ჩემპიონობის ფინალური სერიის პირველ მატჩში მარცხის შემდეგ, ნიუ ვიჟენ ჯორჯიანსმა კსუ-სთან სრულფასოვანი რევანში აიღო და ანგარიში გაათანაბრა. თუმცა, ამაზე ქვემოთ, მანამდე კი ქვედა ოთხეულის რიგით მე-3 ტური მიმოვიხილოთ.

ფრისა და მარცხის მერე,  დინამო თბილისმა ქვედა ოთხეულში პირველი გამარჯვება ბეტის თბილისთან იზეიმა, რაშიც დინამოელთა ბომბარდირმა ლაშა-გიორგი ობოლაძემ, 4 ბურთის გატანით, ლომის წვლილი დაიდო. თითო გოლი თეიმურაზ ექიზაშვილმა და ბექა მაისაიამ გაიტანეს. ბეტისმა დინამოსთან ორი განსხვავებული ტაიმი აჩვენა. ბეტისელები მთელი მატჩის განმავლობაში მდევრის როლში იყვნენ. პირველ ტაიმში ერთი, მეორეში კი 3 ბურთი გაიტანეს. დავით უდუმაშვილმა, გიორგი კურტანიძემ, თეგა პატარაიამ და სანდრო ბითაძემ თითო გოლის ავტორობა იკმარეს. დინამო თბილისმა 6:4 იმარჯვა. ამ წაგებით ბეტის თბილისი, 3 ტურით ადრე, UG-წალენჯიხას უკვე 11 ქულით ჩამორჩა, რაც იმას ნიშნავს რომ, ბეტის თბილისი ფუტსალის უმთავრესი ლიგიდან დაქვეითდა.

ფრისა და მოგების შემდეგ, UG-წალენჯიხა თსუ-სთან დამარცხდა. არა და, ანგარიში სწორედ წალენჯიხელებმა გახსნეს და მე-4 წუთზე ნიკა ხარშილავას გოლით დაწინაურდნენ, 1:0. თუმცა, ტაიმის ბოლო 4 წუთში, ნოდარ ქურცაძისა და ლუკა ელიზბარაშვილის გატანილი ბურთებით თსუ წინ გავიდა, 1:2. შესვენების შემდეგ სტუდენტებმა, გიორგი აფციაურის, ნიკა ჩალაძის, გიორგი ხაბალაევის თითი გოლით, ასევე უდესიანის ავტოგოლით, გვარიანი ფორა მოიპოვეს, 1:6. ამას,UG-მ, გურამ ჩალიგავას მხოლოდ ერთი გატანილი ბურთით უპასუხა. UG-წალენჯიხა 2:6 დამარცხდა და 3 ტურით ადრე, დინამოს 5 ქულით ჩამორჩება.

ჩემპიონობის ფინალური სერიის პირველ შეხვედრაში გამარჯვების შემდეგ, მეორე მატჩში ანგარიში კავკასიელებმა გახსნეს. მე-9 წუთზე გიორგი ჩიმაკაძის დარტყმისას, ბურთი რიკოშეტით ცხრიანში გაეხვა და ეფექტური გოლით კსუ დაწინაურდა, 1:0. ჯორჯიანასელებმა ამას, მე-16 წუთზე, საჯარიმო დარტყმით, ვილიან სოუზას ასევე ეფექტური გოლით უპასუხეს და ტაიმიც ამ შედეგით (1:1) დასრულდა. 21-ე წუთზე, საბა მაჩიტიძის ფეხიდან ასხლეტილი ავტოგოლით ნიუ ვიჟენი დაწინაურდა, კავკასიელები ანგარიშის გათანაბრებას შეეცადნენ და მეკარიანად შეუტიეს. ჯორჯიანსმა კარის დაცვასა და კონტრშეტევებზე გააკეთა აქცენტი და შედეგიც მოიმკა. სტუდენტების აქტიურობის მატებას, გაფრთხილებების მატება მოჰყვა, რამაც ნიუ ვიჯენი პენალტს დაახლოვა. 35-ე წუთზე, მეორე გაფრთხილების გამო, კსუ-ს მეკარე ალი ასლანს მოედნის დატოვება მოუწია. ჯორჯიანსიდან ვილიან სოუზამ პენალტი გაიტანა და ფორა გააორმაგა, 1:3. ნახევარ წუთში, ვახტანგ ჯვარაშვილმა პრესინგით იხეირა და ანგარიშში სხვაობას სოლიდური სახე მისცა, 1:4. ნიუ ვიჟენმა კონტრშეტევებზე თამაში გააგრძელა და 37-ე წუთზე ვილიან სოუზამ, თავისსავე წამოწყებული კონტრიერიში მესამე გოლით დააგვირგვინა და თამაშის ბედი გადაწყვიტა, 1:5. ამას კსუ-მ გიორგი ზუნტუროვის მიერ, ბოლო წუთზე გატანილი ერთადერთი გოლით უპასუხა. ნიუ ვიჟენ ჯორჯიანსმა 2:5 მოიგო და საჩემპიონო ფინალურ სერიაში ანგარიში გაათანაბრა. შესაბამისად, ჩემპიონის გამოსავლენად ფინალურ სერიაში მინიმუმ 2 მატჩი გველის. ამ გუნდებს შორის მომდევნო, რიგით მესამე შეხვედრა 9 ივნისს გაიმართება.