მე-15 ტურით ფუტსალის უმთავრეს ლიგაში მესამე წრე დაიწყო, რომლის შემდეგაც ზედა და ქვედა ოთხეულები ფლეი ოფის სისტემით გააგრძელებენ ბრძოლას - ზედა კვარტეტი ჩემპიონობისთვის, ქვედა კი ლიგაში ადგილის შენარჩუნებისთვის. თუმცა, წინ კიდევ 6 ტურია და შესაძლოა ოთხეულები კიდევ შეიცვალოს. მანამდე კი ზედა ოთხეულის გუნდებმა, ქვედა კვარტეტის წევრებს მოუგეს და ეს სწორედ ამ ტურში მოხდა. ზედა ოთხეულში ყველაზე დიდი, 5-მატჩიანი მოგების სერია, ცხრილის ლიდერსა და მოქმედ ჩემპიონ ნიუ ვიჟენ ჩემპიონს აქვს. ასეთია მე-15 ტურის მოკლე რეზიუმე, დეტალური მიმოხილვისთვის თანმიმდევრობას მივყვეთ.

ნიუ ვიჟენ ჯორჯიანსმა სეზონის მესამე მატჩიც მოუგო UG-წალენჯიხას, თანაც ისეთივე ანგარიშით, როგორც ამ სეზონის სასტარტო ტურში. ანგარიში კი ლუკა ჯოლოხავამ გახსნა, რომელმაც UG მე-5 წუთზე დააწინაურა. ამას ნიუ ვიჟენის 4 გოლი მოჰყვა, ჯორჯიანსელთა გამარჯვებაში ბრაზილიელმა მცველმა ვილიან სოუზამ, ჰეთ თრიკით დიდი წვლილი შეიტანა. ნიკოლოზ გაბრიჩიძემ, იტალო ფსილიომ, ვახტანგ კეკელიამ და ვახტანგ ჯვარაშვილმა თითო გოლი გაიტანეს. წალენჯიხელთაგან კიდევ ერთი გოლი ალეკო უდესიანის ანგარიშზეა. ნიუ ვიჟენ ჯორჯიანსმა ზედიზედ მეხუთე მატჩში იმარჯვა და ცხრილს 5-ქულიანი ფორით ლიდერობს, რადგან მდევრებს თითო თამაში აქვთ გამოტოვებული. UG-წალენჯიხა 5 ქულით მე-7 საფეხურზეა და ბოლო ადგილზე მყოფ ბეტის თბილისს 2 ქულით უსწრებს.

სტუდენტური დერბი ამჯერადაც დაძაბული გახლდათ. მართალია, კავკასიელებმა თსუ-ს, ამ სეზონის ორივე მატჩი 4-4 ბურთის სხვაობით მოუგეს, მაგრამ თსუ-ელებმა ამჯერად უფრო უკეთ ითამაშეს. ბოლოს ჩატარებულ ტურებში, ორი მარცხის შემდეგ კსუ-მ მეორე გამარჯვება მოიპოვა, მაგრამ ეს იოლი არ ყოფილა. ამისი დასტურია ის, რომ ანგარიში მხოლოდ მე-9 წუთზე გაიხსნა, გიორგი ჩიმაკაძემ კავკასიელები დააწინაურა. მე-18 წუთზე ზურაბ ლუკავამ ფორა გააორმაგა, 2:0. ამას თსუ-მ ნიკა ჩალაძის  გოლით უპასუხა, 2:1. მეორე ტაიმი კავკასიელებმა უკეთ დაიწყეს, 21-ე წუთზე ჩიმაკაძემ მეორეც გაიტანა, 3:1. ორიოდე წუთში ნოდარ ქურცაძემ სხვაობა სოლიდური გახადა, 4:1. გიორგი ხაბალაევმა 26-ე წუთზე კიდევ ერთი გოლი გაქვითა, 4:2. კსუ-მ ლუკა ფარცვანიას გოლით 3-ბურთიანი სხვაობა ოთხ წუთში აღადგინა. თუმცა, მატჩის ბოლოსწინა წუთზე მელტონ ახალაიამ სხვაობა შეამცირა. კსუ-მ 5:3 მოიგო და 33 ქულით მესამე ადგილზეა. თსუ კვლავ მე-5 საფეხურზეა და ახლა უკვე 5 ქულით ჩამორჩება მეოთხეზე მყოფ პსპ-ს.

ფარმაცევტებს დინამო თბილისთან იოლი გასეირნება არ ჰქონიათ. შეგახსენებთ, რომ ამ სეზონში გუნდებმა თითო შეხვედრა მოიგეს. დაძაბულობით ეს მატჩიც გამორჩეული გახლდათ. ამაზე ისიც მეტყველებს, რომ არაერთი საგოლე მომენტის მიუხედავად, ანგარიში მხოლოდ მე-17 წუთზე გაიხსნა - ლევან სარდანაშვილმა მაღალი ბურთი მიიღო, ერთი მეურვე ჩამოიშორა და კარში დაარტყა. დინამოს მეკარე ლუკა ხარშილაძემ ბურთი მოიგერია, მაგრამ ლევან სვანიძემ დამატებაზე იმარჯვა და პსპ დააწინაურა, 1:0. ორ წუთში დინამოელებმაც ანალოგიურად გოლი გაიტანეს - ალექსანდრე ცირეკიძემ წონასწორობა აღადგინა, 1:1. თანაბრად წარმართული პირველი ტაიმის შემდეგ, ფარმაცევტებმა მეორე ტაიმში იძალეს. 24-ე წუთზე მალხაზ მურცხვალაძემ პსპ წინ გაიყვანა, 2:1. ამას ლევან სარდანაშვილის დუბლი მოჰყვა, 4:1. ნიკა გვაზავამ 32-ე წუთზე გატანილი გოლით ფარმაცევტების უპირატესობა სოლიდური გახადა, 5:1. ამას დინამომ ბექა ონიანის ერთი გოლით უპასუხა. პსპ-მ ზედიზედ მესამე შეხვედრა მოიგო და 5-ქულიანი ფორით მე-4 ადგილზე გამაგრდა. დინამო თბილისი 11 ქულით მე-6 საფეხურზე დარჩა და მეხუთეზე მყოფ თსუ-ს  ისევ 6 ქულით ჩამორჩება.

ახალბედა მოთამაშეებით დაკომპლექტებულ ბეტის თბილისთან არმიამ სოლიდური ანგარიშით, 8:2 მოიგო. არმიელთა მთავარმა მეგოლე შაკო ცირამუამ 4 ბურთი გაიტანა. ცირამუას, რომელიც ბომბარდირთა ცხრილში, იტალო ფსილიოს (ნიუ ვიჟენ ჯორია) შემდეგ მეორე ადგილზეა, 24 გოლით დაუგროვდა და ჯვარაშვილი-გაბრიძის ჯორჯიანსელთა ტანდემს ერთბაშად 8-8 გოლით უსწრებს. ცირამუას გარდა, ბეტისელებთან გიგა ბერაიამ და გიორგი ქურდაძემ 2-2 გოლი მიითვალეს. ბეტისი თბილისიდან დავით უდუმაშვილმა და თეგა პატარაიამ თითო ბურთი გაიტანეს. არმია 35 ქულით მეორე ადგილზეა, 2 ქულით უსწრებს კსუ-ს და ბევრს გადაწყვეტს ამ გუნდებს შორის გამოტოვებული მატჩი, რომელიც 3 მარტს გაიმართება.