კავკასიელებს მეორე ზეობა აღნიშნეს, მეორე დერბიშიც იმარჯვეს - ამჯერად არმიას სძლიეს. როგორც წინა მიმოხილვაში ვივარაუდეთ, ლიდერთა ტრიო დუეტად გადაიქცა. დაუმარცხებელი ახლა მხოლოდ ორი გუნდია - პსპ და კსუ... ბომბარდირთა ცხრილს 5-5 გოლით, ერთბაშად 4 ფეხბურთელი ლიდერობს. ახალი სეზონის პირველი გამორჩეული შედეგიც დაფიქსირდა, 10 გოლი ერთ მატჩში და ეს პსპ-მ მოახერხა... ეს და სხვა ამბები მოხდა ფუტსალის უმთავრესი ლიგის მე-3 ტურში. ახლა კი თანმიმდევრობას მივყვეთ.

არმიასა და კსუ-ს ეს დერბიც, ტრადიციულად დაძაბულად და საინტერესოდ წარიმართა. წინა შეხვედრებისგან, ეს მატჩით იმით განსხვავდებოდა, რომ თამაში უხვგოლიანი არ გამოდგა. გამარჯვებულის ბედი, ერთმა გატანილმა ბურთმა გადაწყვიტა. ორივე ტაიმი ერთნაირი სცენარით წარიმართა - ორივე გუნდი უტევდას და საგოლე მომენტებიც ორივე კართან შეიქმნა. თუმცა, განსაკუთრებით პირველ ტაიმში, ორივე მეტოქე საკუთარი კარის უსაფრთხოებაზე უფრო იყო აქცენტირებული. ამიტომაც, მეტოქეები შესვენებაზე უგოლოდ გავიდნენ. მატჩის სასტარტო 10 წუთი ხისტი გამოდგა. შედეგად არმიელებმა გაფრთხილებების ლიმიტი ამოწურეს, კავკასიელებმა სიფრთხილეს უმატეს, მაგრამ მეხუთე ჯარიმა ბოლოსწინა წუთზე მიიღეს, რასაც პენალტი მოჰყვა. მე-20 წუთზე გიორგი ქურდაძეს შეეძლო 10-მეტრიანი დარტყმით ანგარიშის გახსნა, მაგრამ სტუდენტების მეკარე ალი ასლანმა ბურთი კუთხურზე მოიგერია. მეორე ტაიმის სტარტზე, 22-ე წამზე კავკასიელებმა მატჩის ერთადერთი გოლი იზეიმეს. გიორგი ჩიმაკაძის სოლო რეიდი, ჯანიკო გიორგაიამ მახვილი კუთხიდან ეფექტური დარტმით გააგრძელა და ანგარიშიც ასე გაიხსნა, 0:1. მატჩის ბოლომდე ორივე კართან არაერთი საგოლე მომენტი შეიქმნა. მეტოქეებს შეეძლოთ ანგარიშის შეცვლა, მაგრამ ეს ვერ მოახერხეს. ნიუ ვიჟენთან გამარჯვების შემდეგ, კსუ-მ მეორე დერბიშიც იმარჯვა და პსპ-სთან ერთად ცხრილს ლიდერობს. არმია კი 6 ქულით მე-3 საფეხურზეა.

თასისა და სუპერთასის მფლობელმა „ნიუ ვიჟენ ჯორჯიანსმა“, წინა ტურისა და ახალი სეზონის პირველი სენსაციის ავტორ სეუ-ს სძლია, თანაც დამაჯერებლად, 6:3. ჯორჯიანსელთაგან 3 გოლი ნიკოლოზ გაბრიჩიძის ანგარიშზეა, ნიკა ბიძინაშვილმა დუბლი შეასრულა, ერთი გოლიც ირაკლი თოდუამ გაიტანა. აღსანიშნავია ის, რომ ნიუ ვიჟენს აქამდე 2 გოლი ჰქონდა გაშვებული და ორივე ცხრილის ლიდერმა კსუ-მ გაუტანა. ამაზე უფრო მეტი სეუ-მ შეძლო - 3 გოლი გაიტანა. უნივერსიტეტელთაგან სამივე ბურთი სანდრო ობოლაძის ანგარიშზეა. საგულისხმოა ის, რომ ამ მატჩში ჰეთ თრიკის ორივე ავტორი, ნიკოლოზ გაბრიჩიძე და სანდრო ობოლაძე, ჯამში 5-5 გოლით, ბომბარდირთა სიის ლიდერ კვარტეტში (პსპ-ელ ლევან სვანიძესთან და ნიკოლოზ კურტანიძესთან ერთად) არიან. ჯორჯიანსელები 6 ქულით მე-4 ადგილზე არიან, სეუ კი 3 ქულით მე-6 საფეხურზეა.

პსპ-მ ათიანი გაისროლა და ამ სეზონის პირველი გამორჩელი შედეგიც გამოაცხო - 10 გოლი ერთ მატჩში. ფარმაცევტებმა FLC03-ს 10-3 მოუგეს. პსპ-დან მელტონ ახალაიამ ჰეთ თრიკი შეასრულა, ლევან სვანიძემ და ნიკოლოზ კურტანიძემ დუბლები მიითვალეს, ალექსი ტკაჩოვმა, ნიკა ჩალაძემ და გიორგი ქურხულმა თითო ბურთი გაიტანეს. შევარდნებიდან, დავით ბერაძეს, ლევან გიგოიძესა და საბა აბრამიშვილს, თითო გოლის ავტორობა ერგოთ. კსუ-ს მსგავსად, სამივე მატჩის მომგები პსპ, ცხრილში თანალიდერია და ბურთების უკეთესი ბალანსით პირველია. FLC03 ისევ უქულოდაა და კვლავ ცხრილის ფსკერზეა.

UG მესამე ტურშიც დამარცხდა, ამჯერად დინამო თბილისთან. ლუკა ელიზბარაშვილის, თეიმურაზ ექიზაშვილისა და კახაბერ მაისაიას თითო გოლით, დინამოელებმა,  3:0 იმარჯვეს. დინამო თბილისმა სეზონის პირველი გამარჯვებით, პირველი ქულები მოიპოვა და ცხრილში მე-6-დან მე-5 ადგილზე აინაცვლა. UG კი უკვლავ უქულოდაა და მეშვიდეზეა.

მე-4 ტური პაუზის შემდეგ, 27 ოქტომბერს შედგება და დიდი ალბათობით ცხრილს ერთი ლიდერი ეყოლება, რადგან ტურის ცენტრალურ მატჩში, ორი დაუმარცხებელი ლიდერი, კსუ და პსპ ერთმანეთს შეერკინება. არანაკლებ საინტერესო იქნება ნიუ ვიჟენ ჯორჯიანსისა და არმიას დაპირისპირება, რომლებსაც ასევე თანაბარი (6-6) ქულა აქვთ.