ნიუ ვიჟენ ჯორჯიანსმა ფლეი ოფის ფინალურ სერიაში, შარშანდელივით, ზედიზედ სამი მატჩი მოიგო და მესამედ მოიპოვა ჩემპიონის ტიტული. ერთი შეხედვით ეს იოლია, მაგრამ... იოლი გასეირნების ნაცვლად, ეს ნამდვილად რთული და ხანგრძლივი გზა იყო, რომელიც ავთანდილ ასათიანის ბიჭებმა ღირსეულად გაიარეს და მათი ტრიუმფი სრულიად დამსახურებულია.

სჯობს თანმიმდევრობას მიყვეთ და ფინალური სერიის მესამე მატჩი მიმოვიხილოთ. შეხვედრა სწრაფ ტემპში დაიწყო და მოწინააღმდეგეებმა ფინალის საკადრისი დრამატული სანახაობა შემოგვთავაზეს. ანგარიშის გახსნა გვარიანად დაგვიანდა, რაც ორივე გუნდის მეკარის დამსახურებაა. მატჩი პსპ-ს აქტიურობით დაიწყო, მერე ჯორჯიანსელები დაეფლნენ თამაშის სადავეებს და შეხვედრა გარდამავალი უპირატესობებით გაილია. შესაბამისად, ორივე კართან არაერთი საგოლე მომენტი შეიქმნა. ჯორჯიანსელთა გასროლებს, მელტონ ახალაიამ,  ნიკოლოზ კურტანიძემ და მიხეილ თევზაძემ უპასუხეს. თევზაძის დარტყმისას ჯორჯიანსელთა კარი ძელმა იხსნა. ორივე გუნდმა მოამწიფა გოლი და ნაყოფიც ორივემ მიიღო. მე-17 წუთზე რონინიოს დარტყმა, პსპ-ს მეკარე ნიკოლოზ ფხაკაძემ ძელის დახმარებით მოიგერია, დასწრებაზე ნიკოლოზ გაბრიჩიძემ იმარჯვა და ანგარიში გახსნა, 1:0. ფარმაცევტებმა მეტოქეს ორ წუთში უპასუხეს - მე-19 წუთზე თევზაძემ ბოლომდე იბრძოლა, რომელსაც ნიკოლოზ კურტანიძე მიეშველა და ზუსტი დარტყმით წონასწორობა აღადგინა.

მეორე ტაიმიც პსპ-ს შეტევებით დაიწყო, რამაც შედეგი მალევე გამოიღო. 22-ე წუთზე ახალაიას წამოწყებული შეტევა კურტანიძემ გააგრძელა, ბოლომდე იბრძოლა და მისი გამჭოლი პასით, ლევან სვანიძემ პსპ წინ გაიყვანა, 1:2. ამის შემდეგ მოედანზე კიდევ უფრო დრამატული ბრძოლა გაჩაღდა და ყოველივე ამის სიტყვებით გადმოცემა ძნელია. საგოლე მომენტი ხან ერთ და ხანაც მეორე კართან იქმნებოდა, მაგრამ ანგარიში მხოლოდ ბოლო 4 წუთში შეიცვალა, თანაც არაერთხელ.  36-ე წუთზე კეკელიამ გაბრიჩიძე მოძებნა, რომელმაც რონიონიოს უპასა და ბრაზილიელმა ანგარიში გაათანაბრა, 2:2. ორმხრივი შეტევები გაგრძელდა და 39-ე წუთზე რონიონიომ ჯორჯიანსელთა დაწინაურება შეძლო, მის მიერ დარტყმული ბურთი რიკოშეტით პსპ-ს კარის ბადეში აღმოჩნდა, 3:2. ფარმაცევტებს წუთნახევარი ჰქონდათ გასათანაბრებლად და მათ მეკარიანად შეუტიეს. თუმცა, კოპლატაძისა და სვანიძის დარტყმებს შედეგი არ მოჰყოლია, ნიუ ვიჟენმა კი თავისი შანსი გამოიყენა - მე-40 წუთზე რონიონიომ საკუთარი საჯარიმოს სიახლოვეს მოიპოვა ბურთი და საბოლოო ანგარიში დააფიქსირა, 4:2. ნიუ ვიჟენ ჯორჯიანსს კიდევ ერთი წარმატებული სეზონი ჰქონდა - თასი დაიბრუნა და ჩემპიონობა შეინარჩუნა.

მატჩის დასრულების შემდეგ, სეზონის რჩეულებს შესაბამისი პრიზები გადასცეს, რომელთა ჩამონათვალი ასეთია:

საუკეთესო მეკარე - ვახტანგ ტერუნაშვილი (არმია)

საუკეთესო მცველი - შოთა თოფურია (ნიუ ვიჟენ ჯორჯიანსი)

საუკეთესო უნივერსალი - ირაკლი თოდუა (ნიუ ვიჟენ ჯორჯიანსი)

საუკეთესო თავდამსხმელი - ოთარ ბერეჩიკიძე (არმია)

საუკეთესო ბომბარდირი - ვახტანგ ჯვარაშვილი (30 გოლი; ნიუ ვიჟენ ჯორჯიანსი)

საუკეთესო მწვრთნელი - ავთანდილ ასათიანი (ნიუ ვიჟენ ჯორჯიანსი)

საუკეთესო ფეხბურთელი - გიორგი ჩიმაკაძე (თსუ)

ბოლოს, ფუტსალის ლიგის 2023-24 წლების სეზონის ტრიუმფატორი ნიუ ვიჟენ ჯორჯიანსი, ჩემპიონის თასითა და მედლებით დააჯილდოვეს.