ქართული ფუტსალის ისტორიაში პირველად, სუპერთასის გათამაშება გაიმართა, რომელშიც ტრადიციულად ჩემპიონი და თასის მფლობელი დაუპირისპირდნენ ერთმანეთს. თასის მფლობელი ნიუ ვიჟენ ჯორჯიანსი, საჩემპიონო ფლეო ოფის ფინალშიც შეეჭიდა კსუ-ს. თუმცა, 5-მატჩიან საჩემპიონო სერიაში კავკასიელებმა იმარჯვეს და ოქროს მედლებს მეორედ დაეუფლნენ. ფუტსალის ლიგის ორი ფავორიტის შერკინება ამჯერადაც დრამატული გამოდგა. სწორედ ისეთი, სუპერთასს რომ ეკადრებოდა...

მართლაც რომ ლომების აღლუმი ვიხილეთ სუპერთასის მატჩის დრამატულობაზე ისიც მეტყველებს, რომ პირველი ტაიმის საწყისი 15 წუთი უგოლოდ გაილია. ორმხრივი შეტევების მიუხედავად, თამაში მშრალად წარიმართა, რაც ორივე გუნდის მეკარეების დამსახურებაცაა. მე-16 წუთზე რონინიომ სტუდენტების შეტევა ჩაჭრა, მეტოქის ფეხბურთელთა შეუთანხმებლობით ნიკა ბიძინაშვილმა იმარჯვა და კონტრიერიში გოლით დააგვირგვინა, 0:1. შესვენებამდე დარჩენილ დროში და მეორე ტაიმშიც, კსუ წონასწორობის აღდგენას შეეცადა, მაგრამ ნიუ ვიჟენის კიპერმა ბექა ტყემალაძემ არაერთ რთულ მომენტში, აშკარა გოლისგან იხსნა კარი. 31-ე წუთზე, მარცხენა ფრთიდან ლუკა ფარცვანიას ჩაწოდებისას, ჯანიკო გიორგაიას დარტყმული ბურთი ტყემალაძემ მოიგერია, მაგრამ გიორგაიას მეორე მცდელობა შედეგიანი აღმოჩნდა და ანგარიში გათანაბრდა. ამან ჯორჯიანსელები გააბრაზა, მათ უფრო მწვავედ შეუტიეს და შედეგიც მიიღეს. 33-ე წუთზე ვახტანგ კეკელიამ ბოლომდე ბრძოლით მოიპოვა ბურთი და გამჭოლი პასით ნიკოლოზ გაბრიჩიძე მოძებნა, რომელმაც ნიუ ვიჟენი წინ გაიყვანა, 1:2. აქედან წუთიც არ იყო გასული, როცა მეტოქის შეცდომით ნუკრი ჭუმბურიძემ კარგად ისარგებლა და ფორა გააორმაგა, 1:3. კსუ ვა-ბანკზე წავიდა, მეკარიანად შეუტია, რითაც ნიუ ვიჟენ ჯორჯიანსმა ჩინებულად ისარგებლა. მატჩის ბოლო წუთზე, რონინიომ სტუდენტების შეტევა ჩაჭრა და ტაბლოზე საბოლოო ანგარიში დააფიქსირა, 1:4. ფუტსალში სუპერთასის პირველი გათამაშება ჯორჯიანსელებმა მოიგეს და გასულ სეზონში მოპოვებულ თასს, სუპერთასიც მიამატეს.