ფუტსალის უმთავრეს ლიგაში, მიმდინარე სეზონის ყოველი ახალი ტური, ახალ სიურპრიზებს გვთავაზობს. ეს ტური ორი ლიდერისთვის მარცხიანი აღმოჩნდა. ხუთი ტურის განმავლობაში, პსპ ერთადერთი დაუმარცხებელი გუნდი იყო, ამჯერად კი უძლეველი აღარავინაა. ფარმაცევტები პირველად დამარცხდნენ და სატურნირო ცხრილს ერთპიროვნული ლიდერი აღარ ჰყავს, ამჯერად სამი თანალიდერია. როგორც იტყვიან, სამეული გამეფდა. თუკი აქამდე ორი დებიუტანტი გუნდი იყო უქულოდ, ერთმა პირველი გამარჯვება იზეიმა... ეს იყო მეექვსე ტურის მთავარი ცვლილებები. უფრო დეტალურად, სჯობს  თანმიმდევრობას მივყვეთ.

ტური კსუ-სა და ილიაუნის სტუდენტური დერბით გაიხსნა. კავკასიელები ამ მატჩამდე მეორე ადგილზე იყვნენ და ლოგიკურად მეექვსე საფეხურზე მყოფი მეტოქის ძლევა უნდა შეძლებოდათ. მით უმეტეს, გასულ სეზონში კსუ-მ სამიდან ორი მატჩი მოუგო პსპ-ს და მხოლოდ ერთხელ დამარცხდა, მაგრამ... თამაში მძიმედ დაიწყო და გოლიც დაგვიანდა. ტაიმის 3/4-მა გარდამავალი უპირატესობით, მაგრამ მშრალად ჩაიარა. მე-16 წუთზე ალექსანდრე ორაგველიძემ მახვილი კუთხიდან ანგარიში გახსნა და კსუ წინ გაიყვანა. ილიაუმა მეტოქეს ორ წუთში უპასუხა - ბექა ონიანმა კონტრშეტევა წამოიწყო, რომელიც დავით თაბაგარმა გოლით დააგვირგვინა, 1:1. თითქმის წუთში ილიაუნი ისევ დაწინაურდა: ექიზაშვილის იერიში და გამჭოლი პასი, ბექა ონიანმა გოლად აქცია, 1:2. მეორე ტაიმში კსუ-მ თამაშს უმატა, მაგრამ ილიაუნი საიმედოდ იცავდა თავს. ბოლოს კავკასიელებმა მეკარის თანხლებით შეუტიეს, ილიაუნი დაცვიდან თამაშობდა და თავის შანსს ელოდა. კსუ-მ მაინც შეძლო ანგარიშის გათანაბრება, მატჩის დასრულებამდე 7 წამით ადრე საბა ტყეშელაშვილმა კავკასიელებს ქულა შეუნარჩუნა, 2:2. 

მეორე შეხვედრაში ლიგის ორი დებიუტანტი, ევროპის უნივერსიტეტი და ქუთაისი დაუპირისპირდა ერთმანეთს. ტაიმის პირველ ნახევარში ქუთათურები უკეთ წარმოჩნდნენ, მაგრამ თბილისელთა კიპერმა არაერთხელ იმარჯვა. მერე ევროპელებმა ბურთზე კონტროლი მოიპოვეს და თამაშის სადავეებსაც დაეუფლნენ, მაგრამ გოლი და შემდეგ გოლები დაუგვიანდათ... მე-16 წუთზე ჯანელიძის პასი, ჩოხელმა გააგრძელა და დიაკვნიშვილმა გოლად აქცია, 1:0. სტუდენტებმა მეორე ტაიმი უკეთ დაიწყეს, 22-ე წუთზე გიორგი ჩოხელმა ფორა გააორმაგა და ბომბარდირთა დავაში 8 გოლით ერთპიროვნულად გალიდერდა. იმერლებმა ბურთი დაიჭირეს, მაგრამ სტუდენტებმა მაინც გაიტანეს. 25-ე წუთზე კახაბერ გოგოხიამ კიდევ უფრო გაზარდა სხვაობა, 3:0. ხუთ წუთში თბილისელთაგან საბა გოგოლაძემ ანგარიში სოლიდური გახადა, 4:0. გარდამავალი უპირატესობით წარმართულ მეტ-ნაკლებად თანაბარ თამაშში, ეს შედეგი ალოგიკურად მოჩანდა და ქუთათურთა ჯერიც დადგა. იმერელთა ფორვარდმა ლაშა ბუბულაშვილმა ორწუთიან მონაკვეთში დუბლი მიითვალა და სხვაობა შეამცირა, 4:2. თუმცა, მალევე თბილისელთაგან დიაკვნიშვილმა მახვილი კუთხიდან გაიტანა, 5:2. სამ წუთში გოგოხიამაც მეორე გაიტანა და ფორა ოთხამდე გაზარდა, 6:2. ბოლოს იმერლებმა გაიბრძოლეს, გულუამ და მეკარე ცინცაძემ თითო ბურთი გაიტანეს და სტუდენტებმა 6:4 იმარჯვეს. ევროპელებმა პირველი გამარჯვება გაიფორმეს და ილიაუნს არა 7, არამედ 4 ქულით ჩამორჩებიან.

შემდეგ ნიუ ვიჟენ ჯორჯიანსი და არმია წარსდგნენ ერთმანეთის წინაშე. ორივემ უკვე იცოდა, რომ კსუ ილიაუნთან ფრეს დასჯერდა. ჯორჯიანსელებს შეეძლოთ მოგების შემთხვევაში ქულებით გათანაბრებოდა კავკასიელებს, არმიელები თუ მოიგებდნენ ჯორჯიანსელებს გაუსწრებდნენ და მესამე ადგილზე აინაცვლებდნენ. ასე რომ, ორივე გუნდს დამატებითი მოტივაციაც ჰქონდა და თამაში სწრაფ ტემპში დაიწყო. ორმხრივ შეტევებში არმიელებს მეტად გაუმართლათ. მე-6 წუთზე ვანო ბექაურმა კონტრშტევაზე იმარჯვა და არმია  წინ გაიყვანა, 0:1. ავთანდილ ასათიანის ბიჭებმა უფრო ორგანიზებულად შეუტიეს, მაგრამ არმიელთა კიპერმა ვახტანგ ტერუნაშვილმა არაერთხელ იხსნა კარი, მაგრამ მე-17 წუთზე, დავით ხეჩიკაშვილის დარტყმისას უძლური აღმოჩნდა, 1:1. მეორე ტაიმის სტარზეც ლადო ბურდულის ბიჭები დაწინაურდნენ, 24-ე წუთზე ოთარ ბერეჩიკიძემ არმიელები წინ გაიყვანა, 1:2. ჯორჯიანსელებმა უფრო მწვავედ შუტიეს და ორიდე წუთში გიორგი ქურდაძემ ანგარიში გაათანაბრა, 2:2. ოთხ წუთში იმავე ქურდაძემ კუთხურიდან ჩაწოდებული ბურთი, ერთი შეხებით კარში გადაგზავნა და ლამაზი გოლით ჯორჯიანსელებს მოაგებინა, 3:2.

გასულ სეზონში, პსპ-მ სამიდან ორჯერ მოუგო თსუ-ს, ერთხელ კი მარცხი იწვნია. სტუდენტებს ამჯერადაც სჯეროდათ, რომ ცხრილის ლიდერი მეტოქის ძლევა შეეძლოთ. თამაში კარგ ტემპში დაიწყო, ფარმაცევტებმა მეტად მოინდომეს და სწრაფი გოლით დაწინაურდნენ. მე-3 წუთზე, მარცხენა ფრთაზე სვანიძის რეიდი ნიკოლოზ კურტანიძემ გოლად აქცია, 1:0. სტუდენტები არ დაბნეულად, მეტოქეზე ზეწოლა გააძლიერეს და ორ წუთში წონასწორობა აღადგინეს. მეკარის გრძელი პასით ჩიმაკაძემ სწრაფი შეტევა წამოიწყო, რომელიც ჯანიკო გიორგაიამ გოლად აქცია, 1:1. თამაში ორმხრივი იერიშებით და ძალზედ საინტერესოდ გაგრძელდა. მე-11 წუთზე გიორგი ჩიმაკაძემ მეტოქის შეტევა ჩაჭრა და სტუდენტები წინ გაიყვანა, 1:2. მეორე ტაიმი თსუ-ს გოლით დაიწყო. ბორის ესებუამ ცაციათი გაისროლა და ეფექტური გოლით სტუდენტებს ორბურთიანი ფორა შეუქმნა, 1:3. ხუთ წუთში ესებუამ გრძელი, დიაგონალური პასით ზურაბ ლუკავა მოძებნა, რომელმაც სხვაობა სოლიდური გახადა, 1:4. ფარმაცევტებმა უფრო მწვავედ და ორგანიზებულად შეუტიეს, სტუდენტებიც უტევდნენ, ანგარიშის შეცვლა ორივე გუნდს შეეძლო, მაგრამ ტაბლოზე დაფიქსირებული შედეგი აღარ შეცვლილა, თსუ-მ იმარჯვა და მეხუთედან მეოთხე ადგილზე გადაინაცვლა.