ფუტსალის უმთავრესი ლიგის ფინალისტების ვინაობა გაცხადდა, ოქროს მედლებისთვის, მოქმედი ჩემპიონი ნიუ ვიჟენ ჯორჯიანსი და კსუ იბრძოლებენ. აღსანიშნავია ის, რომ 3-გზის ჩემპიონი ნიუ ვიჟენისთვის, ეს მე-4 ფინალია. 2021 წლის ჩემპიონი კავასიელებისთვის კი მე-3 ფინალი. ცნობისათვის, 3 წლის წინ, 2022 წელს, ფინალურ სერიაში სწორედ ეს მეტოქეები შეეჭიდნენ ერთმანეთს... მაშინ ჯორჯიანსელებმა ფინალურ სერიაში 3:1 მოიგეს და პირველად იზეიმეს ჩემპიონობა. უახლოესი მომავალი გვიჩვენებს, ამჯერად ვის დარჩება ოქროს მედლები... მანამდე კი ნიუ ვიჟენმა და კსუ-მ ფინალში, გასასვლელად ზედიზედ 3-3 მატჩში იმარჯვეს.

პსპ-სთან მინიმალურად მოგებული 2 მატჩის (4:3 და 5:4) შემდეგ, ჯორჯიანსელებმა ფარმაცევტებს ამჯერად უკვე სოლიდური სხვაობით სძლიეს. ანგარიშის მიუხედავად, თამაში დაძაბულად და საინტერესოდ წარიმართა. პირველივე წუთზე, პსპ-ს მეკარე ნიკოლოზ ფხაკაძემ ვილიან სოუზასა და რონინიოს დარტყმები მოიგერია, მაგრამ დამატებაზე იტალო ფსილიომ ყველას დაასწრო და  ჯორჯიანსი სწრაფი გოლით დაწინაურდა. პსპ-მ მეტოქეს 4 წუთში უპასუხა - მეკარე ფხაკაძემ შეტევა დაიწყო, მოედნის ცენტრს გადასცდა და ძლიერი დარტყმით წონასწორობა აღადგინა. თამაში ორმხრივი შეტევებით გაგრძელდა და მე-13 წუთზე იტალო ფსილიომ მეორე ბურთი გაიტანა, 2:1. ფარმაცეტებმა ბრძოლა გააგრძელეს და ტაიმის ბოლო წუთზე ლევან სვანიძემ ანგარიში გაათანაბრა, 2:2. შესვენების შემდეგ, ორმხრივი შეტევების მიუხედავად, საგოლე მომენტების გამოყენების ხარჯზე, ნიუ ვიჟენმა  ბენეფისი მოიწყო. იტალო ფსილიომ მესამე ბურთიც გაიტანა. ირაკლი თოდუამ, ვახტანგ კეკელიამ, ნიკოლოზ გაბრიჩიძემ და ვილიან სოუზამ კი თითო გოლი მიითვალეს. ნიუ ვიჟენმა 7:2 მოიგო და ფინალში ტრიუმფით გავიდა.

მეტად დრამატული გამოდგა კსუ-სა და არმიას მესამე შეჭიდება. ორმხრივი შეტევების მიუხედავად, პირველი ტაიმის ნახევარზე მეტი უგოლოდ მიილია. მე-14 წუთზე წუთზე ნანეიშვილი-ბერეჩიკიძე-ცირამუას კომბინაცია, შაკო ცირამუამ გოლით დააგვირგვინა და არმია დაწინაუდა, 0:1. შესვენების შემდეგაც უკომპრომისო ბრძოლა გაგრძელდა.  პრესინგის შედეგად, 25-ე წუთზე, კავკასიელებმა მეტოქეს ბურთი აართვეს და საბა მაჩიტიძემ წონასწორობა აღდგინა, 1:1. ორი ძირითადი ტაიმი ამ შედეგით დასრულდა და გამარჯვებულის გამოსავლენად ჯერი ოვერტაიმებზე მიდგა. პირველი 3-წუთიანი ოვერტაიმის დასრულებამდე 6 წამით ადრე, ლუკა ფარცვანიამ, ინდივიდუალური ოსტატობის ხარჯზე მეტოქე ჩამოიშორა, სივრცე გაითავისუფლა, შედეგიანად გაისროლა და კავკასიელებისთვის გამარჯვების გოლი გაიტანა, 2:1. შედეგად, კსუ-მ ზედიზედ 3 მატჩი მოუგო არმიას და ფინალში დამსახურებულად გავიდა.

ასე რომ, ნიუ ვიჟენ ჯორჯიანსსა და კსუ-ს შორის, წინ დრამატული საფინალო სერია გველის. რჩეულთა პირველი ჯახი, ახალ სპორტის სასახლეში 27 მაისს 19 საათზე გაიმართება.