ფუტსალის უმთავრესი ლიგის მესამე ტურმა, ცხრილში ტრიოს ჰეგემონია დაამხო და ერთპიროვნული ლიდერიც გამოიკვეთა - კსუ უდანაკარგოა და ცხრილსაც დამსახურებულად ჩაუდგა სათავეში. პსპ-მ და თსუ-მ სეზონის პირველი გამარჯვებები იზეიმეს. არმიელებმა და მოქმედმა ჩემპონმა ნიუ ვიჟენ ჯორჯიანსმა პირველი ფრე ითამაშეს. აი, ასეთია ამ ტურის მოკლე რეზიუმე, დეტალური მიმოხილვისას თანმიდევრობას მივყვეთ.

ტური, ცენტრალურ მატჩად მიჩნეულ, არმიასა და ნიუ ვიჟენ ჯორჯიანსის დაპირისპირებით გაიხსნა. არმიელები სწრaაფი გოლით დაწინაურდნენ - მე-2 წუთზე შაკო ცირამუამ, ბრაზილიელ ვილიან სოუზას მოპარა ბურთი და ანგარიში გახსნა, 1:0. წუთიც არ იყო გასული და ბრაზილიური გოლი ვიხილეთ - იტალო ბსილიომ, რონინიოსგან მიღებულ ბურთს, შეუჩერებელი დარტყმით, არმიელთა კარის ბადეში მიუჩინა ადგილი, 1:1. თამაში უფრო საინტერესოდ გაგრძელდა. არმიელთა იერიშებში მეკარე ვახტანგ ტერუნაშვილიც ჩაერთო და ამან შედეგი მოიტანა. მე-9 წუთზე, ტერუნაშვილმა ცირამუას საჯარიმოში გამჭოლი გადაცემა გაუკეთა, მაგრამ ბურთი მალხაზ მურცხვალაძეს მოხდა და ავტოგოლით არმია დაწინაურდა, 2:1. სამიოდე წუთში, ტერუნაშვილის შეტევაში ჩართვა არმიელებს უკვე ძვირად დაუჯდათ. ჯორჯიანსელებმა მეტოქის იერიში ჩაჭრეს და საკუთარი საჯარიმოს ხაზიდან, იტალო ფსილიომ მეორე ბურთი გაიტანა, ანგარიში კიდევ ერთხელ გაათანაბრა (2:2) და ბომბარდირთა ცხრილში 7 გოლით კვლავ პირველზეა. ტაიმის დასრულებამდე 8 წუთით ადრე, ნიუ ვიჟენმა ჯარიმების ლიმიტი ამოწურა, დიდი შანსი იყო არმიელებს პენალტი მოეპოვებინათ და წი გასულიყვნენ, მაგრამ პირიქთ მოხდა. მე-18 წუთზე ვილიან სოუზამ, შორეული დარტყმით, ქართული კარიერის პირველი გოლი გაიტანა და ჯორჯიანსელები დაწინაურდნენ, 2:3. პირველისგან განსხვავებით, მეორე ტაიმი გოლუხვი არ გამოდგა. მეტოქეებს არაერთის გატანა შეეძლოთ, მაგრამ ერთადერთ გოლი გავიდა. მეკარე ტერუნაშვილის მიერ წამოწყებული შეტევა, ცირამუმ გოლით დააგვირგვინა, 3:3. არმიამ და ჯორჯიანსელებმა ამ სეზონის პირველი ფრე ითამაშეს და 7-7 ქულით, შესაბამისად მეორე და მესამე ადგილზე არიან.

კსუ-სა და დინამო თბილისის დაპირისპირებშიც სასტარტო წუთებზე გავიდა გოლები. ჯერ იყო და მე-2 წუთზე გიორგი ჩიმაკაძემ მახვილი კუთხიდან გახსნა ანგარიში, 1:0. ზუსტად წუთში თეიმურაზ ექიზაშვილმა წონასწორობა აღადგინა, 1:1. კავკასიელები კვლავ დაწინაურებას შეეცადნენ და მათმა მონდომებამ შედეგი გამოიღო. მე-8 წუთზე, კუთხურიდან მიღებული ბურთი, ჩიმაკაძემ კარში გადაგზავნა, 2:1. მეორე ტაიმიც ორმხრივი შეტევებით წარიმართა. კავკასიელთა შეტევებში, ეპიზოდურად მეკარე ალი ასლანიც ერთვებოდა, რითაც 25-ე წუთზე დინამოელებმა იხეირეს. მათ კსუ-ს იერიში ჩაჭრეს და გაიოზ ლაგაზაშვილმა ანგარიში გაათანაბრა, 2:2.  კავკასიელები გაცხარდნენ და მეტოქეზე ზეწოლა გააძლიერეს. შედეგად, 30-ე წუთზე დინამოელებმა ჯარიმების ლიმიტი ამოწურეს და დარჩენილ 10 წუთში, მათი მხრიდან მორიგი ჯარიმა, კსუ-ს პენალტს ნიშნავდა. რაოდენ გასაოცარიც არ უნდა იყოს, კავკასიელებმა სამჯერ მიიღეს პენალტის შესრულების უფლება. პირველი და მეორე 10-მეტრიანი უშედეგოდ შეასრულეს და მატჩის ფრედ დასრულებას ხუთიოდე წამი აკლდა, როცა სტუდენტებს მეკარე ალი ასლანი მოევლინათ მხსნელად. კავკასიელთა კიპერმა პენალტი გაიტანა და კსუ ერთპიროვნული ლიდერი გახადა, დინამო თბილისი კი 3 ქულით მეხუთე საფეხურზეა.

თსუ-მ ახალბედა ფეხბურთელებით დაკომპლექტებულ ბეტის თბილისს შანსი არ დაუტოვა, დიდი ანგარიშით 6:1 მოიგო და ამ სეზონის პირველი გამარჯვება იზეიმა. დავით კეფაშვილის ბიჭებმა მეტოქეს, თითო ტაიმში 3-3 გოლი გაუტანეს. ალექსანდრე ორაგველიძემ დუბლი მიითვალა. ნოდარ ქურცაძემ, გიორგი ხაბალაევმა, რომან კუხიანიძემ და ალექსი ტკაჩოვმა თითო ბურთის გატანა იკმარეს. თბილისი ბეტისიდან პრესტიჟის გოლი გიორგი მანაგაძის ანგარიშზეა. ამ მოგებით თსუ-მ 4 ქულა დააგროვა და მე-4 ადგილზეა, უქულო ბეტის თბილისი კვლავ ბოლო საფეხურზეა.

პსპ-სა და UG-წალენჯიხას მატჩში, პირველი ტაიმი უგოლოდ იწურებოდა, მაგრამ ბოლო 2 წუთში 3 გოლი გავიდა. სპარტაკ ლომიძის გოლით სტუდენტები დაწინაურდნენ (0:1), მაგრამ ფარმაცევტებმა ქამბექი შეასრულეს. 40 წამში ნიკოლოზ კურტანიძემ წონასწორობა აღადგინა, 1:1. კიდევ წუთში კი გიორგი ექსეულიძე პსპ წინ გაიყვანა, 2:1. მეორე ტაიმის სტარტზე ლევან სარდანაშვილმა ფარმაცევტების ფორა გააორმაგა, 3:1. ოთხ წუთში ალექსანდრე ღვინჯილიამ სხვაობა მინიმუმამდე შეამცირა (3:2) და დარჩენილ დროში აღარაფერი შეცვლილა. პსპ-მ ამ სეზონში პირველად მოიგო და 3 ქულით მე-6 ადგილზეა. ერთი ქულის მქონე UG-წალენჯიხა კი მომდევნო, მე-7 საფეხურზეა.