ფუტსალის მოქმედი ჩემპიონი ნიუ ვიჟენ ჯორჯიანსი და კსუ, ფინალს მიუახლოვდნენ. შესაბამისად, ძალზე დიდია შანსი იმისა, რომ ფუტსალის უმთავრეს ლიგას ახალი ჩემპიონი არ ეყოლება (პსპ ან არმია), რადგან ჯორჯიანსელებმა სამჯერ მოიპოვეს ოქრო, კავკასიელებმა კი ერთხელ. ნიუ ვიჟენსა და კსუ-ს, ნანატრ ფინალურ სერიას ერთი მოგება აშორებთ...

პსპ-სთან ნახევარფინალური სერიის პირველი მატჩისგან განსხვავებით, ჯორჯიანსელელებმა მეორე შეხვედრა მარცხიანად დაიწყეს და ორჯერ მდევრის როლშიც აღმოჩნდნენ. თავიდანვე უნდა ითქვას, პსპ-ს მეკარე გიგი ლომაიას დამსახურებაა ის, რომ ნიუ ვიჟენს ეს მოგება ძალიან გაუჭირდა... საწყის წუთებზე ნიუ ვიჟენმა, კარში დარტყმებით მეტოქე დაბომბა, მაგრამ ანგარიში ფარმაცევტებმა გახსნეს. ბესიკ არველაძის მიერ არჩეულმა, დაცვიდან თამაშის ტაქტიკამ გაამართლა და მე-3 წუთზე ლევან სვანიძის მიერ წამოწყებული კონტრშეტევა, ნიკოლოზ კურტანიძემ გოლით დააგვირგვინა, 1:0. თამაში იგივე სცენარით გაგრძელდა, ჯორჯიანსელები უტევდნენ, პსპ თავს საიმედოდ იცავდა. ტაიმის ბოლო წუთზე სვანიძის მორიგი კონტრიერიში ნიკოლოზ კოპლატაძის გატანილი ბურთით დასრულდა, 2:0. პსპ-ს ორბურთიანი ფორა, ნიუ ვიჟენმა მეორე ტაიმის სტარტზევე გაქვითა. 21-ე წუთზე ვილიან სოუზამ საჯარიმო დარტყმა ზუსტად შეასრულა, 2:1. წუთის შემდეგ შოთა თოფურიას პასი, ნიკოლოზ გაბრიჩიძემ გოლად აქცია, 2:2. ოთხ წუთში სვანიძემ კურტანიძესთან კედელი გაითამაშა და პსპ კიდევ ერთხელ დაწინაურდა, 3:2. გავიდა წუთი და ფარმაცევტების ლიდერებმა კიდევ ერთი გოლი გამოაცხვეს - კურტანიძის კარგი პასი სვანიძემ გოლით დააფასა და ორბურთიანი ფორა აღადგინა, 4:2. ამის შემდეგ ჯორჯიანსელთა ჯერი დადგა. 29-ე წუთზე ვახტანგ ჯვარაშვილის დაარტყმული ბურთი, მეკარე ლომაიამ მოიგერია, მაგრამ დამატებაზე ვახტანგ კეკელიამ იმარჯვა და სხვაობა მინიმუმამდე შეამცირა, 4:3. ავთანდილ ასათიანის ბიჭებმა შეტევები გააგრძელეს და შედეგიც მოიმკეს. 34-ე წუთზე კეკელიას პასი თოფურიამ გოლად აქცია. კიდევ ორ წუთში იტალო ფსილიომ გამარჯვების გოლი გაიტანა. ნიუ ვიჟენმა პსპ-ს ნახევარფინალის მეორე მატჩიც მოუგო და ფინალში გასასვლელად ერთი გამარჯვება სჭირდება.

არმიასა და კსუ-ს მეორე შეხვედრაშიც ანგარიში ისევ არმიელებმა გახსნეს და ამჯერადაც პირველი გოლი ოთარ ბერეჩიკიძემ გაიტანა, მაგრამ ამჯერად ტაიმის ბოლოსწინა წუთზე. მანამდეც და მეორე ტაიმშიც თამაში ორმხრივი შეტევებითა, გარდამავალი უპირატესობით წარიმართა. მეორე ტაიმის შუაწელს საბა მაჩიტიძემ წონასწორობა აღადგინა (1:1) და ამ მეტოქეთა მეორე დაპირისპირებაც ფრედ დასრულდა, ამჯერად 1:1. ეს ანგარიში ორ ოვერტაიმშიც არ შეცვლილა და მეორედაც ჯერი პენალტების სერიაზე მიდგა. აქ კი სტუდენტებს, მეკარე ალი ასლანი მოევლინათ მხსნელად, რომელმაც სამი პენალტი მოიგერია, ერთი პენალტი არმიელბმა კარს გადაცილეს. კავკასიელთაგან გიორგი ჩიმაკაძემ და ლევან ფარცვანიამ გაიტანეს, კსუ-მ პენალტების სერიაში 2:0 მოიგო და ფინალში გასასვლელად ერთი გამარჯვება სჭირდება.

ქვედა ოთხეულებში მეორე ტურის ერთი შეხვედრა გაიმართა, რომელშიც თსუ-მ დინამო თბილისს 7:5 მოუგო. სტუდენტებმა 34 ქულა მოაგროვეს, მდევარ დინამოს უკვე 14 ქულით გაუსწრეს და 4 ტურთ ადრე, ქვედა კვარტეტის ლიდერობა გაინაღდეს.