუტში თამაშს თითქმის გაინაღდებს.

წალენჯიხასთან მატჩში არმია მალევე დაწინაურდა. მე-4 წუთზე ბაკურ ნანეიშვილმა მეტოქის მეკარის გრძელი გადაცემა ჩაჭრა და ძლიერი ზუსტი დარტყმით ანგარიში გახსნა, 0:1. თამაში ორმხრივი შეტევებით გაგრძელდა, მაგრამ მეორე ტაიმამდე შედეგი არ შეცვლილა. მეორე ნახევარიც გარდამავალი უპირატესობით დაიწყო. არმიელებმა უპირატესობა მოიპოვეს, წალენჯიხა კონტრშეტევაზე გადაერთო და 28-ე წუთზე ჩალიგავას პასით კაკაჩიამ ძლიერად გაისროლა, ნიკა ხარშილავამ კუთხე დაკეტა და ანგარიში გათანაბრდა, 1:1. ამან თამაშს დაძაბულობა შემატა. ეპიზოდურად წალენჯიხელთა შეტევებში მეკარეც ერთვებოდა, რითაც არმიამ იხეირა.  33-ე წუთზე კახაბერ მაისაიამ შეტევაში ჩართულ მეკარეს ბურთი მოპარა და კარში გადაგზავნა, 1:2. ამან მეგრელები გაახელა, მათ აქტიურობას სიხისტის ზრდაც მოჰყვა და 34-ე წუთზე ჯარიმების ლიმიტი ამოწურეს. არმიელებმა 38-ე წუთზე 10-მეტრიანი მოიპოვეს, გიორგი სილაგავამ პენალტით საბოლოო ანგარიში დაფიქსირა, 1:3.

თუ კსუ პსპ-ს ვერ მოუგებდა, მაშინ მეორეადგილოსანთან ჩამორჩენა 8 ქულა იქნებოდა და კავკასიელები მეორე ადგილისთვის ბრძოლას პრაქტიკულად გამოეთიშებოდნენ. გამარჯვების შემთვევაში კსუ, ფლეი ოფისთვის ბრძოლას გააგრძელებდა. მოკლედ, ტურის ცენტრალურ მატჩს ინტრიგა და მოტივაცია არ აკლდა. ორმხრივ შეტევებში გოლთან უფრო ახლოს თითქოს და პსპ იყო, მაგრამ პირიქით კი მოხდა. მე-8 წუთზე ბექა ბექაურის ძლიერ დარტყმას ეფექტური ცხრიანში მოჰყვა, 0:1. ამან კიდევ უფრო გააწვავა მეტოქეთა იერიშები, მაგრამ უფრო შედეგიანი კსუ აღმოჩნდა. წუთნახევარში ფარცვანიამ ფარმაცევტებს თავისსავე ნახევარზე ბურთი მოპარა, ქუსლით საბა ტყეშელაშვილს დაუგორა, რომელმაც სხვაობა გააორმაგა, 0:2. პსპ-მ მეტოქეზე ზეწოლა გააძლიერა, სტუდენტები დაცვაში არ ჩამჯდარან, მაგრამ მეტად კარის უსაფრთხოებაზე გააკეთეს აქცენტი. ორივე გუნდს შეეძლო გატანა, მაგრამ ანგარიში აღარ შეცვლილა. მეორე ტაიმში კიდევ უფრო დაძაბული და საინტერესო თამაში გაჩაღდა. ორივე მეტოქემ პრესინგს მიმართა და მოედნის ყველა მონაკვეთზე უშეღავათო ბრძოლა გაჩაღდა. საგოლე მომენტების რაოდენობით პსპ-ს უპირატესობა ჰქონდა, მაგრამ სტუდენტების მეკარე ბექა გოგსაძემ ბოლომდე მშრალად შეძლეს კარი დაცვა. 35-ე წუთზე საბა ტყეშელაშვილმა შორეული ძლიერი დარტყმით დუბლი მიითვალა, 0:3. დარჩენილ დროში შედეგი აღარ შეცვლილა. კსუ-მ მოიგო მე-3 ადგილზე დაბრუნდა.