საქართველოს ფუტსალის თასის 1/4 ფინალურმა მატჩებმა ნახევარფინაში გასული 4 გუნდის ვინაობა გაარკვია. თავიდანვე გამცნობთ, რომ ორივე ქვედალიგელი (სეუ და საქართველოს უნივერსიტეტი) გათამაშებას გამოეთიშა და ნახევარფინალისტთა კვარტეტი ფავორიტებმა შეადგინეს.  კსუ-პსპ-ს დერბი ყველაზე დიდ ინტერესს იწვევდა, მატჩი დრამატული გამოდგა და გამარჯვებულის გამოსავლენად ორი ძირითადი და ორი დამატებითი ტაიმი საკმარისი არ გამოდგა... ეს მოკლედ, დეტალურად კი თანმიმდევრობას მივყვეთ.

რეგულარული ჩემპიონატის მიმდინარე გათამაშების მე-16 ტურში, ილიაუნმა არმიას კი მოუგო (5:4), მაგრამ თასის 1/4 ფინალში იგივეს გაკეთება ვეღარ მოახერხა. თუმცა, ყველაფერი პირიქით დაიწყო. სტუდენტებმა სტარტზე უფრო შედეგიანად წარმოჩნდნენ და ანგარიშიც მალევე გახსნეს - გიორგი ქურხულმა ილიაუნი მე-5 წუთზე დააწინაურა. სტუდენტებმა პირველი ნახევარი მინიმალურად მოიგეს (0:1). მეორე ტაიმში არმიელებმა მეტოქეზე ზეწოლა გააძლიერეს და სწრაფი გოლიც გაიტანეს. 22-ე წუთზე ლაშა ფოფხაძემ წონასწორობა აღადგინა, 1:1. ოთხ წუთში ბაკურ ნანეიშვილმა არმია წინ გაიყვანა, 2:1. სტუდენტები მდევრის როლში ყოფნას არ შეეგუენ და დაძაბულობასთან ერთად თამაშს სიხისტეც მოემატა. მთლიანად მატჩი საინტერესო გამოდგა, მაგრამ განსაკუთრებით დრამატული, შეხვედრის ბოლო წუთი გახლდათ... როცა ანგარიში არაერთხელ შეიცვალა და კიდევ ერთხელაც შეიძლებოდა შეცვლილიყო. თამაშის დასრულებამდე 40 წამით ადრე, გიორგი სილაგავამ არმიელების ფორა გააორმაგა, 3:1. სტუდენტებს მალევე მიეცათ ანგარიშის მინიმუმამდე შემცირების ჩინებული შანსი, მაგრამ ქურხულმა პენალტი ვერ გამოიყენა. რომან კუხიანიძემ ერთი ბურთი მაინც გაქვითა... არმიამ 3:2 იმარჯვა და ნახევარფინალში გავიდა.

ფუტსალის თასის მოქმედმა გამარჯვებული ნიუ ვიჟენ ჯორჯიანსი ნახევარფინალში რიხიანად გავიდა. ავთანდილ ასათიანის ბიჭებმა სეუ დიდი ანგარიშით 9:1 დაამარცხეს. მეტოქის რბევა დავით ხეჩიკაშვილმა დაიწყო და მანვე დაამთავრა. ხეჩიკაშვილის მსგავსად, შოხრუნ მახმადამინოვმაც დუბლი მიითვალა. ვახტანგ ჯვარაშვილმა ჰეთ თრიკი შეასრულა, თითო გოლი კი ირაკლი თოდუამ და შოთა თოფურიამ გაიტანეს. სეუ-დან პრესტიჟის გოლი ნიკა სიდამონიძის ანგარიშზეა.

1/4 ფინალს დერბიმ მოლოდინი სრულად გაამართლა. კავკასიელებმა ფარმაცევტებს რეგულარულ სეზონში სამიდან ორი მატჩი მოუგეს. ერთ თამაშში 2:2 ფრე დაფიქსირდა და ამჯერადაც ასე მოხდა. მე-7 წუთზე მიხეილ თევზაძემ პსპ დააწინაურა. 9 წუთში თევზაძემ დუბლი შეასრულა და ფორა გააორმაგა, 0:2. თუმცა, მე-19 წუთზე ნიკა მანგოშვილმა სხვაობა მინიმუმამდე შეამცირა, 1:2. შესვენების შემდეგ, 27-ე წუთზე ლუკა ფარცვანიამ წონასწორობა აღადგინა და ძირთადი დრო 2:2 დასრულდა. დამატებით ტაიმებში ანგარიში არ შეცვლილა და ჯერი პენალტების სერიაზე მიდგა. აქ კი უფრო შედეგიანად ფარმაცევტები წარმოჩნდნენ. პენალტების სერიაში პსპ-მ 2:4 მოიგო და ნახევარფინალში არმიას შეეჭიდება. პენალტების სერიაში ფარმაცევტებიდან, გიორგი აფციაურმა, ნიკოლოზ კურტანიძემ, ნიკოლოზ კოპლატაძემ და ლევან სვანიძემ გაიტანეს გოლები. კსუ-დან კი ბექა ბექაური და ბექა გოგსაძე გამოირჩნენ.

სტუდენტურ დერბიში თსუ-მ დიდი ანგარიშით, 8:1 მოუგო საქართველოს უნივერსიტეტს. თსუ-ელთაგან გიორგი ჩიმაკაძემ ჰეთ თრიკი, ნოდარ ქურცაძემ კი დუბლი შეასრულა. თითო გოლი ზურაბ ლუკავამ, ლაშა ერქომაიშვილმა და ჯანიკო გიორგაიამ გაიტანეს. სეუ-დან ერთადერთი გოლის ავტორი საბა გოგოლაძეა. თსუ ნახევარფინალში გავიდა, სადაც თასის მოქმედ გამარჯვებულთან, ნიუ ვიჟენ ჯორჯიანსთან მოუწევს დაპირისპირება.