თამამად შეიძლება ითქვას, რომ ფუტსალის უმთავრესი ლიგის მე-16 ტური, ძალზედ დაძაბული და გამორჩეული ამბებით დახუნძლული გამოდგა. დინამო არმიას სოლიდურად უგებდა და მოულოდნელი ფრით კსუ-ს დააშორა. თსუ ზედა კვარტეტში დაბრუნდა, პსპ კი დაქვეითდა. ჯორჯიანსელებმა პსპ-ს მესამედაც დამაჯერებლად სძლიეს. მათმა მეგოლე იტალო ბსილიომ ჰეთ თრიკით, გასული სეზონის რეკორდი მოხსნა. კიდევ ერთი ჰეთ თრიკი და ორიც პოკერი  შესრულდა... ყოველივე ეს ამ ტურში მოხდა. ახლა კი დეტალურ მიმოხილვას მივყვეთ.

ტური გამორჩეული მატჩით გაიხსნა, UG-წალენჯიხამ თსუ-ს უმასპინძლა და სტუდენტები კინაღამ მოწინავე კვარტეტის მიღმა დატოვა. ამ მეტოქეების წინა შეხვედრა თსუ-მ დამაჯერებლად კი მოიგო (5:1), მაგრამ მანამდე, მეორე ტურში თსუ-ელებმა წალენჯიხელებთან ფრე (3:3), მხოლოდ ბოლო 2 წუთში გატანილი ორი გოლის წყალობით გაახერხეს. თსუ-ს მოწინავე ოთხეულში დასაბრუნებლად უნდოდა მოგება, UG -ს კი ბოლო ადგილის დასატოვებლად. ანგარიში მე-5 წუთზე თსუ-ელთაგან ლუკა ელიზბარაშვილმა გახსნა, 0:1. წუთიც არ იყო გასული და წალენჯიხელებმაც უპასუხეს, ვაჟა კვარაცხელიამ წონასწორობა აღადგინა, 1:1. მეორე ტაიმშიც თსუ დაწინაურდა - 24-ე წუთზე ნიკა ჩალაძემ გაიტანა, 1:2. წალენჯიხელებმა 4 წუთში უპასუხეს, ნიკა ხარშილავამ წონასწორობა აღადგინა, 2:2. დარჩენილი 11 წუთი ორმხრივ შეტევებში მიილია, მაგრამ მეტოქეები გოლის გატანას ვერ ახერხებდნენ. თსუ ვა-ბანკზე წავიდა და ხუთი მოთამაშით შეუტია, რამაც გაამართლა კიდეც. მატჩის დასრულებამდე 23 წამით ადრე, ორაგველიძის გამჭოლი პასი, მელტონ ახალაიამ გოლად აქცია, 2:3. დარჩენილ წამებში  UG -ს კიდევ შეეძლო ანგარიშის გათანაბრება, მაგრამ სტუდენტებმა ვაჟა კვარაცხელიას არ გაატანინეს. თსუ-მ რთული მატჩი მოიგო და პსპ-სთან ერთქულიანი უპირატესობით მოწინავე კვარტეტში დაბრუნდა.

დინამო-არმიას დაპირისპირება იმდენად დრამატულად წარიმართა, რომ ტურის ცენტრალურ მატჩად იქცა. მართალია, არმიელებმა დინამოელებს ამ სეზონის წინა მატჩები 2-2 ბურთიანი სხვაობით მოუგეს, მაგრამ ამჯერად 2 ბურთის გატანის წყალობით ძლივს გაახერხეს ფრე. მე-8 წუთზე გიორგი თოლორდავას გოლით არმია დაწინაურდა, 0:1. ლადო ბურდულის ბიჭებმა ფორის შექმნაზე იწყეს ზრუნვა და უპირატესობაც ზურგს უმაგრებდათ, მაგრამ მე-14 წუთზე ლაშა-გიორგი ობოლაძემ ანგარიში გაათანაბრა, 1:1. დინამომ კონტრშეტევებზე ააწყო თამაში, წუთში ობოლაძემ მეორეც გაიტანა და თავისი გუნდი წინ გაიყვანა, 2:1. მე-17 წუთზე კი თეიმურაზ ექიზაშვილმა ანგარიში 3:1 გახადა. მეორე ტაიმის პირველივე კონტრშტევით ექიზაშვილმა დინამოს ფორა სამამდე გაზარდა, 4:1. არმიელებმა მეკარიანად შეუტიეს და 22-ე წუთზე ობოლაძემ არმიას იერიში ჩაჭრა და მესამე გოლი გაიტანა, 5:1 არმიელები გაბრაზდნენ, მეტოქეზე ზეწოლა გააძლიერეს და ეს ანგარიშშიც აისახა. ოთარ ბერეჩიკიძემ დუბლი, თოლორდავამ მეორე გოლიც მიითვალა და ანგარიშში სხვაობა მინიმუმამდე შემცირდა, 5:4. არმიამ მეკარიანად შეტევა გააგრძელა, რითაც ისევ ისარგებლა დინამომ და 33-ე წუთზე, ობოლაძემ ცარიელ კარში გაიტანა, 6:4. ბურდულის ბიჭებმა ქამბექისკენ სწრაფვა გააგრძელეს და საბოლოოდ ეს შეძლეს კიდეც. სილაგავამ სხვაობა მინიმუამდე შეამცირა, ბერეჩიკიძემ კი მესამე გოლიც გაიტანა და საბოლოო ანგარიში, 6:6 დააფიქსირა. ამ ფრით დინამომ არმია კსუ-ს დააშორა, პსპ-სთან ჩამორჩენა კი ქულით შეამცირა.

ნიუ ვიჟენ ჯორჯიანსმა ამ სეზონში ორივეჯერ დამაჯერებლად სძლია პსპ-ს და ამჯერადაც იგივე გაიმეორა, ჯორჯიიანსელებმა 7:2 მოიგეს. მეტოქის რბევა ნიკოლოზ გაბრიჩიძემ დაიწყო და რონინიომ დაასრულა. მათ მსგავსად შოთა თოფურიამ და ვილიან სოუზამაც თითო გოლი იზეიმეს. ნიუ ვიჟენის მეგოლე იტალო ბსილიომ ჰეთ თრიკი შეასრულა, 32 გოლი დააგროვა და გასული სეზონის მთავარი ბომბარდირის, ვახტანგ ჯვარაშვილის (30 გოლი) რეკორდი მოხსნა. პსპ-დან გიგი ლომაიამ და სპარტაკ ლომიძემ თითო ბურთი გაიტანეს. ამ მარცხით პსპ მოწნავე კვარტეტიდან დაქვეითდა. ჯორჯიანსმა ზედიზედ მე-6 თამაში მოიგო და ცხრილს 4-ქულიანი ფორით ლიდერობს.

ამ სეზონის წინა ორი შეხვედრის მსგავსად, მრისხანე კსუ-მ ახალბედა მოთამაშეებით დაკომპლექტებულ ბეტის თბილისს, კვლავ დიდი სხვაობით, ამჯერად 1:10 მოუგო. კავკასიელთა კაპიტანმა ნიკა მანგოშვილმა ამ მატჩში გატანილი 4 გოლით ბენეფისი მოიწყო. ნიკა ხარატიშვილმა დუბლი მიითვალა. ლუკა ფარცვანიამ, ნოდარ ქურცაძემ, ბექა ბექაურმა და ჯანიკო გიორგაიამ თითო ბურთი გაიტანეს. ბეტისიდან პრესტიჟის გოლი დავით უდუმაშვილმა ჩაიწერა. პოკერის შედეგად მანგოშვილს 12 გოლი დაუგროვდა და ბომბარდირთა დავაში, ასევე პოკერის ავტორ ლაშა-გიორგი ობოლაძესთან ერთად მეშვიდე-მერვე ადგილს იყოფს. ამ გამარჯვებით კსუ-მ არმიასთან ფორა სამ ქულამდე გაზარდა.