ფუტსალის უმთავრესი ლიგის მე-12 ტურს, ცხრილში ცვლილების გარეშე არ ჩაუვლია. პსპ-მ, მეხუთე ტურში მარცხის გამო, კსუ-ზე რევანში აიღო, რამაც არმიას დიდი სარგებელი მოუტანა. თავის მხრივ, არმიელებმა UG-წალენჯიხას სძლიეს და მეორე ადგილზე დაბრუნდნენ. პსპ-მ ამ გამარჯვებით მეოთხეადგილოსან თსუ-სთან ჩამორჩენა მინიმუმამდე შეამცირა, რაც ჯორჯიანსელთა მიერ თსუ-ს ძლევამ განაპირობა. დასამახსოვრებელია ისიც, რომ ამ ტურში მეკარეებმა, ნიკოლოზ ფხაკაძემ (პსპ) და  თორნიკე ბუკიამ (ნიუ ვიჟენ ჯორჯიანსი), საკუთარი საჯარიმოდან, თითო გოლი გაიტანეს. ასეთია მოკლე რეზიუმე, ტურის ვრცელი მიმოხილვისთვის თანმიმდევრობას მივყვეთ.

შეიძლება ითქვას, რომ მიმდინარე წელი კსუ-სთვის მარცხიანად დაიწყო. კავკასიელები, რომლებიც დეკემბრის მიწურულს ცხრილს სათავეში მოექცნენ და ზამთრის ჩემპიონები გახდნენ, გასულ ტურში მოქმედ ჩემპიონ ნიუ ვიჟენ ჯორჯიანსთან დამარცხდნენ (1:3), ამჯერად კი პსპ-სთან, რომელსაც ამ სეზონის მეხუთე ტურში მოუგეს (5:3). არა და, კსუ თამაშს იგებდა და თანაც ფორით, მაგრამ... სანახაობრივად გამორჩეული ეს მატჩი კავკასიელებმა აქტიურად დაიწყეს და მე-3 წუთზე ჯანიკო გიორგაიამ ანგარიში გახსნა, 0:1. ფარმაცევტებს უმალ შეეძლოთ გაყაიმება, მაგრამ გიორგი გაზდელიანის გასროლა მცირედით ასცდა მიზანს. პსპ-მ შეტევები გააგრძელა და კვლავაც შეეძლო ბურთის გატანა, მაგრამ სტუდენტები მეკარე ალი ასლანმა იხსნა. კსუ-მ ტაქტიკა შეცვალა და დაცვიდან თამაში ამჯობინა, რამაც გაამართლა კიდეც. მე-17 წუთზე გიორგი ჩიმაკაძემ ფლანგური სოლო-რეიდი, მახვილი კუთხიდან გატანილი გოლით დააგვირგვინა, 0:2. სტუდენტებმა ორბურთიანი ფორის კიდეც გაზრდისთვის მეორე ტაიმშიც შეუტიეს. პსპ-მ ქამბექი ჩაიფიქრა და ორმხრივ შეტევებში მიმდინარე მეორე ტაიმი უფრო დაძაბული გამოდგა. სტუდენტებმა იერიშებში მეკარე ალი ასლანი ჩართეს და დაისაჯნენ კიდეც. 27-ე წუთზე პსპ-მ მეტოქეს ბურთი მოპარა, რომელიც შორეული დარტყმით, გიორგი ექსეულიძემ ცარიელ კარში გადაგზავნა, 1:2. ფარმაცევტებს საკმაო დრო ჰქონდათ ანგარიშის გასათანაბრებლად. ორმხრივ შეტევებში დრო მალე გაილია. 38-ე წუთზე მალხაზ მურცხვალაძემ გრძელი, გამჭოლი პასით ნიკა გვაზავა მოძებნა, რომელმაც წონასწორობა აღადგინა, 2:2. კსუ კვლავაც დაწინაურებას შეეცადა და იერიშებში მეკარეც ჩართო, რაც ძვირად დაუჯდა. მატჩის დასრულებამდე ნახევარი წუთით ადრე, სტუდენტების იერიშისას ბურთს მეკარე ნიკოლოზ ფხაკაძე დაეუფლა, რომელიც შორეული დარტყმით მეტოქის კარში გადაგზავნა და გამარჯვების გოლი გაიტანა. არმიასთან ფრის შემდეგ, პსპ-მ წელს პირველად მოიგო და ისევ მეხუთე ადგილზეა, მაგრამ მეოთხეზე მყოფ თსუ-ს ახლა უკვე ერთადერთი ქულით ჩამორჩება, კსუ კი მესამე პოზიციაზე დაეშვა.

გასულ ტურში პირველ ადგილზე დაბრუნებული ჯორჯიანსმა, მოგებების ახალი სერია დაიწყო. ნიუ ვიჟენმა თსუ-ს დიდი ანგარიშით სძლია. მოქმედი ჩემპიონები სწრაფი გოლით დაწინაურდნენ. პირველივე წუთზე მოპოვებული პენალტი ვახტანგ ჯვარაშვილმა გოლად აქცია, 1:0. შვიდ წუთში ნიკოლოზ გაბრიჩიძემ ფორა ორამდე გაზარდა, 2:0. კიდევ 10 წუთში გაბრიჩიძის გამჭოლი პასით ვახტანგ კეკელიამ ანგარიშს სოლიდური სახე მისცა, 3:0. ტაიმის მიწურულს, სტუდენტთაგან გიორგი აფციაურმა ერთი ბურთი გაქვითა, 3:1. ჯორჯიანსელებმა მეორე ტაიმიც აქტიურად დაიწყეს, მაგრამ სტუდენტები საიმედოდ დაუხვდნენ და მცირე ხნით უპირატესობასაც დაეუფლნენ. 28-ე წუთზე რომან კუხიანიძის დარტყმა, ჯორჯიანსელთა მეკარე თორნიკე ბუკიამ მოიგერია, მაგრამ დამატებაზე ალექსი ტკაჩოვმა იმარჯვა და ანგარიშში სხვაობა მინიმუმამდე შეამცირა. ამან ნიუ ვიჟენი გააბრაზა და ეს მატჩის საბოლოო შედეგშიც ნათლად აისახა. ბრაზილიელმა დუბლი მიითვალა, ერთი გოლი კი მეკარე თორნიკე ბუკიამ საკუთარი საჯარიმოდან ცარიელ კარში გაიტანა. ჯორჯიანსმა 6:2 მოიგო და ორქულიანი ფორით ლიდერობს. თსუ კი, რომელსაც პსპ წამოეწია მეოთხე საფეხურზეა და მომდევნო ტურში სწორედ ფარმაცევტებს ეთამაშება.

ბეტის თბილისი მე-9 წუთზე ბადრი კალანდაძის მიერ გატანილი გოლით დინამოს უგებდა, მაგრამ 3 წუთში დინამოელებმა ბექა ონიანის გოლით უპასუხეს. კიდევ 6 წუთში დავით ხუბუტიამ დინამო თბილისი წინ გაიყვანა, 2:1. წუთის შემდეგ მიშო მალაციძემ გუნდის ფორა გააორმაგა, 3:1. მეორე ტაიმში ხუბუტიამ კიდევ ორი გოლი გაიტანა. დინამომ 5:1 იმარჯვა, მე-6 საფეხურზე დარჩა და პსპ-სთან 5 ქულიანი ჩამორჩენა უცვლელად დატოვა.

არმიასთან მეხუთე ტურშიც დამარცხდა UG-წალენჯიხა, მაგრამ მაშინ წალენჯიხელებმა 3 ბურთის გატანა მოახერხეს, ამჯერად კი ლადო ბურდულის ბიჭებმა მშრალად, თანაც დიდი ანგარიშით 0:8 მოიგეს. არმიელთა მეგოლე შაკო ცირამუამ 4 გოლი გაიტანა, ბომბარდირთა ცხრილში იტალო ფსილიოს გაუსწრო და 20 გოლით პირველ ადგილზეა. წალენჯიხელთა კარში, ცირამუას გარდა, თითო გოლი გურამ ხაჭაპურიძემ, გიორგი ქურდაძემ, გიორგი თოლორდავამ და ოთარ ბერეჩიკიძემ გაიტანეს. პსპ-მ კსუ-ს ძლევით არმიას შანსი მისცა, რაც ბურდულის ბიჭებმა გამოიყენეს და მეორე საფეხურზე დაბრუნდნენ.