სეზონის ბოლო და ყველაზე მნიშვნელოვანი აკორდი, ფლეი ოფის ფინალური სერია დაიწყო... რომელიც მოქმედმა ჩემპიონმა და ორგზის გამარჯვებულმა, ნიუ ვიჟენ ჯორჯიანსმა მრისხანედ დაიწყო. წარმატებული სტარტის გარდა, რიხიანად მოგება სწორედ მრისხანებაზე მეტყველებს. ჩემპიონობისთვის საჭირო სამი მოგებიდან, ავთანდილ ასათიანის ბიჭებმა ერთი გამარჯვება უკვე ჩაიწერეს აქტივში... თასის დაუფლების შემდეგ, ოქროს მედლებსაც თუ დაეუფლება ნიუ ვიჟენი და დუბლს თუ შეასრულებს, ამას მომაალი გვიჩვენებს. მანამდე კი სჯობს, თანმიმდევრობას მივყვეთ.

ჯორჯიანსელებმა სტარტზევე გამოაჩინეს ბრჭყალები. ვახტანგ კეკელიას თავური დარტყმა მიზანს ასცდა, მაგრამ მალევე, მე-4 წუთზე, კეკელიას გამჭოლი პასი ნიკოლოზ გაბრიჩიძემ გოლად აქცია, 1:0. პსპ უმალ შეეცადა ეპასუხა, მაგრამ მელტონ ახალაიას გასროლა კარს მცირედით ასცდა. ფარმაცევტებმა მეტოქეზე ზეწოლა გააძლიერეს. ჯორჯიანსელები დაცვაში არ ჩამჯდარან, მაგრამ, უმეტესად საკუთარი კარის უსაფრთხოებაზე გააკეთეს აქცენტი. პსპ-ს ბარე ხუთჯერ შეეძლო გატანა, მაგრამ ნიუ ვიჟენის მეკარე ბექა ტყემალაძემ რთული დარტყმები მოიგერია. ჯორჯიანსელებმა პრესინგი ცენტრში გადაიტანეს და ამით მეტოქის იერიშებს სიმწვავე მოაკლეს. ნიუ ვიჟენმა ამით მეტად იხეირა - მე-17 წუთზე კეკელიას დარტყმისას პსპ-ს კიპერმა ნიკოლოზ ფხაკაძემ ბურთი მოიგერია, დამატებაზე ირაკლი თოდუამ ყველას დაასწრო და სხვაობა გააორმაგა, 2:0.

მეორე ტაიმიც სწრაფ ტემპში, ორმხრივი შეტევებით დაიწყო. ფარმაცევტებმა ვერა, მაგრამ ჯორჯიანსელებმა კუთვნილი შანსი გამოიყენეს. 22-ე წუთზე გაბრიჩიძის გადაცემით, კეკელიამ მახვილი კუთხიდან გაიტანა და ანგარიში კიდევ გაზარდა, 3:0. ფარმაცევტები გაბრაზდნენ და მეტოქეზე ზეწოლა გააძლიერეს. მათ ხუთი მოთამაშით შეუტიეს და ამან შედეგი გამოიღო. 35-ე წუთზე ლუკა ჯოლოხავამ ანგარიში შეამცირა, 3:1. პსპ-ს ანგარიშის გასათანაბრებლად ხუთწუთნახევარი ჰქონდა, მაგრამ... ნიუ ვიჟენმა მეტოქეს წუთში უპასუხა, დავით ხეჩიკაშვილის წაქცევისთვის დანიშნული პენალტი, ვახტანგ ჯვარაშვილმა გოლად აქცია, 4:1. ამით ფარმაცევტების მდგომარეობა თითქმის უიმედო გახდა, რადგან მატჩის გადასარჩენად მათ მხოლოდ ოთხ წუთზე მეტი დარჩათ. ჯორჯიანსელებმა იერიშები გაგრძელეს, ბოლო წუთზე თოდუამ დუბლი მიითვალა და საბოლოო ანგარიში დააფიქსირა, 5:1.