თითქმის ორთვიანი შესვენების შემდეგ, ფუტსალის უმთავრეს ლიგა განახლდა. ნიუ ვიჟენ ჯორჯიანსმა, კავკასიელებს მეორედაც სძლია და ლიდერობა დაიბრუნა. ორი შეხვედრა კი ფრედ დასრულდა. პსპ არმიასთან ორი ბურთით აგებდა, მაგრამ ფრე გაახერხა. დინამო თბილისი თსუ-ს უგებდა და საბოლოოდ ამ მეტოქეები ფრეზე გაიყარნენ. ეს ამბები მოხდა მე-11 ტურში, რომლის ერთი მატჩი  (ბეტის თბილისი - UG-წალენჯიხა) გადაიდო.

ტური ცენტრალური, კავკასიელთა და ჯორჯიანსელთა დერბით დაიწყო. მიმდინარე სეზონში ამ გუნდების ერთადერთი მატჩი ფრედ მთავრდებოდა, მაგრამ 38-ე წუთზე გატანილი გოლით, ნიუ ვიჟენმა იმარჯვა. დერბის ტრადიცია გაგრძელდა და ამ მეტოქეთა დაპირისპირება, ამჯერადაც გამორჩეული გახლდათ. თამაში გარდამავალი უპირატესობით დაიწყო და ასევე  წარიმართა. ამაზე მეტყველებს ისიც, რომ ნახევარ ტაიმში მეტოქეებმა 4-4 გაფრთხილება მიიღეს. ჯორჯიანსმა თამაში გადააწყო და ეპიზოდებში მეორე ნომრად გვევლინებოდა. მე-13 წუთზე ჯორჯიანსელები დაწინაურდნენ. ფლანგიდან ვახტანგ ჯვარაშვილის გამჭოლი პასით, ბრაზილიელმა ვილიან სოუზამ ანგარიში გახსნა, 0:1. თამაშმა უფრო მწვავე ხაასიათი მიიღო. სტუდენტები წონასწორობის აღდგენას შეეცადნენ და შანსიც მალევე მიეცათ, მაგრამ საბა მაჩიძიტის დარტყმას, ნიუ ვიჟენის მეკარე თორნიკე ბუკია გადაეფარა.  ვილიან სოუზა კსუ-ს კიპერთან პირისპირ გაიყვანეს, მაგრამ ალი ასლანმა იმარჯვა. კავკასიელებმა მეტოქეზე ზეწოლას უმატეს და ტაიმის დასრულებამდე 6 წუთით ადრე ჯორჯიანსელებმა ჯარიმები ლიმიტი ამოწურეს, მაგრამ ნიუ ვიჟენი პენალტს გადაურჩა. უფრო მეტიც, მე-18 წუთზე ვახტანგ კეკელიას თავური ალი ასლანმა კი მოიგერია, მაგრამ დამატებაზე კეკელიამ ფორა გააორმაგა, 0:2. მეორე ტაიმშიც ცხარე ბრძოლა გაგრძელდა. 24-ე წუთზე მეკარე ბუკიას გრძელი გადაცემის შემდეგ, ვილიან სოუზა მეტოქეს დაუსხლტდა და დუბლი მიითვალა, 0:3. კსუ-ს დასაკარგი არაფერი დარჩა და შეტევები მეტად გაამწვავა. გიორგი ჩიმაკაძეს კარგი შანსი მიეცა, მაგრამ ვერ გამოიყენა. 33-ე წუთზე საბა მაჩიტიძემ მეტად მახვილი კუთხიდან ერთი ბურთი გაქვითა, 1:3. დარჩენილ 7 წუთში მეტოქეებს გოლის გატანის არაერთი შანსი ჰქონდათ, მაგრამ აგარიში აღარ შეცვლილა. მოთამაშეთა დანაკლისის მიუხედავად ნიუ ვიჟენ ჯორჯიანსმა მეტად პრინციპული მატჩი მოიგო და 28 ქულით ლიდერობა დაიბრუნა. ქულით ნაკლები აქვს კსუ-ს და მეორე საფეხურზეა.

არანაკლებ დაძაბული და საინტერესო გახლდათ არმიასა და პსპ-ს დაპირისპირება. შეგახსენებთ, რომ მიმდინარე სეზონის პირველ ტურში ლადო ბურდულის ბიჭებმა მინიმალურად (2:1) სძლიეს ფარმაცევტებს. ამჯერადაც, თამაში არმიელთა უპირატესობით დაიწყო, მაგრამ პსპ მალევე გამოცოცხლდა. თუმცა, მეტოქეებს ანგარიშის გახსნა დაუგვიანდათ. არმიელებმა მეტოქეზე ზეწოლა გააძლიერეს, რაც გაფრთხილებების სიმრავლეში აისახა - 12 წუთში პსპ-მ 4 გაფრთხილება მიიღო. არმიამ  გოლი ნელ-ნელა მოამწიფა და მე-12 წუთზე შაკო ცირამუას წაქცევისთვის დანიშნული საჯარიმო დარტყმა, ნუკრი ჭუმბურიძემ გოლად აქცია, 1:0. მეორე ტაიმი ფარმაცევტებმა უკეთ დაიწყეს და ანგარიშის გათანაბრებების შანსიც ჰქონდათ, მაგრამ გიგა ბერაიამ ვითარება განმუხტა და საგოლე კონტრიერიშს დაუდო სათავე, რომელიც ჭუმბურიძემ დუბლით დააგვირგვინა, 2:0. პსპ-მ ქამბექი ჩაიფიქრა და ეს მოახერხა კიდეც. 29-ე წუთზე ლევან სვანიძემ ანგარიშში სხვაობა მინიმუმამდე შეამცირა, 2:1. ფარმაცევტები ამას არ დასჯერდნენ და 37-ე წუთზე სვანიძის მიერ კუთხურიდან ჩაწოდებული ბურთი, ლაშა სიგუნავამ შეუჩერებლად გადაგზავნა კარში და მეტად ეფექტური გოლით ანგარიში გაათანაბრა, 2:2. მატჩის დასულებამდე 5 ქუთით ადრე არმიას უკვე 5 გაფრთხილება ჰქონა, მაგრამ პენალტამდე საქმე არ მისულა. ანგარიში აღარ შეცვლილა, შეხვედრა 2:2 დასრულდა. არმია მეორედან მესამე საფეხურზე დაეშვა, პსპ კი მეხუთეზე დარჩა.

თსუ-მ ლიგის დებიუტანტი დინამო თბილისი, მე-4 ტურში, დიდი ანგარიშით 8:1 დაამარცხა. დინამოელებმა ამჯერად უკეთ ითამაშეს და ეს თამაშის საბოლოო შედეგშიც აისახა. მატჩი საშუალო ტემპში წარიმართა, მეტოქეებმა თანაბარი თამაში აჩვენეს და შეხვედრაში ლოგიკური შედეგი დაფიქსირდა. მე-13 წუთზე, ლაშა კაკაჩიას გოლით დინამო დაწინაურდა, მაგრამ 25-ე წუთზე რომან კუხიანიძემ წონასწორობა აღადგინა. შეხვედრა 1:1 დასრულდა, თსუ მეოთხე ადგილზე დარჩა, დინამო კი მეექვსეზეა.