ფუტსალის უმთავრეს ლიგაში, მეორე წრე ამ ტურით დასრულდა. ტური იმით იყო გამორჩეული რომ პსპ, რომელმაც ეს სეზონი ნავსიანად დაიწყო, მოწინავე კვარტეტში შევიდა და ახლა მე-4 ადგილზეა. ეს არმიელებმა თსუ-ს ძლევით განაპირობეს. ამასთან, ეს ტური ჯორჯიანსელთა ბრაზილელი ფორვარდის, ოტალო ფსილიოს მორიგი ბენეფისი გახლდათ, რომელმაც ზედიზედ მეორედ, 5 გოლი გაიტანა. ეს მოკლედ, ვრცლად კი თანმიმდევრობას მივყვეთ.

ბეტის თბილისთან მოგებული მატჩისა და UG-წალენჯიხასთან მოულოდნელი მარცხის შემდეგ, დინამოელებმა მეორე მატჩიც წააგეს, მაგრამ ამჯერად მოქმედ ჩემპიონ და ცხრილის ერთპიროვნულ ლიდერ ნიუ ვიჟენ ჯორჯიანსთან. ავთანდილ ასათიანის ბიჭებმა მეტოქე თითო ტაიმში, 4-4 გოლით „დაასაჩუქრეს“ და 8:1 მოიგეს. რვა გატანილი ბურთიდან ხუთის ავტორი, ბრაზილიელი ფორვარდი იტალო ფსილიოა, რომელსაც 28 გოლი დაუგროვდა და უახლოს მდევარ შაკო ცირამუას (არმია) ერთბაშად 8 გოლით უსწრებს. აღსანიშნავია ის, რომ ფსილიოს 2 გოლი აკლია, შარშანდელი ჩემპიონატის  ბომბარდირ ვახტანგ ჯვარაშვილის რეკორდის მოსახსნელად. წინ მესამე წრის 7 მატჩი დარჩა და უნდა ვივარაუდოთ, რომ იტალო ფსილიო ამ რეკორდს მოხსნის... ფსილიოს გარდა, დინამოსთან თითო ბურთი ვილიან სოუზამ, ლაშა კურტანიძემ და შოთა თოფურიამ გაიტანეს. ამას დინამოელებმა ბექა ონიანის ერთადერთი გოლით უპასუხეს. ნიუ ვიჟენი ცხრილს 5-ქულიანი ფორით ლიდერობს, მაგრამ მდევრებს, არმიასა და კსუ-ს თითო მატჩი გამოტოვებული აქვთ. დინამო თბილისი კი 11 ქულით მე-6 ადგილზეა.

წინა ორივე შეხვედრაში მარცხის შემდეგ, წლის პირველი მოგება იზეიმა კსუ-მ. UG-წალენჯიხასთან მატჩში სტუდენტებმა საკმაოდ დამაჯერებლად, 1:6 მოიგეს. კავკასიელთაგან გიორგი ჩიმაკაძემ ჰეთ თრიკი, საბა მაჩიტიძემ კი დუბლი შეასრულა. ერთი ბურთი ნიკა მანგოშვილის ანგარიშზეა. ჩიმაკაძემ 12 გოლი დააგროვა და ბომბარდირთა ცხრილში, გიორგი ქურდაძესთან ერთად მეხუთე-მეექვსე ადგილებს იყოფს. წალენჯიხელთაგან პრეტიჟის გოლი, ზურაბ ღვინჯილიამ მატჩის ბოლოს გაიტანა. 5 ქულის მქონე UG მე-7 საფეხურზეა, კსუ კი 30 ქულით მესამეზეა და წინ მყოფ არმიას 2 ქულით ჩამორჩება.

ამ ტურის სხვა 3 მატჩისგან განსხვავებით, საბოლოო შედეგის პროგნოზირება, არმიასა და თსუ-ს შეხვედრაში უფრო ჭირდა. მიუხედავად იმისა, რომ ამ სეზონის პირველი თამაშში არმიელებმა სტუდენტებს 7:5 მოუგეს. თუმცა, ამჯერად თსუ-ელებმა კარგად იცოდნენ, რომ წაგების შემთხვევაში, აქამდე მათთვის განკუთვნილ მე-4 ადგილს, პსპ დაიკავებდა. ამ და სხვა ფაქტორების გათვალისწინებით, ეს შეხვედრა ტურის ცენტრალურ მატჩად იყო მიჩნეული. თამაში არმიელთა იერიშებით დაიწყო, სტუდენტები უმეტესად თავს იცავდნენ და კონტრშეტევებით აწუხებდნენ მეტოქეს. მე-8 წუთზე გრძელი გადაცემა ნოდარ ქურცაძემ გოლით დააგვირგვინა და ანგარიში გახსნა, 0:1. არმიამ წუთშივე უპასუხა, ნუკრი ჭუმბურიძემ ანგარიში გაათანაბრა, 1:1. მალევე სტუდენტებს ისევ შეეძლოთ დაწინაურება, მაგრამ არმიელთა კარი ძელმა იხსნა. მე-13 წუთზე თსუ-მ პენალტი დაიმსახურა, მართალია არმის მეკარე ვახტანგ ტერუნაშვილმა გიორგი აფციაურის დარტყმული პენალტი მოიგერია, მაგრამ აფციაურმა დამატებაზე ყველას დაასწრო და თსუ წინ გაიყვანა, 1:2. ლადო ბურდულის ბიჭებმა კარგად იცოდნენ, რომ წაგების შემთხვევაში მეორე ადგილს მათ ნაცლად კსუ დაიკავებდა. ამიტომაც მეტოქეზე ზეწოლა გააძლიერეს და ტაიმის მიწურულს გიორგი ქურდაძემ წონასწორობა აღადგინა, 2:2. მეორე ტაიმი არმიელთა შეტევებით დაიწყო და 23-ე წუთზე ოთარ ბერეჩიკიძემ არმია ამ მატჩში პირველად წინ გაიყვანა, 2:3. ექვს წუთში კი გიგა ბერაიამ ფორა გააორმაგა, 2:4. თსუ ვა-ბანკზე წავიდა, მეკარიანად შეუტია და ამან შედეგიც გამოიღო - 33-ე წუთზე მელტონ ახალაიამ ანგარიშში სხვაობა მინიმუმამდე შეამცირა, 3:4. დარჩენილ 7 წუთში ორივე გუნდს შეეძლო გატანა, მაგრამ ანგარიში აღარ შეცვლილა. არმიამ მოიგო და მეორე ადგილი 2-ქულიანი ფორით შეინარჩუნა. მარცხის გამო თსუ მე-5 საფეხურზე დაეშვა და პსპ-ს 2 ქულით ჩამორჩება. 

პსპ-მ ბეტის თბილისთან დიდი ანგარიშით, 7:0 იმარჯვა. ფარმაცევტთაგან ლევან სვანიძემ ჰეთ თრიკი შეასრულა, სპარტაკ ლომიძემ დუბლი მიითვალა. თითო ბურთი კი ლაშა სიგუნავამ და მირიან მირგატიამ გაიტანეს. თსუ-ს მარცხის გამო, ფარმაცევტები ამ მოგებით და დაგროვებული 19 ქულით, მოწინავე ოთხეულში დაბრუნდნენ. პსპ-ს ახლა, 2 ქულით ჩამორჩება თსუ და ორივე ამ გუნდს თითო გამოტოვებულ მატჩი მარაგში აქვთ. ასე რომ, პსპ-ს კვარტეტში დასამკვიდრებლად ბრძოლა მოუწევს.