ფუტსალის ლიგაში ახალი სეზონი ფრის გარეშე დაიწყო და ოთმა გუნდმა გამარჯვება იზეიმა. კსუ, ნიუ ვიჟენ ჯორჯიანსი, პსპ და არმია, დიდი ალბათობით, ჩემპიონობისთვის სწორედ ეს კვარტეტი იბრძოლებს. სასტარტო ტურში, ჯამში 23 გოლი გავიდა, რაც ერთ თამაშში საშუალოდ, თითქმის 6 გოლის ტოლფასიარაც ჩინებული მაჩვენებელია.

ახალი სეზონი არმიასა და UG მატჩით გაიხსნა. უნივერსიტეტელები გაბედულად დაუხვდნენ მრისხანე მეტოქეს. ისინი არა მარტო საიმედოდ იცავდნენ კარს, არამედ კონტრშეტევებითაც ხშირად აწუხებდნენ მოწინააღმდეგეს. არმიელებმა არაერთი საგოლე მომენტი ქარს გაატანეს და შედეგად პირველი ტაიმი უგოლოოდ მთავრდებოდა, მაგრამ... შესვენებამდე 15 წამით ადრე, არმიელთა მორიგი შეტევისას გიგა ბერაიამ ზუსტი დარტყმით ანგარიში გახსნა, 1:0. მეორე ტაიმშიც იგივე სცენარი გაგრძელდა, არმია უტევდა, UG თავსაც საიმედოდ იცავდა და კონტრშეტევებსაც ახერხებდა. თუმცა, არმიელთა იერიშები უფრო შედეგიანი აღმოჩნდა. 25-ე წუთზე ნოდარ ქურცაძის გამჭოლი პასი ბაკურ ნანეიშვილმა გოლად აქცია, 2:0. აქედან 5 წუთში გიგა ბერაიამ სტუდენტების შეტევა ჩაჭრა და ოთარ ბერეჩიკიძემ ტაბლოზე საბოლოო ანგარიში დააფიქსირა, 3:0. მარცხის მიუხედავად, UG-მ ისეთი შთაბეჭდილება დატოვა, რომ მის წინააღმდეგ იოლი გასეირნება არავის ექნება.

ტურის მომდევნო მატჩი უფრო დრამატული და უხვგოლიანი აღმოჩნდა. გამოცდილ პსპ-ს, დინამო თბილისი დიდი მონდომებით ეკვეთა. დინამოელებმა კონტრშეტევებზე გააკეთეც აქცენტი, მაგრამ მოგვიანებით ტაქტიკა შეცვალეს. ამ შეხვედრაშიც ტაიმი თითქმის უგოლოდ მთავრდებოდა, მაგრამ მე-18 წუთზე შორეული და მოულოდნელი დარტყმით, კახაბერ მაისაიამ ეფექტური გოლით გახსნა ანგარიში, 0:1. დინამომ ეს არ იკმარა და... ტაიმის ბოლოსწინა წამზე მეკარე ზაურ კოტრიკაძე მეტოქის დარტყმულ ბურთს დაეუფლა, დაინახა რომ პსპ-ს კარი ცარიელი იყო და შორეული დარტყმით ფორა გააორმაგა, 0:2. ფარმაცევტებმა მეორე ტაიმში შეტევები გაამწვავეს და 24-ე წუთზე ნიკოლოზ კოპლატაძემ ანგარიშში სხვაობა მინიმუმამდე შეამცირა, 2:1. ფარმაცევტებმა მეკარიანად შეუტიეს, რითაც კარგა ისარგებლეს დინამოელებმა. 27-ე წუთზე  მათ მეტოქის იერიში ჩაჭრეს, მაისაიამ შორეული დარტყმით ორბურთიანი ფორა აღადგინა, 1:3. ფარმაცევტებმა შეტევებს მეტი ორგანიზებულობა და სიმწვავე შემატეს და 6 წუთში 4 ბურთის გატანა შეძლეს - კოპლატაძემ მეორედაც გაიტანა, 31-ე წუთზე ლევან სვანიძემ ანგარიში გაათანაბრა, 3:3. აქედან 3 წუთში, ალექსანდრე ორაგველიძემ  პსპ წინ გაიყვანა, 4:3. ათ წამში სვანიძემ მეორე გოლიც იზეიმა და ფორა გააორმაგა, 5:3. გეგა კოშაძემ სხვაობა მინიმუმამდე კი შეამცირა, მაგრამ პსპ-დან ნიკოლოზ კურტანიძემ გაიტანა. საბოლოოდ პსპ-მ 6:4 იმარჯვა და გასული სეზონის პირველ ტურში დინამოსთან მარცხის გამო, მეტოქეზე რევანში აიღო.

ჯორჯიანსელებმა შევარდნები დაიფრინეს... საქართველოს თასისა და სუპერთასის გამარჯვებული, 3-გზის ჩემპიონი ნიუ ვიჟენ ჯორჯიანსი, რიგით მეორე ლიგის ფინალისტსა და მთავარი ლიგის დებიუტანტ FLC03-თან შეხვედრაში, ფავორიტად იყო მიჩნეული, მაგრამ ანგარიშის გახსნა დაუგვიანდა. მე-10 წუთზე ირაკლი თოდუას კარგი გადაცემა ნიკოლოზ გაბრიჩიძე გოლით დააფასა, 1:0. ორიოდე წუთში ნიკოლოზ გაბრიჩიძემ საჯარიმო დარტყმით დუბლი შეასრულა, 2:0. წუთიც არ იყო გასული და გიორგი აფციაურმა სხვაობა სამამდე გაზარდა. მე-18 წუთზე კი ირაკლი თოდუამ გაიტანა და პირველ ტაიმში მატჩის საბოლოო ანგარიში დააფიქსირა, 4:0.

ტურის ბოლო შეხვედრაში, სტუდენტურ დერბიში კსუ-მ დიდი ანგარიშით იმარჯვა. კავკასიელებმა ლიგის დებიუტანტი სეუ მიიღეს და თითო ტაიმში 3-3 გოლი იზეიმეს. ჯანიკო გიორგაიამ დუბლი მიითვალა. ლუკა ფარცვანიამ, საბა მაჩიტიძემ და გიორგი ჩიმაკაძემ თითო ბურთი გაიტანეს. 38-ე წუთზე ფარცვანიას დარტყმული ბურთი ძელმა აისხლიტა, სეუ-ს მეკარე ვასილ ცქიტიშვილს მოხვდა და კარში აღმოჩნდა. მოქმედმა ჩემპიონმა კსუ-მ 6:0 მოიგო.

სასტარტო ტურის შემდეგ, ერთბაშად 4 გუნდი გალიდერდა. თუმცა, ცხრილში პირველ ადგილზეა კავკასიელები არიან, რადგან ყველაზე დიდი ანგარიშით გაიმარჯვეს. მომდევნო ტურში (7 ოქტომბერს) ლიდერი კვარტეტი სავარაუდოდ დაიშლება, რადგან ტურის ცენტრალურ შეხვედრაში, კსუ ნიუ ვიჟენ ჯორჯიანსს უმასპინძლებს.