ოთხი მატჩი ფრის გარეშე და ჯამში 31 გოლი, რაც საშუალოდ ერთ შეხვედრაში თითქმის 8 გოლის ტოლფასია და ჩინებული მაჩვენებელია. ნიუ ვიჟენ ჯორჯიანსის, არმიასა და კსუ-ს დამაჯერებელი სტარტი და დიდი მოულოდნელობა დინამო თბილისის ავტორობით... ასეთი გახლავთ ახალი სეზონის სასტატო ტურის მოკლე რეზიუმე. უფრო დეტალურად კი თანმიმდევრობას მივყვეთ...

გასული სეზონის ტრიუმფატორმა, თასის მფლობელმა და ჩემპიონმა ნიუ ვიჟენ ჯორჯიანსმა, ახალი ჩემპიონატი ომახიანად დაიწყო. ავთანდილ ასათიანის ბიჭები, სასტარტო ტურში UG-წალენჯიხას დაუპირისპირდნენ და დიდი სხვაობით, 7:2 იმარჯვეს. ამ შეხვედრაში ორი ჰეთ თრიკი და ერთი დუბლი შეასრულა. დუბლის ავტორი, UG-წალენჯიხადან ვაჟა კვარაცხელია გახლდათ. ჯორჯიანსელთაგან, პირველი დუბლი, გასული სეზონის ბომბარდირმა ვახტანგ ჯვარაშვილმა შეასრულა, მეორე კი ახალწვეულმა ბრაზილიელმა იტალო ფსილიომ მიითვალა და საქართველოს ფუტსალის უმთავრეს ლიგაში დებიუტი 3 გოლით აღნიშნა. ნიუ ვიჟენიდან კიდევ ერთი ბურთი, დავით ხეჩიკაშვილმა გაიტანა და ახალ სეზონში გოლების აქტივი გახსნა.

წინა სეზონის ფინალისტი პსპ ლიგის დებიუტანტ დინამო თბილისთან დამარცხდა და ეს ფაქტი სენსაცია თუ არა, მოულოდნელობა ნამდვილად იყო. დინამოელები, ლაშა-გიორგი ობოლაძის კურიოზული გოლით დაწინაურდნენ, რასაც პსპ-ს კარში გიორგი გაზდელიანის ისევ კურიოზული, ამჯერად ავტოგოლი მოჰყვა, 0:2. პსპ მალევე დაბრუნდა თამაშში, ჯერ ლუკა ჯოლოხავამ მინიმუმამდე შეამცირა სხვაობა, მერე კი გიორგი ქურხულმა წონასწორობა აღადგინა, 2:2. მეორე ტაიმში დავით ხუბუტიამ დინამო დააწინაურა, მაგრამ ოთხ წუთში მიხეილ თევზაძემ ანგარიში გაათანაბრა, 3:3. თამაშის ბედი ბოლო სამ წუთში გადაწყდა. ჯერ იყო და დავით ხუბუტიამ მეორეც გაიტანა და დინამოელები კიდევ ერთხელ წინ გაიყვანა. ბოლოს კი მოთამაშე-მწვრთნელმა კახაბერ მაისაიამ საბოლოო ანგარიში, 3:5 დააფიქსირა. დინამო თბილისმა ჩემპიონატის ერთ-ერთი ფავორიტის ძლევით, რიხიანი განაცხადი გააკეთა.

ორი გუნდის გაერთიანებისგან წარმომდგარ ბეტის თბილისს, მრისხანე არმია ერგო მეტოქედ. ლადო ბურდულის ბიჭებმა მოწინააღმდეგე 10:0 გააცამტვერეს. არმიელთა გოლების ფოიერვერკი ოთარ ბერეჩიკიძემ დაიწყო და მანვე, ჰეთ თრიკით დაასრულა. გიორგი ქურდაძემ და შაკო ცირამუამ დუბლები მითვალეს. გიორგი სილაგავა, თამაზ გოგსაძემ და გურამ ხაჭაპურიძემ თითი ბურთი გაიტანეს.

კსუ-თსუ-ს სტუდენტურ დერბიში კავკასიელებმა იმარჯვეს. თუმცა, მატჩის პირველი ნახევარი უგოლოდ დასრულდა. ზურაბ ლუკავამ, ნოდარ ქურცაძემ, გიორგი ჩიმაკაძემ (ყოფილ გუნდს გაუტანა) და საბა ტყეშელაშვილმა თითო ბურთი გაიტანეს. თსუ-ს ერთი ბურთის გაქვითვა შეეძლო, მაგრამ გიორგი ხაბალაევმა პენალტი ვერ გამოიყენა და კსუ-მ 4:0 მოიგო.

მომდევნო ტური, რომელიც 10 ოქტომბერს გაიმართება, არანაკლებ დაძაბული იქნება. UG-წალენჯიხას თსუ-ს დაუხვდება, ბეტის თბილისი კსუ-ს მიიღებს, დინამო თბილისი არმიას დაუპირისპირდება, ნიუ ვიჟენ ჯორჯიანსი კი პსპ-ს შეეჭიდება.