ნიუ ვიჟენ ჯორჯიანს ჩემპიონობამდე ერთი მოგება დარჩა
![](https://geofutsal.ge/image/catalog/topu.jpeg)
ფლეი ოფის ფინალურ სერიაში, ნიუ ვიჟენ ჯორჯიანსმა ზედიზედ მეორე მატჩში იმარჯვა. ავთანდილ ასათიანის ბიჭები შარშანდელი ტრიუმფის (სამივე თამაში მოიგეს) გამეორებასთან ახლოს არიან და ჩემპიონობასთან ერთი მოგება აშორებთ. შეძლებენ თუ არა ისინი იგივეს გაკეთებას, ამას მომავალი გვიჩვენებს, მანამდე კი მეორე მატჩი მიმოვიხილოთ.
თავიდანვე უნდა აღინიშნოს, რომ პსპ მეორე შეხვედრაში უკეთ წარმოჩნდა და დიდი იყო შანსი, გამარჯვებული ორ ძირითად ტაიმში არ გამოვლენიყო. თამაში, რომელიც სწრაფ ტემპში დაიწყო, დრამატული და სანახაობრივად მდიდარი გამოდგა. პირველივე წუთზე ნიკოლოზ გაბრიჩიძის ძლიერად დარტყმისას, ნიუ ვიჟენი სწრაფი გოლით დაწინაურდა, 0:1. ფარმაცევტები გაცხარდნენ, თამაშის სადავეებს დაეუფლნენ და წონასწორობას აღდგენას შეეცადნენ. ნიკოლოზ კოპლატაძის გასროლა მცირედით ასცდა მიზანს. მელტონ ახალაიას და ნიკოლოზ კურტანიძის დარტყმებს ჯორჯიანსელთა მეკარე ბექა ტყემალაძე გადაეფარა. ნიუ ვიჟენიც არ ყოფილა უქმად, რონინიოს დარტყმას შედეგი არ მოჰყოლია. მე-12 წუთზე დავით ხეჩიკაშვილმა ორი მეტოქე ჩამოიცილა და ბურთს ბადეში მიუჩინა ადგილი, მაგრამ მსაჯებს მასზე ჯარიმა დააფიქსირეს და გოლი არ ჩაითვალა. თუმცა, ჯორჯიანსელებმა ოთხიოდე წუთში ანგარიში მაინც გაზარდეს. შოთა თოფურიას წამოწყებული იერიში, გაბრიჩიძემ გააგრძელა და ვახტანგ კეკელიამ დააგვირგვინა, 0:2. ორიოდე წუთში ჭუმბურიძის პასით კეკელიამ დუბლი მიითვალა და ანგარიშს სოლიდური სახე მისცა, 0:3. ფარმაცევტებს 3-ბურთიანი ჩამორჩენის გასაბათილებად სრული მეორე ტაიმი ჰქონდათ. მათ ცდა და მონდომება არ დააკლეს, მაგრამ დამაგვირგვინებელ ფაზაში სიზუსტე აკლდათ და გოლი დაუგვიანდათ. 29-ე წუთზე ლევან სვანიძემ ეფექტური ცხრიანით ერთი ბურთი გაქვითა, 1:3. ორიოდე წუთში, გიორგი აფციაურმის საჯარიმო დარტყმისას, ლევან სარდანაშვილის ქუსლით დარტყმული მეკარე ტყემალაძემ მოიგერია, მაგრამ დამატებაზე სარდანაშვილმა მაინც გაიტანა და ანგარიშში სხვაობა მინიმუმამდე შეამცირა, 2:3. ფარმაცევტები ქამბექს მიუახლოვდნენ და ამის გაკეთება მეტად მოინდომეს, ჯორჯიანსელები ფორის გაზრდას შეეცადნენ და თამაშმა უფრო დინამიური ხასიათი მიიღო. მატჩის დასრულებამდე 3 წუთით ადრე, ფარმაცევტებმა გაფრთხილებები ლიმიტი ამოწურეს, მაგრამ ნიუ ვიჟენმა პენალტის გარეშე გაიტანა. პსპ-ს მეკარე ფხაკაძემ, ხეჩიკაშვილის ორი რთული ბურთი მოიგერია, მაგრამ მე-40 წუთზე ხეჩიკაშვილმა მაინც შეძლო და მატჩის საბოლოო ანგარიში დააფიქსირა, ჯორჯიანსელებმა 2:3 იმარჯვეს. ფინალური სერიის მესამე შეხვედრა (რომელშიც შესაძლოა ჩემპიონის ვინაობა გაირკვეს) არენა-2-ის დარბაზში, 11 ივნისს 18 საათზე დაიწყება.