ფუტსალის უმთავრეს ლიგაში მეორე ტურის შემდეგ, ლიდერობა სამეულს დარჩა. მოქმედმა ჩეპიონმა ნიუ ვიჟენ ჯორჯიანსმა, არმიამ და კსუ-მ ზედიზედ მეორედ იმარჯვეს და ცხრილს დამსახურებულად ლიდერობენ. ძალზე უჩვეულოა ის, რომ გასულ სეზონში, ჩემპიონობის სერიის ფინალისტი პსპ ისევ უქულოდაა და ბოლოსწინა ადგილზე იმყოფება...

ბეტის თბილისთან კსუ სტუმრის რანგში იყო, მაგრამ ამ ფაქტორს სტუდენტების ძლევამოსილი გამარჯვებისთვის ხელი არ შეუშლია. 8 უპასუხო ბურთის გატანით, კავკასიელებმა პირწმიდად დაჯაბნეს მეტოქე. მათ პირველ ნახევარში 5, მეორე ტაიმში კი 3 გოლი გაიტანეს. საბა მაჩიტიძემ, ნიკა მანგოშვილმა და საბა ტყეშელაშვილმა დუბლები მიითვალეს. ბექა გოგსაძე და ზურაბ ლუკავა კი თითო გოლს დასჯერდნენ. კსუ-ს 6 ქულა აქვს და ლიდერთა ტრიოში მეორე საფეხურზეა. ახალბედებით დაკომპლექტებული ბეტის თბილისი ბოლო საფეხურზეა.

ნიუ ვიჟენ ჯორჯიანსა ბრაზილიური გოლებით სძლია პსპ-ს. ფარმაცევტებს, ახალწვეულმა იტალო ბსილიომ, პირველი და დასკვნითი გოლი გაუტანა და ორ მატჩში გატანილი 5 გოლით ბომბარდირთა ცხრილში გალიდერდა. ბსილიოს დუბლს, რონინიომ და დავით ხეჩიკაშვილმა თითო გოლი შეაშველეს. გიორგი ქურხულმა შესვენებამდე ერთი გოლი გაქვითა და ტაიმიც 4:1 დასრულდა. პსპ-მ მეორე ტაიმი კი მოიგო, მაგრამ საბოლოო გამარჯვებისთვის ეს საკმარისი არ აღმოჩნდა. ქურხულმა კიდევ ერთის გატანით, დუბლი ჩაიწერა. მას ჰეთ თრიკის შესრულებაც შეეძლო, მაგრამ პენალტი ვერ გამოიყენა... საბოლოოდ ჯორჯიანსელებმა 4:2 იმარჯვეს და 6 ქულით მოწინავე სამეულში მესამე საფეხურზე არიან. პსპ ისევ უქულოდაა და ჯერჯერობით ბოლოსწინა ადგილზეა.

წარმატებული დებიუტი შემდეგ, დინამო თბილისი მეორე მატჩსაც იგებდა. მე-8 წუთზე ლაშა-გიორგი ობოლაძემ ანგარიში გახსნა, 1:0. თუმცა, არმიელებმა იძალეს და 10 წუთში შაკო ცირამუამ წონასწორობა აღადგინა, 1:1. ლადო ბურდულის ბიჭები ამას არ დასჯერდნენ და შესვენების შემდეგ, თამაზ გოგსაძემ, 25 წუთზე არმია წინ გაიყვანა, 1:2. კიდევ 6 წუთში კი შაკო ცირამუამ საბოლოო ანგარიში დააფიქსირა, 1:3. არმია 6 ქულით კვლავ ცხრილის სათავეშია, დინამოელები ი 3 ქულით მე-4 ადგილზე არიან.

მეორე ტური UG-წალენჯიხასა და თსუ-ს მატჩით დასრულდა. აქამდე, ორივე ეს გუნდი უქულოდ იყო და მეტოქეები პირველი ქულებისთვის შეებნენ ერთურთს. UG-წალენჯიხა უნივერსიტეტელებს ორჯერ უგებდა, მაგრამ... პირველი ტაიმის ნახევარმა უგოლოდ ჩაიარა და მე-12 წუთზე იური ჩანგელიამ ანგარიში გახსნა, 1:0. ამას თსუ-მ სამიოდე წუთში ალექსანდრე ორაგველიძის გოლით უპასუხა, 1:1. შესვენებამდე წუთნახევრით ადრე, ლუკა ელიზბარაშვილმა UG-წალენჯიხა ისევ წინ გაიყვანა, 2:1. მეორე ტაიმის სტარტზეც UG-წალენჯიხამ იხეირა, 25-ე წუთზე ლუკა ელიზბარაშვილმა კუთხურიდან მიღებული ბურთი შეუჩერებლად კარში გადაგზავნა. ბურთი ტკაჩოვს მოხვდა, მცირედით შეიცვალა მიმართულება, მაგრამ გოლი საკმაოდ ეფექტური გამოვიდა, 3:1. თსუ გაცხარდა, სტუდენტებმა ქამბექი ჩაიფიქრეს და ეს შეძლეს კიდეც. 39-ე წუთში მელტონ ახალაიამ სხვაობა მინიმუმამდე შეამცირა. მატჩის დარულებამდე ოციოდე წამით ადრე, ორაგველიძემ მეორედაც გაიტანა. მატჩი ფრედ, 3:3 დასრულდა, მეტოქეებმა პირველი თითო ქულა მოიპოვეს და მეხუთე-მეექვსე ადგილებს იყოფენ.

მომდევნო ხუთშაბათს მესამე ტურის მატჩები გაიმართება. პსპ UG-წალენჯიხა-ს დაუხვდება, თსუ ბეტის თბილისს მიიღებს. განსაკუთრებით დაძაბულობას არმიასა და ნიუ ვიჟენ ჯორჯიანსის დაპირისპირებაში უნდა ველოდოთ. არანაკლებ დაძაბული იქნება კსუ-სა და დინამო თბილისის მატჩი.