ფუტსალის უმთავრესი ლიგის მეექვსე ტურში სენსაცია და მოულოდნელობა არ ყოფილა. ფავორიტებმა იმარჯვეს, გოლები ლეგიონერებმაც გაიტანეს. საგულისხმოა ის, რომ მეექვსე ტურის შემდეგ, სამ გუნდს თანაბარი ქულეთა მარაგი აქვთ და მეოთხე ადგილზე არიან...

ტური კსუ-სა და თსუ-ს სტუდენტური დერბით დაიწყო. ამ მატჩამდე, ორივე გუნდი, ბოლო ორ მატჩში ზედიზედ დამარცხდა და ამ თამაშის მოსაგებად დამატებითი მოტივაცია ჰქონდათ. მოწინააღმდეგეებმა სტარტიდანვე ლაღი და სანახაობრივად მდიდარი თამაში შემოგვთავაზეს, მაგრამ ტაიმის პირველი ნახევარი მაინც მშრალი გამოდგა. ორმხრივ იერიშებში კავკასიელთა უპირატესობა ნელ-ნელა გამოიკვეთა და ეს შედეგშიც აისახა. მე-12 წუთზე თამაზ ვახანიამ საჯარიმოს მისადგომებიდან ანგარიში გახსნა, 1:0. მიღებული გოლის შემდეგ თსუ-მ მეტოქეზე ზეწოლა გააძლიერა, მაგრამ თსუ-ს უპირატესობის ფონზე, კავკასიელებმა სხვაობის გაორმაგება შეძლეს და ეს, მე-17 წუთზე ნიკა მანგოშვილმა მოახერხა. თსუ-მ იერიშები გააგრძელა, შეტევებში მეკარეც ჩართო და შესვენებამდე ნახევარი წუთით ადრე გიორგი ჩიმაკაძის გამჭოლი პასი ჯანიკო გიორგაიამ გოლად აქცია, 2:1. მეორე ტაიმი კსუ-მ უკეთ დაიწყო და ორბურთიანი ფორა სტარტზევე აღადგინა. 21-ე წუთზე მანგოშვილმა ქუსლით ჩინებული პასი გაუკეთა საბა ტყეშელაშვილს, რომელმა ტაბლოზე სხვაობა შეცვალა, 3:1. თსუ მდევრის როლში ყოფნას არ შეეგუა, მაგრამ მხოლოდ ერთი ბურთის გაქვითვა შეძლო - 29-ე წუთზე საბა ლუკავას დარტყმისას ბურთი ტყეშელაშვილს მოხვდა და რიკოშეტით კარში აღმოჩნდა. კავკასიელებმა სეზონში მეორე მოგება მიითვალეს და ქულებით, თსუ-სთან ერთად, არმიასაც გაუთანაბრდნენ.

ნიუ ვიჟენ ჯორჯიანსმა ქუთაისი მიიღო და გოლებით უხვად დაასაჩუქრა. პირველივე წუთზე შოხრუნ მახმადინოვმა ანარიში გახსნა, 1:0. ავთანდილ ასათიანის ბიჭებმა შეტევები გააგრძელეს, მაგრამ გოლი დაუგვიანდათ, რაც ქუთაისელთა მეკარე გიგი ლომაიას დამსახურებაა. ჯორჯიანსელთა გარჯას შედეგი მაინც მოჰყვა, მე-12 და მე-13 წუთებზე გატანილი გოლებით ვახტანგ ჯვარაშვილმა დუბლი მიითვალა, ბომბარდირთა ცხრილს 9 გოლითა და ფორით სათავეში ჩაუდგა, 3:0. პირველ ტაიმში, დუბლის შესრულება მახმადამინოვსაც შეეძლო, მაგრამ მის მიერ შესრულებული პენალტისას ბურთს სტუმართა კიპერი ლომაია დაეუფლა. მეორე ტაიმიც ჯორჯიანსელთა შეტევებით დაიწყო და 25-ე წუთზე ნიკოლოზ გაბრიჩიძემ ანგარიშს სოლიდური სახე მისცა, 4:0. აქედან ოთხ წუთში ყირგიზეთის ნაკრების ფორვარდმა მახმადამინოვმა დუბლი მიითვალა, 5:0. ამის მერე ქუთათურების ჯერი დადგა და 32-ე წუთზე ნიკოლოზ ბოლქვაძემ ერთი ბურთი გაქვითა, 5:1. ჯორჯიანსელებმა მეკარიანად შეუტიეს, რითაც კარგად ისარგებლეს სტუმრებმა, ირაკლი გვეტაძემ გადაცემა ჩაჭრა და სხვაობა შეამცირა, 5:2. მასპინძლებმა მეტოქეზე ზეწოლა გააგრძელეს და 37-ე წუთზე რონინიომ ძლიერი დარტყმით, სეზონის პირველი ქართული გოლი გაიტანა, 6:2. ნახევარ წუთში, იმერლებმა ნიუ ვიჟენის შეტევა ჩაჭრეს და კიდევ ერთი გოლი გაიტანეს, 6:3. ჯორჯიანსელებმა მორიგი გამარჯვება მიითვალეს, ქუთაისი კი ამ სეზონში მეოთხედ დამარცხდა.

წინა ტურში სენსაციის ავტორ ილიაუნის წინააღმდეგ, ლიგის დებიუტანტმა წალენჯიხამ სენსაცია ჩაიფიქრა. მატჩი ორმხრივი შეტევებით დაიწყო, ანგარიშის გაზრდა ორივე გუნდს შეეძლო, მაგრამ გოლები მხოლოდ ტაიმის ბოლო 5 წუთში გავიდა.  მე-15 წუთზე გიორგი ტიკურიშვილმა ილიაუნი დააწინაურა. სტუმრები გაცხარდნენ და შეუტიეს. მე-18 წუთზე წალენჯიხელთა შეტევა ბორის ესებუამ ჩაჭრა, ლაშა კურტანიძემ კი სხვაობა გააორმაგა, 2:0. მეგრელები გაცხარდნენ და ნახევარ წუთში ერთი ბურთი გაქვითეს. გურამ ჩალიგავამ ილიაუნელთა გადაცემა ჩაჭრა, კარგად უპასა ზურაბ ღვინჯილიას და 2:1. სტუმრები ამას არ დასჯერდნენ, წუთში ღვინჯილიამ საჯარიმო ზუსტად და ძლიერად შეასრულა, დუბლიც მიითვალა და წონასწორობაც აღადგინა, 2:2. ორმხრივი იერიშები მეორე ტაიმშიც გაგრძელდა. 28-ე წუთზე ტიკურიშვილის გამჭოლი პასი გიორგი ქურხულმა გოლად აქცია, 3:2. დარჩენილ დროში წალენჯიხა თამაშის გადარჩენას შეეცადა, მაგრამ ანგარიში აღარ შეცვლილა. ილიაუნმა ზედიზედ მესამედ მოიგო და ცხრილში მესამე პოზიციაზე გამაგრდა.

პსპ-სა და არმიას დაპირისპირება ტურის ცენტრალური მატჩი გახლდათ. თამაში ორმხრივი შეტევებით დაიწყო, მერე არმიელებმა უპირატესობა მოიპოვეს, ფარმაცევტებმა კონტრიერიშებზე გააკეთეს აქცენტი და გვარიანად შეაწუხეს მეტოქე. თუმცა, გოლის გატანის ორმხრივი მცდელობების მიუხედავად, ტაიმი უგოლოდ დასრულდა. პსპ-მ მეორე ტაიმშიც კონტრშეტევებზე ააგო თამაში და ამან შედეგი გამოიღო. 23-ე წუთზე ნიკოლოზ კურტანიძემ არმიას იერიში ჩაჭრა, კარგად უპასა მელტონ ახალაიას, რომელმაც ამ მატჩის ერთადერთი გოლი გაიტანა. არმიელები გატანას შეეცადნენ და შანსიც არაერთი ჰქონდათ, მაგრამ შედეგი აღარ შეცვლილა. პსპ-მ იმარჯვა და 12 ქულით მეორე ადგილზე პოზიციები გაიმყარა.