ოქროს მედლებამდე და მეორედ გაჩემპიონებამდე, კავკასიელებს ერთი მოგება სჭირდებათ. საჩემპინო ფინალურ სერიაში, კსუ-მ მეორედ მოუგო ნიუ ვიჯენ ჯორჯიანს. თუმცა, ამაზე ქვემოთ, მანამდე კი ქვედა ოთხეულის თამაშები მიმოვიხილოთ.

დინამო თბილისთან უხვგლიანი ფრის (6:6) შემდეგ, UG-წალენჯიხამ 3:2 მოუგო ბეტის-თბილისს. წალენჯიხელთაგან ვაჟა კვარაცხელიამ დუბლი შეასრულა, გურამ ჩალიგავამ კი ერთი ბურთი გაიტანა. ბეტისელთაგან ნიკოლოზ ბიწაძე და თეგა პატარაია თითო გოლით გამოირჩნენ. დასკვნითი ტურის წინ, UG-წალენჯიხა 22 ქულით მე-7 ადგილზეა და 2 ქულით ჩამორჩება წინა საფეხურზე მყოფ დინამო თბილისს. შესაბამისად, ქვედა ოთხეულის ბოლო, მე-6 ტური გადაწყვეტს, ვინ დარჩება ფუტსალს მთავარ ლიგაში ავტომატურად და ლიგაში ადგილის შენარჩუნებისთვის ვის მოუწევს ფლეი აუტში ბრძოლა.

ქვედა ოთხეულში ცხრილის ლიდერმა თსუ-მ დინამო თბილისს სარეკორდო ანგარიშით 3:14 სძლია, რითაც UG-წალენჯიხას, ფლეი აუტის გარეშე, ლიგაში დარჩენის შანსი შეუნარჩუნა. სტუდენტებიდან, გიორგი ხაბალაევმა 5 ბურთის გატანით ბენეფისი მოიწყო, ნიკა ჩალაძემ კი დუბლი შეასრულა. გიორგი აფციაურმა, მელტონ ახალაიამ, ლაშა ერქომაიშვილმა, ლუკა ელიზბარაშვილმა, ალექსი ტკაჩოვმა, ალექსანდრე ორაგველიძემ და რომან კუხიანიძემ, თითო ბურთი გაიტანეს. დინამოდან თეიმურაზ ექიზაშვილი, კახაბერ მაისაია და გიგა ლაგაზაშვილი თითო გოლს დასჯერდნენ.

საჩემპიონო ფინალურ სერიაში კვლავ კსუ დაწინაურდა. წინა მატჩში მარცხის შემდეგ, კავკასიელებმა სრულფასოვანი რევანში აიღეს და ჯორჯიანსელებს 2:5 სძლიეს. ნიუ ვიჟენმა აქტურად დაიწყო თამაში და მე-5 წუთზე ბრაზილიური გოლით დაწინაურდა. რონინიომ, მარცხენა ფრთაზე განხორციელებულ სოლო-რეიდს, გამჭოლი პასი მიაყოლა, რომელიც იტალო ფსილიომ გოლით დააგვირგვინა, 1:0. კავკასიელებმა ამას ორიოდე წუთში უპასუხეს, ზურაბ ლუკავას გამჭოლი პასი, ჯანიკო გიორგაიამ გოლით დააფასა, 1:1. თამაში ორმხრივი შეტევებით გაგრძელდა და ჯორჯიანსელებმა კიდევ ერთხელ იმარჯვეს. კსუ-ს მეკარე ბექა გოგსაძე იტალო ფსილიოს გასროლას გადაეფარა, მაგრამ მე-12 წუთზე ვილიან სოუზას დარტყმისას უძლური აღმოჩნდა, 2:1. კავკასიელებმა მეტოქეზე ზეწოლა გააძლიერეს და მდევრის როლი მეტოქეს გადაულოცეს. მე-18 წუთზე ნიკა ხარატიშვილმა ძლიერი დარტყმით წონასწორობა აღადგინა, 2:2. ნახევარ წუთში საბა ტყეშელაშვილმა პენალტი გოლად აქცია და კავკასიელები წინ, პირვველად გავიდნენ, 2:3. ნიუ ვიჟენმა მეორე ტაიმი აქტიურად დაიწყო, მაგრამ კსუ-ს მეკარე ბექა გოგსაძემ კვლავაც არაერთი რთული ბურთი მოიგერია. კავკასიელებმა დაცვიდან თამაში ირჩიეს, მაგრამ პერიოდულად პრესინგაც მიმართავდნენ და ამან გაამართლა კიდეც. 30-ე წუთზე პრესინგისას, ლუკა ფარცვანიამ მეტოქეს ბურთი აართვა, მისი დარტყმული თორნიკე ბუკიამ მოიგერია, მაგრამ დამატებაზე ნიკა ხარატიშვილმა გაიტანა და კსუ-ს ორბურთიანი ფორა შეუქმნა, 2:4. ნიუ ვიჟენს 10 წუთზე მეტი ჰქონდა თამაშის გადასარჩენად, მაგრამ ეს დრო კავკასიელებმა უფრო შედეგიანად გამოიყენეს. არა და, გაფრთხილებების სიმრავლის გამო, ჯორჯიანსელებს პენალტით შეეძლოთ ანგარიშში სხვაობის მინიმუმამდე შემცირება, მაგრამ ეს შანსი ვერ გამოიყენეს. კავკასიელებმა კი 37-ე წუთზე იხეირეს, საბა ტყეშელაშვილმა თავისსავე მიერ წამოწყებული კონტრშეტევა გოლით დააგვირგვინა და მატჩის საბოლოო ანგარიში, 2:5 დააფიქსირა.

საჩემპიონო ფინალური სერიის მორიგი ჯახი, ახალ სპორტის სასახლეში 13 ივნისს, 18 საათზე გაიმართება. საკიხავია, ამ დღეს კსუ იზეიმებს ჩემპიონობას, თუ ნიუ ვიჟენ ჯორჯიანსი მეორე გამარჯვებას, ამას მომავალი გვიჩვენებს.