ფუტსალის მთავარი ლიგის მეორე ტურიც უხვგოლიანი გამოდგა. წინა მიმოხილვაში გაჟღერებული ჩვენი პროგნოზი სრულად გამართლდა და მოწინავე კვარტეტი ტრიოდ გადაიქცა. ცხრილს 6-6 ქულით, ახლა უკვე 3 გუნდი ლიდერობს. ამ სამეულიდან ყველაზე რთული ბარიერი კავკასიელებმა გადალახეს, თან რევანშის აღებაც შეძლეს. არანაკლებ აღსანიშნავია ის, რომ ლიგის დებიუტანტი სეუ პირველი სენსაციის ავტორად მოგვევლინა... ამაზე ქვემოთ, მანამდე კი თანმიმდევრობას მივყვეთ.

არმიელებმა შევარდნები დაიფრინეს. როგორც აღმოჩნდა, ლიგის დებიუტანტ  FLC03, მრისხანე არმიასთან შანსი არ ჰქონდა. არმიელებმა შევარდნები 8 გოლით დაასაჩუქრეს. მატჩის დასრულებამდე ნახევარი წუთით ადრე, FLC03-მ  პრესტიჟის და თანაც ფუტსალის მთავარ ლიგაში შევარდნების პირველი გოლის გატანა, საბა აბრამიშვილმა შეძლო. არმიადან, ნოდარ ქურცაძემ ჰეთ თრიკი შეასრულა. ოთარ ბერეჩიკიჩემ, ლაშა ფოფხაძემ, ბაკურ ნანეიშვილმა, გიგა ბერაიამ და ბექა გოგსაძე, თითო ბურთი გაიტანეს. ამ გამარჯვების შედეგად, გოლების ბალანსით, არმია, მოწინავე სამეულში პირველია, შევარდნები კი ბოლო საფეხურზე არიან.

მატჩის მე-5 წუთზე საბა ეგრისელაშვილის გამჭოლი პასი, გეგა კოშაძემ გოლით დააფასა, დინამო თბილისმა სეუ-სთან მატჩში ასე გახსნა ანგარიში, 0:1. აქედან 3 წუთში თეიმურაზ ექიზაშვილმა შორეული, ძლიერი დარტყმით, დინამოელთა ფორა გააორმაგა, 0:2. ყველაფერი მოლოდინისამებრ მიდიოდა - დინამო მშვიდად და თანაც 2-ბურთიანი სხვაობით იგებდა. სტუდენტების იერიშები თითქოსდა საფრთხეს არ უქმნიდა დინამოს, მაგრამ სეუ-მ ბოლომდე იბრძოლა და დაუფასდა კიდეც. მე-17 წუთზე ნიკა სიდამონიძემ კუთხურიდან მოწოდებული ბურთი, შორიდან კარისკენ გაისროლა და ეფექტური გოლით ანგარიშში სხვაობა მინიმუმამდე შეამცირა, 1:2. მეორე ტაიმში სტუდენტებმა შეტევებს უფრო ორგანიზებული და მწვავე ხასიათი შემატეს, რამაც შედეგი გამოიღო. 23-ე წუთზე სიდამონიძის პასით სანდრო ობოლაძემ ანგარიში გაათანაბრა, 2:2. მატჩის დასრულებამდე საკმაო დრო იყო დარჩენილი, რომელიც ორმხრივ შეტევებში გაილია. ორივე გუნდს ჰქონდა გოლის გატანის რეალური შანსი, მაგრამ ვერ გამოიყენეს. შესაბამისად, შეხვედრის ფინალი მეტად დრამატული გამოდგა, მატჩის დასრულებამდე 2 წუთით ადრე, დინამომ გაფრთხილებების ლიმიტი ამოწურა. სტუდენტებმა კი 2 წითელი ბარათი მიიღეს, მათ პრესინგზე ამჯობინეს თამაში და ბოლო წუთზე იხეირეს კიდეც. სანდრო ობოლაძემ დინამოელთა გადაცემა ჩაჭრა და გამარჯვების გოლი გაიტანა. სეუ-მ 3:2 მოიგო და სეზონის პირველი სენსაციის ავტორად მოგვევლინა. ამ მოგების შედეგად, ნიუ ვიჟენთან ერთად, სეუ-ს, 3 ქულა აქვს და მე-5 ადგილზეა. დინამო კი უქულოდ მე-6 საფეხურზეა.

UG-სთან დამაჯერებლად იმარჯვა პსპ-მ. ფარმაცევტებმა, დიდი ანგარიშით, 1:7 მოიგეს. მათგან ალექსანდრე ორაგველიძემ დუბლი მიითვალა. ნიკა გვაზავამ, ნიკოლოზ კურტანიძემ, ლევან სვანიძემ, ალექსი ტკაჩოვმა და გიგი მოლაიამ თითო ბურთი გაიტანეს. სტუდენტებიდან პრესტიჟის გოლი მიქაელ იორამაშვილის ანგარიშზეა. პსპ-მ მოიგო და 6 ქულით ლიდერთა ტრიოშია.

საოცრად დრამატული გახლდათ ტურის ცენტრალური შეხვედრა, რომელშიც კსუ-სა და ნიუ ვიჟენ ჯორჯიანსის შეერკინება ვიხილეთ. სხვათა შორის, ეს გუნდები, ერთი კვირის წინ, სუპერთასისთვის შეეჭიდნენ ერთმანეთს და იმ მატჩში ნიუ ვიჟენმა იმარჯვა. დერბი ამჯერადაც დრამატული რომ გახლდათ, ამაზე ისიც მეტყველებს, რომ არაერთი საგოლე მომენტის მიუხედავად, პირველი ნახევარი უგოლოდ დასრულდა. მეორე ტაიმის სტარტზე კავკასიელებმა იმარჯვეს. 22-ე წუთზე საბა ტყეშელაშვილი ჩინებული პასით გიორგი ჩიმაკაძე გაისროლა, მოგერიებული ბურთზე, იმავე ჩიმაკაძემ ორ მცველს დაასწრო და ანგარიში გახსნა, 1:0. ამას ჯორჯიანსელთა გააფთრებული შეტევები მოჰყვა, რომელმაც გვიან, მაგრამ შედეგი მაინც მოიტანა. 34-ე წუთზე ვახტანგ კეკელიამ კარში გაისროლა, სტუდენტებმა ბურთი მოიგერიეს, მაგრამ დამატებაზე ირაკლი თოდუა ანგარიში გაათანაბრა, 1:1. კსუ-მ შეტევები გაამძაფრა და 37-ე წუთზე პირისპირ გასული ლუკა ფარცვანიას წაქცევისთვის, ნიუ ვიჟენის მეკარე თორიკე ბუკია, არბიტრმა მოედნიდან გააძევა. კარში ბექა ტყემალაძე ჩადგა, მაგრამ ორწუთიანი რიცხობრივი უპირატესობა, კავკასიელებმა კარგად გამოიყენეს და 38-ე წუთზე ნოდარ ქურცაძემ გამარჯვების გოლი გაიტანა. მოქმედმა ჩემპიონმა კსუ-მ იმარჯვა, სუპერთასზე მარცხის გამო, ნიუ ვიჟენ ჯორჯიანსზე რევაში აიღო და ცხრილში მოწინავე სამეულშია.

მომდევნო ტურში მოწინავე ტრიო კიდევ ერთხელ შემცირდება, რადგან კსუ-ს კიდევ ერთი დერბი მოუწევს, ამჯერად არმიასთან. შაბათს, 11 ოქტომბერს, მე-3 ტური სწორედ ამ მატჩით გაიხსნება.