აქამდე მხოლოდ ის იყო გარკვეული, რომ დარჩენილ 3 ტურში, ნებისმიერი შედეგის შემთხვევაში, ნიუ ვიჟენ ჯორჯიანსი და ილიაუნი, შესაბამისად პირველ და მე-6 ადგილზე დარჩებოდნენ. მე-19 ტურში მეორე ადგილი და შესაბამისად ფლეი ოფის მეორე საგზური პსპ-მ გაინაღდა. თუმცა, სჯბს თანმიმდევრობას მივყვეთ...

ილიაუნთან გამარჯვებით, კსუ მეორე ადგილისთვის ბრძოლას გააგრძელებდა. მოგების შემთხვევაში, ილიაუნი ცხრილში ზემოთ ვერ აინაცვლებდა, მაგრამ მათ სეზონის ბოლომდე ღირსეულად, ბოლომდე იბრძოლეს. თამაში ორმხრივი იერიშებით დაიწყო, მე-6 წუთზე, კავკასიელებს გოლის გატანა მართებდათ, მაგრამ მეკარე ბექა გოგსაძის დარტყმული პენალტისას, ბურთი ხარიხამ აისხლიტა. გაცუდებული შანსისთვის კსუ-ელები ექვს წუთში დაისაჯნენ. მე-12 წუთზე ლაშა კურტანიძემ ცენტრში მეტოქეს ბურთი აართვა, ორ მოწინააღმდეგეს გასცდა და ანგარიში გახსნა, 0:1. კავკასიელებმა მეტოქეზე ზეწოლა გააძლიერეს, შეტევებში მეკარეც ჩართეს და მე-17 წუთზე შედეგიც მოიმკეს. მახვილი კუთხიდან ბექაურის დარტყმული ბურთი ილიაუნის კიპერმა ბალხამიშვილმა მოიგერია, დამატებაზე მანგოშვილმა იმარჯვა და ანგარიში გაათანაბრა, 1:1. მეორე ტაიმი კსუ-მ აქტიურად დაიწყო. 21-ე წუთზე მანგოშვილმა დუბლი შეასრულა და კავკასიელები დააწინაურა, 2:1. კსუ-მ იერიშები გააგრძელა და ფორაც გააორმაგა - 28-ე წუთზე ბექაურმა, საჯარიმოში მყოფ თამაზ ვახანიას ბურთი თავით დაუგდო, რომელმაც ზუსტი დარტყმით ანგარიში შეცვალა, 3:1. ილიაუნი მდევრის როლს არ შეეგუა და 30-ე წუთზე გიორგი ქურხულმა ძლიერი დარტყმით ანგარიშში სხვაობა მინიმუმამდე შეამცირა, 3:2. ილიაუნელები ამას არ დასჯერდნენ და წუთნახევარში ომარ ასაშვილმა შეტევაში ჩართულ მეტოქის მეკარეს, ცენტრში ბურთი აართვა და შორეული დარტყმით წონასწორობა აღადგინა, 3:3. დარჩენილ 9 წუთში ორივე გუნდს შეეძლოო გატანა, მაგრამ ანგარიში აღარ შეცვლილა. მოწინააღმდეგეები ფრეზე (3:3) გაიყარნენ.

კსუ-ს ფრის შემდეგ, არმიას შანსი მიეცა მოქმედ ჩემპიონთან მოგების შემთხვევაში, მეორე ადგილისთვის ბრძოლა გაეგრძელებინა. ამ მატჩის მოსაგებად ლადო ბურდულის ბიჭებს დამატებითი მოტივაციაც ჰქოდათ და ისინიც დიდი მონდომებით ეკვეთნენ ჯორჯიანსელებს. სწრაფ ტემპში დაწყებული თამაში, გარდამავალი უპირატესობით წარიმართა. არცერც მეტოქეს ჰქონდა უპირატესობა, როცა მე-5 წუთზე კახაბერ მაისაიამ ოსტატური დარტყმით ანგარიში გახსნა, 1:0. ნიუ ვიჟენელები გაცხარდნენ და წუთნახევარში ლაშა სიგუნავამ ანგარიში გაათანაბრა, 1:1. აქედან 3 წუთში დავით ხეჩიკაშვილმა ჩინებული პასით შოთა თოფურია მოძებნა, რომელმაც ჯორჯიანსელები წინ გაიყვანა, 1:2. ამის შემდეგ არმიელთა ჯერი დადგა, რომელთა იერიშებში მეკარე ტერუნაშვილიც აქტიურად ჩაერთო. მე-12 წუთზე ტერუნაშვილის დაწყებული იერიში ბერაიამ გააგრძელა, რომლის პასით გიორგი სილაგავამ ანგარიში გაათანაბრა, 2:2. არმიამ დაწინაურებას შეეცადა და 6 წუთში ტერუნაშვილის წამოწყებული კიდევ ერთი შეტევისას, ბაკურ ნანეიშვილმა არმია კიდევ ერთხელ წინ გაიყვანა, 3:2. ჯორჯიანსელებმა შეტევები გააგრძელეს და ტაიმის მიწურულს ვახტანგ ჯვარაშვილმა ანგარიში გაათანაბრა, 3:3. მეორე ტაიმიც სწრაფ ტემპში და საინტერესოდ წარიმართა. 25-ე წუთზე არმიელთა მეკარემ რონინიოს დარტმული ბურთი კი მოიგერია, მაგრამ დამატებაზე ხეჩიკაშვილის წინააღმდეგ უძლური აღმოჩნდა, 3:4. ამას არმიელებმა მოგვიანებით უპასუხეს. 34-ე წუთზე ოთარ ბერეჩიკიძემ წონასწორობა აღადგინა, 4:4. ზუსტად წუთში კი, ირაკლი თოდუამ ჯორჯიანსელები დააწინაურა, 4:5. არმია ამას არ შეგუა, მატჩის დასრულებამდე 30 წამით ადრე, მეკარე ტერუნაშვილმა სეზონის მე-5 გოლით ანგარიში გაათანაბა, 5:5. მასვე გამარჯვების გოლის გატანაც შეეძლო, მაგრამ ბურთი ძელმა აისხლიტა. კსუ-ს ფრის მსგავსად, ეს ფრეც იმას ნიშნავდა, რომ პსპ-ს მოგების შემთხვევაში, მეორე ადგილისთვის ბრძოლას არმიაც ჩამოშორდებოდა.

ფარმაცევტებთან გამარჯვებით, თსუ მეორე ადგილისა და პლეი ოფის მეორე საგზურისთვის ბრძოლას გააგრძელებდა. პსპ კი მოგებით მეორე ადგილს გაინაღდებდა. მეტოქეებს 3 ქულისთვის ბრძოლაში მოტივაცია არ აკლდათ. ამ შეხვედრაში სტუდენტებს არაერთი მოთამაშე აკლდათ. მათ შორის გუნდის კაპიტანი გიორგი ჩიმაკაძე. ჩიმაკაძის არყოფნაში  ჯანიკო გიორგაიამ კაპიტნის სამკლაურით, მე-2 წუთზე ანგარიში გახსნა, 1:0. ამას პსპ-მ მოგვიანებით უპასუხა - მე-10 წუთზე ნიკოლოზ კურტანიძემ შორეული ძლიერი დარტყმით ანგარიში გაათანაბრა, 1:1. ტაიმის ბოლო წუთზე გიორგაიამ, ისევ ქურცაძის პასით, დუბლი მიითვალა და თსუ წინ გაიყვანა, 2:1. ფარმაცევტებმა მეორე ტაიმი გაცილებით შედეგიანად ჩაატარეს, მაგრამ გოლები დაუგვიანდათ. 30-ე წუთზე მიხეილ თევზაძემ წონასწორობა აღადგინა, 2:2. პსპ ამას არ დასჯერდა, შეტევები გააგრძელა და შედეგიც მოიმკა, თანაც არაერთხელ. 36-ე წუთზე ლუკა ჯოლოხავამ ფარმაცევტები წინ გაიყვანა, 2:3. ბოლო ორ წუთში ლევან სვანიძემ დუბლი მიითვალა, პსპ-მ დამაჯერებლად 2:5 მოიგო, რითაც მეორე ადგილი და ფლეი ოფის მეორე საგზური გაინაღდა.

ტურის კიდევ ერთი მატჩი, ქუთაისი-წალენჯიხის დაპირისპირება 10 აპრილს გაიმართება. პრაქტიკულად ეს შეხვედრა გადაწყვეტს ლიგიდან დაქვეითებული და ფლეი აუტში გასული გუნდების ვინაობას. დარჩენილი ორ ტურში, ფლეი ოფში მოხვედრილი ოთხი გუნდი, ორ წყვილს შეადგენს. საინტერესოა ვის ვინ ერგება...