ისევე როგორც 3 წლის წინ, ფუტსალის უმთავრესი ლიგის ჩემპიონობისთვის, ფინალურ რაუნდში ნიუ ვიჟენ ჯორჯიანსი და კსუ გავიდნენ. სწორედ ეს დაპირისპირება გადაწყვეტს, მოქმედი ჩემპიონი ნიუ ვიჟენი მეოთხედ მოიპოვებს ოქროს, თუ კავკასიელები მეორედ გახდებიან ქვეყნის ჩემპიონები. ამას მომავალი გვიჩვენებს, მანამდე კი ფინალური სერიის პირველი მატჩი მიმოვიხილოთ.

თამაშის სტარტზე მეტოქეები ფრთხილობდნენ და თანაბარი ბრძოლა ვიხილეთ. მერე კავკასიელებმა შეტევებში სიმწვავეს უმატეს, გოლი ნელ-ნელა მოამწიფეს და შედეგიც მოიმკეს. მე-7 წუთზე საბა ტყეშელაშვილმა კონტრიერიშისას ორი მეტოქე ჩამოიშორა და ნიკა ხარატიშვილს უპასა, რომელმაც ანგარიში გახსნა. ჯორჯიანსელები გაცხარდნენ და მეტოქეზე ზეწოლა გააძლიერეს, მაგრამ სტუდენტებიც გვარიანად ავიწროებდნენ მოწინააღმდეგეს და მე-10 წუთზე გიორგი ჩიმაკაძის წამოწყებული კონტრიერიში, საბა მაჩიტიძემ გოლით დააგვირგვინა, 0:2. ნიუ ვიჟენმა შეტევებს მეტი სიმწვავე შემატა და ბურთის გატანაც არაერთხელ შეეძლო, მაგრამ კსუ-ს მეკარე ალი ასლანმა იღოჩაღა და პირველ ნახევარში კარის მშრალად შენახვა შეძლო.

მეორე ტაიმის სტარტზე, კავკასიელებს ანგარიშში სხვაობის გაზრდა შეეძლოთ, მაგრამ ჯანიკო გიორგაიას გოლისგან, ნიუ ვიჟენის კარი ძელმა იხსნა. აქედან წუთში, ჯორჯიანსელებმა მეტოქე დასაჯეს. ვახტანგ ჯვარაშვილმა ჯარიმა მოიპოვა, ვილიან სოუზა კარში დარტყმის ნაცვლად, ბურთი ჯვარაშვილს დაუგორა, რომელმაც ძლიერი დარტყმით ანგარიშში სხვაობა მინიმუმამდე შეამცირა, 1:2 ფსიქოლოგიური უპირატესობის ფონზე, ნიუ ვიჟენი ანგარიშის გათანაბრებას შეეცადა, მაგრამ კსუ-მ კარი საიმედოდ დაიცვა. 14-წუთიანი მშრალ მონაკვეთს, ბოლო სამ წუთში სამი გოლი მოჰყვა. 37-ე წუთზე ნიკა ხარატიშვილმა მორიგი კონტრიერიში წამოიწყო და დუბლი გაიფორმა, 1:3. ჯორჯიანსი ვა-ბანკზე წავიდა, მეკარიანად შეუტია და კარი მოაშიშვლა, რითაც კავკასიელებმა ჩინებულად ისარგებლეს და ნახევარ წუთში გიორგი ჩიმაკაძემ სხვაობა სოლიდური გახადა, 1:4. ნიუ ვიჟენმა ამას, იტალო ფსილიოს მიერ, 39-ე წუთზე გატანილი ერთი გოლით უპაუხეს, 2:4.

კსუ-მ ფინალური რაუნდის პირველი მატჩი მოიგო და ოქროსკენ ნაბიჯით წაიწია. ფინალურ რაუნდში ჩემპიონობის გასაფორმებლად 3 მოგებაა საჭირო და ვნახოთ ვინ იმარჯვებს მომდევნო შეხვედრებში. ამ გუნდებს შორის, მეორე მატჩი ახალი სპორტის სასახლეში, 2 ივნისს, 19 საათზე გაიმართება.