მე-13 ტური ფრის გარეშე დასრულდა. ტური ვისთვის ნავსიანი და ვისთვის შედეგიანი აღმოჩნდა. დამარცხებული ტრიო ახლოს იყო მიზანთან, მაგრამ მატჩის გადარჩენა ვერცერთმა შეძლო. მეორე სამეულისთვის კი ზეიმი შედგა. საგულისხმოა ის, რომ მე-13 ტურში, თელასს მდევარი შეეცვალა, კსუ-ს მატჩი გადაიდო და ლიდერის მდევრის როლი პსპ-მ და ილიაუნმა მოირგეს. ამ ტურის ორი მატჩი ერთნაირი ანგარიშით დასრულდა და კინაღამ მესამეშიც იგივე შედეგი დაფიქსირდა. აღსანიშნავია ისიც, რომ თსუ-ს ლეგიონერთა ტრიოდან, ორმა პირველი გოლები მიითვალა, მაგრამ სტუდენტებს ამან ვერ უშველა.

ილიაუნმა ქუთაისურ მართვეს უმასპინძლა და თასის მფლობელმა ლიგის დებიუტანტის წინააღმდეგ, მატჩის სტარტზევე ბრჭყალები გამოაჩინა. საგულისხმოა ერთი დეტალი, მართვემ ამ მატჩშიც დაამტკიცა, რომ ეს გუნდი პროგრესირებს. მოკლედ, თამაში იმდენად დინამიურად და სწრაფ ტემპში წარიმართა, რომ საწყის 3 წუთში 3 გოლი გავიდა. პირველივე წუთზე სტუდენტებმა თამაზ გოგსაძის დარტყმით გახსნეს ანგარიში, მეორე წუთზე კი ოთარ ბერეჩიკიძემ ფორა გააორმაგა. რამდენიმე წამში გრძელი გადაცემით, იმერლებმა ირაკლი ზარნაძე ილიაუნის მეკარესთან პირისპირ გაიყვანეს, მანაც ბურთი მიიღო და ერთი შეხებით კარში გადაგზავნა, 2:1. ამან ილიაუნი გაახელა, მაგრამ ქუთათურები არ გატყდნენ, კარიც დაიცვეს და მეტოქეც გვარიანად ანერვიულეს. თუმცა პირველ ნახევარში ანგარიში აღარ შეცვლილა. შესვენების შემდეგ, 23-ე წუთზე გურამ ხაჭაპურიძემ მახვილი კუთხიდან რთული ბურთი გაიტანა და ორბურთიანი ფორა აღადგინა, 3:1. სტუდენტებმა შეტევები გააგრძელეს, მაგრამ გოლის გატანა დაუგვიანდათ. 32-ე წუთზე ბერეჩიკიძემ სხვაობას სოლიდური სახე მისცა, 4:1. ორიოდე წუთში ნიკა ხარაიშვილმა ერთი ბურთი გაქვითა, 4:2. ქუთათურებმა მატჩის გადარჩენისთვის ბოლომდე იბრძოლეს,მაგრამ ანგარიში აღარ შეცვლილა. ილიაუნმა ამ მოგებით 19 ქულა დააგროვა და მეორე ადგილზე აინაცვლა, მაგრამ როგორც აღმოჩნდა მხოლოდ ერთპიროვნულად არა...

თბილისის ოლიმპიურ სასახლეში გამართული მეორე შეხვედრა, რომელშიც პსპ-მ თსუ-ს უმასპინძლა, ორივე გუნდისთვის მძიმე და დაძაბული აღმოჩნდა. ალბათ ამით უნდა აიხსნას ის ფაქტი, რომ მეტოქეებმა 14 წუთი უგოლოდ ითამაშეს. მელიტონ ახალაიამ სამი მეტოქე დაჯაბნა, წინ გამოსულ მეკარესაც აჯობა და ბურთი კარში გადაგზავნა, 1:0.  თსუ ამას არ შეეგუა და შეტევებს სიმწვავე შემატა. სხვებთან ერთად აქტიურობდა სტუდენტების ლეგიონერთა ტრიო. კაიქუე გომესმა ჯონათან პერეირას პასი შეირგო და მეშვიდე მცდელობისას გოლი იზეიმა, 1:1. მეორე ტაიმი სტუდენტებმა უკეთ დაიწყეს და სტარტზე პერეირას დარტყმისას, პსპ-ს კარი ხარიხამ იხსნა. ფარმაცევტებმა მალე შეძლეს თამაშის გათანაბრება და 25-ე წუთზე გოლიც იზეიმეს. მეკარის გრძელი პასი შალვა კაპანაძემ შეირგო და პსპ წინ გაიყვანა, 2:1.  თსუ-მ მეტოქეზე ზეწოლა გააძლიერა, მაგრამ გათანაბრეის ნაცვლად გოლი მიიღო. ზუნტუროვის გამჭოლი პასი ლევან სვანიძემ გოლად აქცია, 3:1.  ოთხ წუთში პერეირამ ჩიმაკაძეს პასი დააფასა და ერთი ბურთი გაქვითა. 3:2. სტუდენტებმა მწვავე იერიშები გააგრძელეს, პერეირასა და გომესს დუბლის შესრულების შანსიც ჰქონდათ, მაგრამ... ფარმაცევტებმა ანგარიშის გათანაბრების საფრთხე იგრძნეს და თამაშს უმატეს. 33-ე წუთზე ახალაიამ დუბლი შეასრულა, 4:2. თსუ-ს მატჩის გადასარჩენად 7 წუთი ჰქონდა და ბოლომდე იბრძოლა, მაგრამ პსპ-ს კიპერმა ნიკოლოზ ფხაკაძემ არაერთი რთული ბურთი მოიგერია და თავის გუდს  მოაგებინა. ფარმაცევტებმაც 19 ქულა მოაგროვეს და ილიაუნთან ერთად მეორე-მესამე ადგილებს იყოფენ.

გადაჭრბებული არ იქნება, თუ ვიტყვით, რომ ბოლო მატჩი დღის კულმინაცია გახლდათ, რომელშიც არმია  თელასი ჯორჯიანსს დაუპირისპირდა. მეტოქეებმა ტაიმებში განსხვავებული შედეგიანობა აჩვენეს. საწყის 20 წუთში თელასმა იძალა და სოლიდურად, მშრალად მოიგო. ჯორჯიანსელები მე-3 წუთზე ირაკლი თოდუამ დააწინაურა, 0:1. არმიელთა კიპერმა ტერუნასშვილმა არაერთი რთული დარტყმა მოიგერია, მაგრა მეათე წუთზე ვახტანგ ჯვარაშვილის გასროლას ვერაფერი მოუხერხა და 0:2. შესვენებამდე 5 წუთით ადრე თოდუამ დუბლი შეასრულა და 13 გოლით ბომბარდირთა დავაში დაწინაურდა. 24-ე წუთზე კახაბერ მაისაიამ თელასელთა შეუთანხმებელი თამაშით იხეირა და ერთი ბურთი გაქვითა, 1:3. ამ გოლმა არმიელებს თავდაჯერება შემატა და უფრო მწვავედ შეუტიეს. მატჩის დასრულებამდე 9 წუთით ადრე მალხაზ მურცხვალაძემ სხვაობა მინიმუმამდე შეამცირა და არმიელებს არა მხოლოდ თამაშის გადარჩენის, არამედ მოგების შანსიც მისცა. თუმცა, ავთანდილ ასათიანის ბიჭებმა იძალეს და 35-ე წუთზე ვახტანგ კეკელიამ თელასის ფორა გაზარდა, 2:4. ორიოდე წუთში ბაკურ ნანეიშვილმა კიდევ ერთხელ მინიმუმამდე შეამცირა ანგარიში, 3:4. დარენილ ორწუთნახევარში არმიელები გათანაბებას ეცადნენ, მაგრამ ანგარიში აღარ შეცვლილა.