დასასრულს მიახლოებული წლის დასკვნითი და მიმდინარე სეზონის მეათე ტური, დაძაბული და საინტერესო გამოდგა. ამ ტურის შედეგებმა სატურნირო ცხრილში ცვლილებები განაპირობა, რაც ფუტსალის უმთავრესი ლიგის დონისა და ხარისხის მატების ნათელი დადასტურებაა. არმიელებმა აქამდე წაუგებელად მოასპარეზე, მოქმედი ჩემპიონი და ამ ტურამდე ცხრილის ლიდერი ნიუ ვიჟენ ჯორჯიანსი დაამარცხეს, მეორე საფეხურზე აღზევდნენ და ლიდერი შეცვალეს. კავკასიელებმა დინამო თბილისს სძლიეს და ზამთრის ჩემპიონები გახდნენ. პსპ-მ და თსუ-მ იმარჯვეს და მათ შორის სხვაობა 4 ქულა სტუდენტების სასარგებლოდ. ეს ტური იმითაც იყო აღსანიშნავი, რომ ყველა მატჩი, პირობითად, სტუმრებმა მოიგეს... და კიდევ ერთი, ეს მეკარეების ტური იყო, რადგან ფუტსალის უმთავრესი ლიგის ერთ ტურში ორი სხვადასხვა გუნდის მეკარის მიერ გატანილი 3 გოლი, ალბათ არავის გვახსენდება. ასეთია მეათე ტურის მოკლე რეზიუმე, დეტალური განხილვისთვის თანმიმდევრობას მივყვეთ.

ტური ცენტრალური მატჩით გაიხსნა. ნიუ ვიჟენ ჯორჯიანსისა და არმიას შორის, ამ სეზონის პირველი შეხვედრაში საბრძოლო ფრე (3:3) დაფიქსირდა, რაც ამ დერბის სიმწვავეს კიდევ უფრო ზრდიდა. ლადო ბურდულის ბიჭებმა მატჩის სტარტზევე გამოაჩინეს ბრჭყალები, მაგრამ თამაში ორმხივი შეტევებით წარიმართა. ჯორჯიანსელებმა ანგარიშის გახსნის შანსი ვერ გამოიყენეს და დაისაჯნენ კიდეც. მე-9 წუთზე ნუკრი ჭუმბურიძის გამჭოლი პასისას, მეკარის საჯარიმოში ლაშა ფოფხაძემ ყველას დაასწრო და არმია დაწინაურდა, 0:1. აქედან წუთიც არ იყო გასული, როცა არმიელთა მეკარე ვახტანგ ტერუნაშვილი მცველსა და მეტოქის კიპერს გასცდა და სხვაობა გააორმაგა, 0:2. ამან ჩემპიონები გააბრაზა, მათ უფრო მწვავედ და ორგანიზებულად შუტიეს. არმიელებმა კონტრშეტევაზე გადააწყვეს თამაში, ისინი გაშვებულ გოლს ძელისა და მეკარე ტერუნაშვილის წყალობით გადაურჩნენ. ჯორჯიანსელებმა ბოლოს მეკარიანად შეუტიეს, რაც მათთვის წამგებიანი აღმოჩნდა. მე-19 წუთზე ნუკრი ჭუმბურიძემ საკუთარი საჯარიმოს ხაზიდან ზუსტი და ტექნიკური დარტყმით, არმია შესვენებაზე დამაჯერებელი ფორით გაიყვანა, 0:3. მეორე ტაიმი ნიუ ვიჟენის მასირებული შეტევებით დაიწყო, რამაც შედეგი მოიტანა. 25-ე წუთზე რონინიოს გამჭოლი პასით იტალო ბსილიომ სხვაობა შეამცირა, 1:3. ჯორჯიანსელები ქამბექს შეეცადნენ და მეტოქეზე ზეწოლა გააძლიერეს. არმიელებმა ბოლომდე გაუძლეს. მიუხედავად იმისა, რომ მატჩის დასრულებამდე 4 წუთით ადრე ჯარიმების ლიმიტი ამოწურეს. ამ შეხვედრის ბოლო 2 წუთი განსაკუთრებით დრამატული აღმოჩნდა, რომელშიც გიორგი ქურდაძემ ლომის წვლილი შეიტანა. 38-ე წუთზე არმიელებმა მეტოქის მორიგი იერიში ჩაშალეს და ქურდაძემ შორეული, ზუსტი დარტყმით სამბურთიანი ფორა აღადგინა. წუთში ირაკლი თოდუამ კიდეც ერთი ბურთი გააქვითა (2:4), მაგრამ მატჩის ბოლო წუთზე ქურდაძემ კიდევ ერთი გოლის გატანით საბოლოო ანგარიში დააფიქსირა, 2:5. არმიამ ძალზე რთულ მატჩში, დამსახურებულად იმარჯვა, ჯორჯიანსელების ქულებით გაუთანაბრდა და მეორე საფეხურზე ავიდა. არმიელთა ამ გამარჯვებაში მთავარი როლი მეკარე ვახტანგ ტერუნაშვილმა შეასრულა.

ახალბედა ფეხბურთელებით დაკომპლექტებული ბეტის თბილისი, გიორგი მანაგაძის მიერ, მე-4 წუთზე გატანილი გოლით, ტაიმის ბოლო წუთამდე უგებდა თსუ-ს. ბეტისელებს, რომლებიც აუტსაიდერები არიან დასაკარგი არაფერი აქვთ და გაბედულად ითამაშეს. სტუდენტები გაცხარდნენ და მეტოქეს უფრო მწვავედ შეუტიეს, მაგრამ შედეგმა დაიგვიანა. მე-20 წუთზე ბეტისელთა მეკარე გიორგი მგელაძემ ორი მკვდარი დარტყმა მოიგერია, მეორეჯერ ბურთი დავით თაბაგარს მოხვდა და ამ ავტოგოლით ანგარიში გათანაბრდა. მეორე ტაიმი სრულად თსუ-ს უპირატესობით წარიმართა და ეს შედეგშიც შესაბამისად აისახა. 22-ე წუთზე გიორგი ხაბალაევმა სტუდენტები წინ გაიყვანა, 1:2. ოთხ წუთში ხაბალაევმა მეორეც გაიტანა. ასევე დუბლით გამოირჩა ალექსი ტკაჩოვი. რომან კუხიანიძემ, ალექსანდრე ორაგველიძემ და გიორგი აფციაურმა კი თითო გოლი გაიტანეს. ამას ბეტისელებმა თეგა პატარაიას ერთადერთი ბურთით უპასუხეს. საბოლოოდ მატჩი თსუ-ს სასარგებლო  (2:8) დასრულდა. სტუდენტები მეოთხე ადგილზე, პსპ-სთან 4 ქულიანი ფორით დარჩნენ. ბეტისი თბილისი კი 3 ქულით მეშვიდე საფეხურზეა.

მიმდინარე სეზონის მე-3 ტურში კსუ-მ დინამო თბილისს, მეკარე ალი ასლანის მიერ ბოლო წუთზე გატანილი გოლით სძლია (3:2). კავკასიელებმა ამჯერადაც ალი ასლანის დამსახურებით იმარჯვეს. დინამოელებმა მატჩი შეტევებით დაიწყეს, მაგრამ სტუდენტებმა საიმედოდ დაიცვეს თავი. მე-4 წუთზე დინამომ მეკარიანად შეუტია, შეტევის შედეგად ბურთს კსუ-ს მეკარე დაეუფლა და საკუთარი საჯარიმოდან ზუსტი დარტყმით ბურთს მეტოქის კარის ბადეში მიუჩინა ადგილი 0:1. მატჩი ორმხრივი შეტევებით გაგრძელდა და მე-16 წუთზე კახა მაღლაკელიძემ წონასწორობა აღადგინა. მეტოქეები შესვენებაზე ყაიმით (1:1) გავიდნენ. მეორე ტაიმი ორმხრივი შეტევებით დაიწყო და ალი ასლანმა 24-ე წუთზე საკუთარი საჯარიმოდან ძლიერი დარტყმით კსუ წინ გაიყვანა, 1:2. დინამოელებმა იერიშები გააგრძელეს და კვლავ მეკარიანად შეუტიეს. 26-ე წუთზე დინამოს შეტევა სტუდენტებმა ჩაჭრეს და ჯანიკო გიორგაიამ შორეული ზუსტი დარტყმით ფორა გააორმაგა, 1:3. დინამო თბილისს საკმაო დრო, 14 წუთი ჰქონდა მატჩის გადასარჩენად, მაგრამ ანგარიში აღარ შეცვლილა. პსპ-ს მიერ ჯორჯიანსელთა ძლევით ისარგებლეს და კავკასიელები ამ გამარჯვებით ცხრილს სათავეში ჩაუდგნენ, და სეზონის განახლებამდე ზამთრის ჩემპიონები იქნებიან.

მიმდინარე სეზონის მესამე ტურში, UG-წალენჯიხასთან პსპ-მ მხოლოდ მინიმალური სხვაობით მოიგო (3:2) და ალბათ ეს ფაქტორი გახლდათ, მთავარი თუ არა, ერთ-ერთი მნიშვნელოვანი მოტივატორი, იმისა, რომ წალენჯიხელებმა ფარმაცევტებს დიდი ბრძოლა გაუმართეს. თამამად შეიძლება ითქვას, რომ UG-მ მრისხანე მეტოქეს ტოლი არ დაუდო, განსაკუთრებით კი პირველ ტაიმში. ბესიკ არველაძის ბიჭები სწრაფი გოლით დაწინაურდნენ. პირველივე წუთზე ლევან სვანიძის სოლო-რეიდი, ნიკოლოზ კურტანიძემ გოლით დააგვირგვინა, 0:1. ამან წალენჯიხელები გააბრაზა, ისინი თამაშის სადავეებსაც  დაეუფლნენ და გოლის გატანის არაერთი შანსიც ჰქონდათ, მაგრამ ტაიმი მინიმალური სხვაობით დასრულდა. ფარმაცევტებმა მეორე ტაიმი უკეთ დაიწყეს და საწყის 5 წუთში ორი გოლი გაიტანეს. 25-ე წუთზე კურტანიძის პასი ნიკოლოზ კოპლატაძემ გოლად აქცია, 0:2. წუთში კი ლუკა ჯოლოხავას ფინტაობა გიორგი ექსეულიძემ გოლით დააფასა, 0:3. წალენჯიხელებს 14 წუთი ჰქონდათ მატჩის გადასარჩენად, მაგრამ ანგარიში აღარ შეცვლილა. UG ბოლო ადგილზე დარჩა 2 ქულით, პსპ კი 12 ქულით კვლავ მეხუთე საფეხურზე.