ზედიზედ ორი მარცხის შემდეგ, პსპ-მ იმარჯვა, რასაც თსუ-ს ფრე დაემატა და ახლა, მოწინავე ოხეულისთვის ბრძოლაში, სტუდენტები ფარმაცევტებს მხოლოდ 2 ქულით უსწრებენ. ასეთივე სხვაობაა დინამოსა და UG-წალენჯიხას შორის. ნიუ ვიჟენ ჯორჯიანსმა კსუ-ს მესამედაც სძლია, წალენჯიხელებმა ზედიზედ მეორედ იმარჯვეს, ამასთან ბეტისი პირველად დაამარცხეს. დინამო-თსუ-ს ფრე პსპ-სა და UG-ს არანაკლებ აწყობდათ. ეს ამბები მოხდა მე-18 ტურში, დეტალური განხილვისთვის თანმიმდევრობას მივყვეთ.

ჯორჯიანსისა და კსუ-ს დაპირისპირება, რონინიოს გოლით დაიწყო, 1:0. ამან კავკასიელები გააბრაზა და მათ 3 წუთში ანგარიშის გათანაბრების ჩინებული შანსიც ჰქონდათ, მაგრამ ჩიმაკაძის გასროლისას, ნიუ ვიჟენის კარი ხარიხამ იხსნა. მე-7 წუთზე საბა ტყეშელაშვილმა საჯარიმო დარტყმა გოლად აქცია, 1:1. სტუდენტებმა ფსიქოლოგიური უპირატესობა გამოიყენეს და მე-17 წუთზე  საბა მაჩიტიძე კავკასიელები წინ გაიყვანა, 1:2. მეორე ტაიმი ჯორჯიანსელთა კარნახით დაიწყო და ეს შედეგშიც აისახა. 23-ე წუთზე იტალო ფსილიომ ანგარიში გაათანაბრა, 2:2. სამიოდე წუთში კი ჯვარაშვილის ჩინებული პასი, დავით ხეჩიკაშვილმა გამარჯვების გოლით დააგვირგვინა, 3:2. კსუ კიდევ ერთხელ შეეცადა წონასწორობის აღდგენას, მაგრამ ეს ვერ მოახერხა. ამ გამარჯვებით, ცხრილის ლიდერმა ნიუ ვიჟენმა მდევარ კსუ-სთან ფორა 7 ქულამდე გაზარდა.

არმიელებმა სწრაფი გოლი ჩაიფიქრეს და სტარტზევე შეუტიეს, ფოფხაძის გასროლისას, პსპ-ს კარი ძელმა იხსნა, ცირამუას საჯარიმო დარტყმას კი მეკარე ფხაკაძე გადაეფარა. ასეთი კარგი სტარტის მიუხედავად, ანგარიში ფარმაცევტებმა გახსნეს. მე-6 წუთზე მეკარე ფხაკაძის გრძელ პასს, ლევან სვანაძემ თავური შეაშველა და ანგარიში გახსნა, 1:0. არმიელებმა შეტევებს სიმწვავე შემატეს და მე-12 წუთზე ოთარ ბერეჩიკიძემ მახვილი კუთხიდან დარტყმით წონასწორობა აღადგინა, 1:1. ამას ორმხრივი იერიშები მოჰყვა, რომელშიც პსპ-მ იძალა. ტაიმის ბოლო წუთზე სვანიძემ მეორეც გაიტანა და ფარმაცევტები კიდევ ერთხელ დააწინაურა, 2:1. არმიამ მეორე ტაიმიც მწვავე შეტევებით დაიწყო, მაგრამ გოლები ფარმაცევტებმა გაიტანეს. არმიამ შეტევებში მეკარეც ჩართო და ამით პსპ-მ ისარგებლა. ლევან სვანიძემ მეტოქის იერიში ჩაჭრა და ცარიელ კარში გატანით, ჰეთ თრიკი გაიფორმა, 3:1. წუთში თევზაძის გრძელი პასი, გიორგი ქურხულმა გოლით დააფასა, 4:1. არმიელები მატჩის გადარჩენას შეცადნენ და მეტოქეზე ზეწოლა გააძლიერეს. 35-ე წუთზე ბაკურ ნანეიშვილმა სხვაობა ორამდე შეამცირა, 4:2. ამან არმიელებს სტიმული მისცა, მაგრამ პსპ-მ საიმედოდ დაიცვა თავი. არმიამ მხოლოდ ის შეძლო, რომ ბოლო წუთზე ოთარ ბერეჩიკიძემ მეორე ბურთი გაიტანა. პსპ-მ 4:3 მოიგო და მეოთხეზე მყოფ თსუ-სთან ჩამორჩენა 2 ქულამდე შეამცირა. არმია ისევ მესამეზეა და კსუ-ს ისევ 6 ქულით ჩამორჩება.

ბეტის თბილისთან ორი მარცხის შემდეგ, UG-წალენჯიხამ ამ მეტოქეზე ჯავრი იყარა. თამაში საშუალო ტეპში დაიწყო და პირველი რეალური საგოლე მომენტი ბეტისმა მხოლოდ მე-12 წუთზე შექმნა, რომელიც გიორგი მანაგაძემ გოლად აქცია, 0:1. UG-წალენჯიხა მეორე ტაიმში გაცილებით უკეთ წარმოჩნდა და 25-ე წუთზე ნიკა ხარჩილავამ ანგარიში გაათანაბრა, 1:1. წალენჯიხელები ამას არ დასჯერდნენ და თამაში შემოაბრუნეს. 34-ე წუთზე ალეკო უდესიანმა შორეული დარტყმით UG დააწინაურა, 2:1. ბეტისმა მეკარის თანხლებით შეუტია და 37-ე წუთზე ლუკა ჯოლოხავამ საკუთარი ნახევრიდან ცარიელ კარში გაიტანა, 3:1. კიდევ 4 წუთში ვაჟა ვარაცხელიამ სხვაობა სოლიდური გახადა, 4:1. ბეტისელებს კიდევ ერთის გატანა შეეძლოთ, მაგრამ ბადრი კალანდაძის პენალტი, UG-ს მეკარე გულორდავამ მოიგერია.

სეზონის პირველ შეხვედრაში, „დინამოსთან“ ძლევამოსილი (8:1) გამარჯვების შემდეგ, თსუ მეორე მატჩში ფრეს (1:1) დასჯერდა. ელიტურ კვარტეტში მეოთხე ადგილის შენარჩუნებისთვის ბრძოლაში, თსუ-ს უცილობლად მოგება სჭირებოდა. გამარჯვებას ესწრაფვოდა „დინამოც“, რადგან ზედიზედ ორი მოგების შედეგად, UG-წალენჯიხას მხოლოდ ქულით უსწრებდა (ამ მატჩამდე). ეს ფაქტორები დრამატულ სანახაობას განაპირობებდნენ და ასეც მოხდა. სტუდენტებმა იმარჯვეს და მე-2 წუთზე ნოდარ ქურცაძემ ანგარიში გახსნა. ამას გარდამავალი უირატესობა მოჰყვა. მე-12 წუთზე კი ლაშა-გიორგი ობოლაძემ წონასწორობა აღადგინა. დინამოს დაწინაურებაც შეეძლო, მაგრამ მაღლაკელიძემ ჩინებული შანსი ვერ გამოიყენა. მეორე ტაიმის სტარტზე ობოლაძემ მეორედაც გაიტანა და დინამო დააწინაურა, 2:1. თსუ გამოცოცხლდა და 27-ე ალექსანდრე ორაგველიძემ ანგარიში გაათანაბრა, 2:2. კიდევ ორ წუთში ალექსი ტკაჩოვმა სტუდენტები წინ გაიყვანა. დინამომ მეკარიანად შეუტია და 34-ე წუთზე ლაშა კაკაჩიას გოლით საბრძოლო ფრე (3:3) გაახერხა.