მერვე ტური ცენტრალური მატჩით გაიხსნა და არანაკლებ გამორჩეული შეხვედრით დასრულდა. მოწინავე ოთხეულმა იმარჯვა და ამ კვარტეტში გუნდების პოზიციები არ შეცვლილა. ამ ტურში 42 გოლი გავიდა, რაც ამ სეზონში სარეკოდოა და საშუალოდ ერთ შეხვედრაში 10 გატანილ ბურთზე მეტია. 42 გოლიდან მესამედზე მეტი, 15 გოლი ნიუ ვიჟენ ჯორჯიანსმა გაიტანა, ეს მიმდინარე სეზონში აქამდე არ მომხდარა და ესეც სარეკორდოა. სტუდენტურ დერბიში კსუ-მა იმარჯვა, არმიამ დამაჯერებლად, ხოლო ნიუ ვიჟენ ჯორჯიანსმა ასტრონომიული სხვაობით მოიგო. დაძაბულ ბრძოლაში პსპ-მ რევანში აიღო და ცხრილში ზემოთ აინაცვლა. ეს იყო მოკლედ, მეტი კონკრეტულობისთვის, თანმიმდევრობას მივყვეთ.

ცენტრალურმა მატჩმა და მთლიანად ტურმა, ქომაგთა მოლოდინი სრულად გაამართლა. სტუდენტური დერბი კავკასიელებმა უფრო აქტიურად დაიწყეს და მე-4 წუთზე ჩიმაკაძის გამჭოლი პასი, ლუკავამ გოლად აქცია, 0:1. თსუ-მ პრესინგსაც მიმართა და შეტევებსაც სიმწვავე შემატა. მე-9 წუთზე ჩიმაკაძის პასით, მაჩიტიძეს შეეძლო ფორის გაორმაგება, მაგრამ ეს ვერ შეძლო. თსუ-მ მეტოქე მალევე დასაჯა: მე-10 წუთზე კუხიანიძის ჩინებული პასით ორაგველიძემ ანგარიში გაათანაბრა, 1:1. კავკასიელებმა მოწინააღმდეგეზე ზეწოლა გააძლიერეს და მე-13 წუთზე საჯარიმოში მანგოშვილის წაქცევისთვის, მოოვებული პენალტი მოიპოვა, კსუ-მ ვერ გამოიყენა. კავკასიელებმა ზეწოლა გააგრძელეს და მე-15 წუთზე ტყეშელაშვილმა შორეული დარტყმით კსუ წინ გაიყვანა, 1:2. კავკასიელებმა მეორე ტაიმი მწვავე შეტევებითა და პრესინგით დაიწყეს. თსუ თავს საიმედოდ იცავდა, პერიოდულად უტევდა კიდეც და შედეგიც მოიმკა. 28-ე წუთზე ტკაჩოვის პასით ქურცაძემ წონასწორობა აღადგინა, 2:2. კსუ გაბრაზდა, ჯერ 33-ე წუთზე მანგოშვილმა დააწინაურა თავისი გუნდი, 3 წუთში ჩიმაკაძემ ორბურთიანი ფორა შექმნა, 2:4. კავკასიელებმა ჯარიმების ლიმიტი ამოწურეს და თსუ-მ პენალტი მოიპოვა, მაგრამ ქურცაძის დარტყმული ბურთი, კსუ-ს მეკარე ალი ასლანმა მოიგერია. კავკასიელებმა მეტოქეზე ზეწოლა გააძლიერეს და ორჯერ იხეირეს. 37-ე ნიკა ხარატიშვილი, 39-ე წუთზე ბექა ბექაურმა თითო გოლი გაიტანეს. კსუ-მ დამაჯერებლად 2:6 იმარჯვა და მეორე ადგილზე დარჩა, თსუ კი ისევ მეოთხეა.

მოქმედმა ჩემპიონმა ამ სეზონის კიდევ ერთი რეკორდი დაამყარა - 15 გოლი ერთ მატჩში. მართალია, მე-2 წუთზე UG-წალენჯიხადან ჩალიგავამ გახსნა ანგარიში, მაგრამ ჯორჯიანსელებმა გოლების ფოირვერკით უპასუხეს. მათ პირველში 8, მეორეში 7 გოლი იზეიმეს და ასტრონომიული ანგარიშით, 4:15 გაიმარჯვეს. ნიკოლოზ გაბრიჩიძემ 5 ბურთი გაიტანა (ამ სეზონში პირველად) და ჯამში 10 გოლით ბომბარდირთა  ცხრილში მე-4 პოზიციაზე აინაცვლა. ბომბარდირთა სიას, 14 გოლით კვლავ იტალო ფსილიო ლიდერობს, რომელმაც ირაკლი თოდუას მსგავსად, ჰეთ თრიკი შეასრულა. თითო გოლი თოფურიამ, მურცხვალაძემ, ჯვარაშვილმა და ლაშა კურტანიძემ გაიტანეს. წალენჯიხელთაგად ჩემპიონს, ჩალიგავამ და კვარაცხელიამ თითო, ხარშილავამ კი ორი გოლით უპასუხეს. 22 ქულიანმა ნიუ ვიჟენ ჯორჯიანსმა ლიდერობა შეინარჩუნა, UG-წალენჯიხა 2 ქულით ისევ ბოლო საფეხურზეა.

ახალბედა ბეტის თბილისის წინააღმდეგ, არმია ფავორიტად იყო მიჩნეული და თამაშიც მოიგო კიდეც. ლადო ბურდულის ბიჭებმა თითო ტაიმში 3-3 გოლი გაუტანეს მეტოქე. ბეტისელებმა მხოლოდ თითო გატანილი ბურთით უპასუხეს. არმიელები სწრაფი გოლებით დაწინაურდნენ - შაკო ცირამუამ მეორე წუთზე გახსნა ანგარიში და ორ წუთში მეორედაც გაიტანა, 0:2. ბეტისელებმა წუთში უპასუხეს, ოთხოზორიამ ანგარიშში სხვაობა მინიმუმამდე შეამცირა. არმიამ ამას არ დასჯერდა, შეტევები გააგრძელა და მე-16 წუთზე თოლორდავამ ორბურთიანი სხვაობა აღადგინა, 1:3. მეორე ტაიმიც არმიელთა კარნახით დაიწყო და ეს ანგარიშშიც აისახა. ბექაურმა 24-ე, ხოლო ბერაიამ 25-ე წუთზე თითო გოლი გაიტანეს, რითაც გამარჯვებას მიუახლოვდნენ, 1:5. ბეტისელებმა ამას 3 წუთში, მანაგაძის გოლით უპასუხეს, 2:5. თუმცა, 36-ე წუთზე ფოფხაძემ მატჩის საბოლოო შედეგი დააფიქსირა, 2:6. ამ გამარჯვებითა და 19 ქულით არმია მესამე ადგილზე დარჩა, ბეტის თბილისი კი 3 ქულით მე-7 საფეხურზეა.

ანგარიშის ორჯერ გათანაბრების მიუხედავად, დინამო თბილისმა შეძლო და მრისხანე პსპ-სთან სენსაციური გამარჯვება მოიპოვა - ასეთი იყო სეზონის სასტარტო მატჩი. ამჯერად კი ფარმაცევტებმა დინამოელებზე რევანში აიღეს. ცხადია, მარცხიანი სტარტის შემდეგ პსპ უკვე ფორმაშია და ჩვეული მოწინავე პოზიციებისთვის იბრძოლეს. უნდა აღინიშნოს, რომ პსპ ერთადერთი გუნდია, რომელმაც მე-8 ტურში პოზიცია გაიუმჯობესა და ცხრილში მე-6-დან მე-5 ადგილზე აინაცვლა. საგულისხმოა ისიც, რომ ამ მატჩში პსპ-ს არა ბესიკ არველაძე, არამედ გივი კაციტაძე ხელმძღვანელობდა. ორიოდე სიტყვა თამაშზეც ვთქვათ. პსპ-მ მატჩის სტარტზევე გამოაჩინა ბრჭყალები, მეორე წუთზე სვანიძემ ფლანგზე სოლო რეიდი განახორციელა, მის დარტყმულს დინამოელთა მეკარე გადაეფარა, მაგრამ დამატებაზე ნიკოლოზ კურტანიძემ იმარჯვა და ანგარიში გახსნა, 0:1. ორიოდე წუთში კი კუთხურიდან მოწოდებული ბურთით ჯოლოხავამ ფორა გააორმაგა, 0:2. დინამოც არ ყოფილა უქმად, მათაც მწვავედ შეუტიეს, მაგრამ ფარმაცევტების ახალგაზრდა კიპერმა ლომაიამ არაერთხელ იხსნა კარი. თუმცა, მე-17 წუთზე ხუბუტიამ მეტოქის იერიში ჩაჭრა და სხვაობა მინიმუმამდე შეამცირა, 1:2. დინამო თბილისმა მეორე ტაიმი აქტიურად დაიწყო და 23-ე წუთზე მაღლაკელიძის გრძელი პასით ლაგაზაშვილმა წონასწორობა აღადგინა, 2:2. ფარმაცევტები გაცხარდნენ და წუთში სიგუნავას გამჭოლი პასით, ნიკოლოზ კურტანიძემ მეორედ გაიტანა და პსპ წინ გაიყვანა, 2:3. ამას დინამო 20 წამში უპასუხა და ჩინებული შეტევა მაღლაკელიძემ ამ მატჩში მესამედ გაათანაბრა ანგარიში, 3:3. დარჩენილ 15 წუთში ორივე გუნდს შეეძლო ანგარიშის შცვლა, მაგრამ ეს მხოლოდ ერთხელ მოხდა - 34-ე წუთზე ლევან სვანიძემ საჯარიმო დარტყმით მატჩს წერტილი დაუსვა. პსპ-მ 3:4 იმარჯვა, დინამოს ადგილი გაუცვალა და ახლა, მეოთხეზე მყოფ თსუ-ს მხოლოდ ქულით ჩამორჩება.

მომდევნო, მე-9 ტურის მატჩები 23 დეკემბერს გაიმართება. ასეთი დიდი პაუზა, ევროპის ჩემპიონატის მეინ რაუნდში, ფუტსალის ეროვნული ნაკრების სასტარტო მატჩებითაა გამოწვეული. საქართველოს ნაკრები 13 დეკემბერს კოსოვოს თბილისში უმასპინძლებს, 18 დეკემბერს კი საფრანგეთს სტუმრად ეთამაშება.