ორი უმთავრესი მატჩიდან ერთი შედგა, ერთი კი გადაიდო. ფუტსალის უმთავრესი ლიგის მე-4 ტურში, მოქმედ ჩემპიონ ნიუ ვიჟენ ჯორჯიანსისა და წინა ტურის ლიდერ კსუ-ს დაპირისპირება, ჯორჯიანსელთა მიერ ჩემპიონთა ლიგაზე ასპარეზობის გამო გადაიდო. ბეტის თბილისმა პირველი გამარჯვება იზეიმა და 4 ტურის შემდეგ ცხრილში უქულოდ აღარავინაა. თსუ-მ დინამო თბილისს სოლიდური სხვაობით მოუგო. არმიამ კი პსპ-ს სძლია და ცხრილში პირველობა დაიბრუნა. ასეთია მეოთხე ტურის მოკლე რეზიუმე, დეტალური მიმოხილვისთვის თანმიმდევრობას მივყვეთ.

სამი ტურის მქონე ბეტის თბილისი, პირველი ქულების მოსაპოვებლად, ცხრილის მეზობელ UG-წალენჯიხას შეეჭიდა. წალენჯიხელთა უპირატესობა მალე გამოიკვეთა და მათ გოლის გატანის ორი რეალური შანსი ჰქონდათ, მაგრამ ბეტისელები ერთხელ ძელმა, მეორედ კი მეკარემ იხსნა. ბეტისელებმა კონტრშეტევები გაამწვავეს და ამან შედეგიც გამოიღო. მე-16 წუთზე გიორგი მანაგაძემ გახსნა ანგარიში, ორიოდე წუთში კი დუბლი შეასრულა (0:2) და ბეტის თბილისი შესვენებაზე ორბურთიანი ფორით გავიდა. 24-ე წუთზე ლუკა ელიზბარაშვილმა საჯარიმო დარტყმით მინიმუმამდე შეამცირა ანგარიშში სხვაობა, 1:2. UG-წალენჯიხამ მეტოქეზე ზეწოლა გააძლიერა და შედეგად ის მიიღო, რომ მატჩის დასრულებამდე 14 წუთით ადრე, ბეტისელებმა ჯარიმების ლიმიტი ამოწურეს. 28-ე წუთზე UG-ს ანგარიშის გათანაბრების შანსი მიეცა, მაგრამ სპარტაკ ლომიძის პენალტისას, ბეტისელთა მეკარე თეიმურაზ გაბეხაძემ ბურთი კუთხურზე მოიგერია. UG-მ იერიშები გააგრძელა, მაგრამ ბეტისელებმა მეტოქე შეავიწროვეს და 36-ე წუთზე გურამ ჩალიგავას ავტოგოლით ფორა გაიორმაგეს, 1:3. UG-წალენჯიხა-ს კიდევ მიეცა პენალტით გატანის შანსი, მაგრამ ბეტისელთა მეკარე გაბეხაძემ ამჯერად ვაჟა კვარაცხელიას დარტყმული მოიგერია. ბოლო წუთზე ბეტისს შეეძლო პენალტით გატანა, მაგრამ გიორგი კურტანიძის დარტყმული უშედეგო აღმოჩნდა. ამ მოგებით ბეტის თბილისმა პირველი ქულები მოიპოვა, რაც უპირველესად მეკარე გაბეხაძის დამსახურებაა, რომელმაც ორი პენალტი და საკმაოდ ბევრი დარტყმა მოიგერია. ბეტისელებმა UG-წალენჯიხა-ს ადგილი გაუცვალეს და ახლა მე-7 საფეხურზე არიან.

ორივე კართან არაერთი საგოლე მომენტის მიუხედავად დინამო თბილისსა და თსუ-ს დაპირისპირების პირველი ტაიმი უგოლოდ დასრულდა, მეორე ნახევარი კი უხვგოლიანი აღმოჩნდა. 22-ე წუთზე მელტონ ახალაიამ გახსნა ანგარიში, 0:1. წუთში გიორგი ხაბალაევმა სხვაობა გააორმაგა, 0:2. დინამოელებმა მეკარიანად შეუტიეს, რითაც კარგად ისარგებლეს სტუდენტებმა - 29-ე წუთზე ლაშა ერქომაიშვილმა დინამოელთა იერიში ჩაჭრა და შორეული ზუსტი დარტყმით, ფორა გაზარდა, 0:3. ორიოდე წუთში ზურაბ ღვინჯილიამ თავისსავე დაწყებული შეტევა გოლით დაგვირგვინა, 1:3. გავიდა კიდევ ორი წუთი და ახალაიამ პენალტით დუბლი შეასრულა, 1:4. კიდევ წუთში ღვინჯილიას ავტოგოლით, თსუ-ს ფორა კიდევ გაზარდა, 1:5. სტუდენტები ამას არ დასჯერდნენ - ალ;ექსანდრე ორაგველიძემ, ნიკოლოზ ბოლქვაძემ და რომან კუხიანიძემ კიდევ თითო ბურთი გაიტანეს, თსუ-მ საბოლოოდ 1:8 მოიგო და 7 ქულით მე-3 ადგილზეა. დინამოელები კი 3 ქულით მე-6 საფეხურზე დარჩნენ.

პსპ-სა და არმიის შეხვედრა ამ ტურის მთავარი მატჩი გახლდათ. გასული სეზონის საჩემპიონო სერიის ნახევარფინალში სწორედ ეს გუნდები დაუპირისპირდნენ ერთმანეთს... მაშინ, თითო მოგების შემდეგ, ფარმაცევტებმა იმარჯვეს და ფინალში გავიდნენ, სადაც ჯორჯიანსელებთან დამარცხდნენ. მიმდინარე სეზონში ცუდი სტარტის შემდეგ,  პსპ-მ გასულ ტურში პირველად მოიგო და ბუნებრივია ცხრილში პოზიციების გამყარებისთვის კვლავაც წარმატებისთვის იბრძოლებდა. იგივე მიზანი ჰქონდა არმიას, რომელმაც წინა ტურში ნიუ ვიჟენთან ფრე ითამაშა. ტურის ეს ცენტრალური მატჩი, არმიელებმა უკეთ დაიწყეს, მაგრამ ტაიმის შუაწელს ფარმაცევტებმა თამაში გაათანაბრეს. თუმცა, ორმხრივი შეტევების მიუხედავად 15 წუთი უგოლოდ გაილია.  მალევე ისევ არმიელებმა იძალეს და მე-17 წუთზე გიგა ბერაიამ ანგარიში გახსნა, 0:1.  პსმ ამას წუთში უპასუხა - გიორგი სიგუნავამ არმიელთა პასი ჩაჭრა და წონასწორობა აღადგინა 1:1. ცხარე ბრძოლა მეორე ტაიმშიც გაგრძელდა. 22-ე წუთზე მიხეილ თევზაძის მიერ კარში გაგზავნილი ბურთი, გიორგი თოლორდავამ, კარის ხაზიდან გამოიტანა. არმია გადარჩა და წუთში დაწინაურდა კიდეც - კუთხურიდან გიორგი ქურდაძის მოწოდებული ბურთს, ოთარ ბერეჩიკიძემ კარის ბადეში მიუჩინა ადგილი, 1:2. მატჩის დასრულებამდე 4 წუთით ადრე, ფარმაცევტებმა ჯარიმების ლიმიტი ამოწურეს და არმიას ორჯერ მიეცა ანგარიშში სხვაობის გაზრდის შანსი, მაგრამ არმიელებმა ვერ გამოიყენეს და ანგარიში აღარ შეცვლილა. არმიამ 1:2 იმარჯვა და 10 ქულით ცხრილს სათავეში ჩაუდგა, პსპ კი მე-5 საფეხურზეა.