გასული ტურის შემდეგ, ორი გუნდი იყო უძლეველი და მათ შორის ერთმა იმარჯვა. შესაბამისად, კავკასია უდანაკარგოდ დარჩა. უკვე თამამად შეიძლება ითქვას, რომ მოქმედმა ჩემპიონმა, ახალი სეზონი რიხიანად დაიწყო. კსუ-მ 4 ტურში ქულათა მაქსიმუმი, 12 ქულა მოიპოვა და ცხრილს დამაჯერებლად ლიდერობს. პირველი ქულები და მოგება მიითვალა UG-მ, არმიამ კი დერბიში იმარჯვა. ასეთია, ფუტსალის მთავარი ლიგის მე-4 ტურის მოკლე ანონსი. უფრო ვრცლად კი თანიმდევრობას მივყვეთ...

პსპ-სთან და დინამო თბილისთან მარცხების შემდეგ, UG-მ მეტოქეს შანსი არ დაუტოვა, სტუდენტურ დერბიში სეუ-ს, ტაიმში 3-3 გოლი გაუტანა და დიდი ანგარიშით, 1:6 იმარჯვა. UG-დან დავით თაბაგარმა, ვაჟა კვარაცხელიამ, გიორგი კურტანიძემ, ბადრი კალანდაძემ, საბა დავითულიანმა და გიორგი მანაგაძემ თითო გოლი იზეიმეს. სეუ-დან პრესტიჟის გოლი გურამ ჩალიგავამ გაიტანა. UG პირველი მოგებით, სეუ-ს ქულებით გაუთანაბრდა და ბურთების უკეთესი ბალანსის წყალობით მე-6 საფეხურზეა, სეუ კი მეშვიდეა.

ნიუ ვიჟენ ჯორჯიანსთან და არმიასთან მოგებების შემდეგ, კსუ-ს მორიგი რთული თამაში ჰქონდა პსპ-თან. სტუდენტების სასარგებლოდ უნდა ითქვას, რომ მათ ეს გამოცდაც ჩინებულად ჩააბარეს. შეხვედრა პსპ-ს აქტიურობით დაიწყო, მაგრამ კავკასიელებმა მეტოქეს მალევე ჩამოართვეს თამაშის სადავეები და მე-6 წუთზე ანგარიშიც გახსნეს - ლუკა ფარცვანიამ მახვილი კუთხიდან კავკასიელები დააწინაურა, 1:0. სტუდენტები ამას არ დასჯერდნენ და 3 წუთში ფორა გააორმაგეს: საბა ტყეშელაშვილმა ბურთი საჯარიმოში ჩააწოდა, მაგრამ ნიკოლოზ კურტანიძის მიერ მოგერიებული ბურთი, კარის ბადეში აღმოჩნდა, 2:0. ამან პსპ გაახელა და მათ მეკარიანად შეუტიეს, კავკასიელებმა არა თუ კარი დაიცვეს, არამედ ანგარიშში სხვაობა კიდევ ერთხელ გაზარდეს. მე-14 წუთზე სტუდენტებმა ფარმაცევტების მორიგი იერიში ჩაფუშეს და გიორგი ჩიმაკაძემ საკუთარი საჯარიმოდან, ცარიელ კარში ზუსტი დარტყმით ანგარიშს სოლიოდური სახე მისცა, 3:0. თუმცა, ნახევარ წუთში ნიკა ჩალაძემ ერთი ბურთი გაქვითა, 3:1. ფარმაცევტები თამაშის გადარჩენას შეეცადნენ, მაგრამ არა მარტო შესვენებამდე დარჩენილ 6 წუთში, არამედ მთელი მეორე ტაიმის განმავლობაში, კსუ-მ კარი საიმედოდ დაიცვა. სტუდენტებმა ჯარიმების ლიმიტი, მატჩის დასრულებამდე რვაწუთნახევრით ადრე ამოწურეს, მაგრამ ანგარიში შეინარჩუნეს. კავკასიელებმა მანამდე დაუმარცხებელ პსპ-ს სძლიეს და ქულათა მაქსიმუმით ცხრილს ერთპიროვნულად სათავეში ჩაუდგნენ. პსპ კი 9 ქულით მეორე საფეხურზეა.

ასევე ტურის ცენტრალურ მატჩად იყო მიჩნეული ნიუ ვიჟენ ჯორჯიანსისა და არმიას დაპირისპირება, რომელიც უფრო საინტერესო და უხვგოლიანი გამოდგა. ორივე გუნდმა თამაში აქტიურად დაიწყო, მაგრამ ტაიმის ნახევარზე მეტი უგოლოდ მიილია. მე-15 წუთზე ოთარ ბერეჩიკიძემ ძლიერი დარტყმით გახსნა სანგარიში, 0:1. ნიუ ვიჟენი წონასწორობის აღდგენას შეეცადა, მაგრამ არმიელებმა საიმედოდ დაიცვეს კარი. ტაიმის დასრულებამდე 6 წუთით ადრე, ჯორჯიანსელებმა ჯარიმების ლიმიტი ამოწურეს და მე-18 წუთზე გიორგი ქურდაძემ 10-მეტრიანით არმიას ფორა გააორმაგა, 0:2. ნიუ ვიჟენმა მეორე ტაიმი აქტიურად დაიწყო და 25-ე წუთზე ნუკრი ჭუმბურიძემ ანგარიშში სხვაობა მინიმუმამდე შეამცირა, 1:2. არმია ამას არ შეეუგუა და ხუთიოდე წუთში ბერეჩიკიძის გამჭოლი პასით, შაკო ცირამუამ სტატუს კვო აღადგინა, 1:3. ჯორჯიანსელები ვა ბანკზე წავიდნენ და მეკარიანად შეუტიეს. არმიელებმა ეს ჩინებულად გამოიყენეს და 32-ე წუთზე ბერეჩიკიძემ მეორედაც გაიტანა, 1:4. ნიუ ვიჟენმა შეტევები გააგრძელა და წუთში ვახტანგ კეკელიას იშვიათი პასით ნიკოლოზ გაბრიჩიძემ სხვაობა ორამდე შეამცირა, 2:4. კიდევ წუთში გაბრიჩიძის პასით, ახლა კეკელიამ გაიტანა და ანგარიში მინიმუმამდე შეამცირა, 3:4. არმიელები გამოცოცხლდნენ და 38-ე წუთზე ცირამუას პასით გიორგი ქურდაძემ ტაბლოზე საბოლოო ანგარიში დააფიქსირა, 3:5. ამ მოგებითა და დაგროვებული 9 ქულით, არმიელები პსპ-ს გაუთანაბრდნენ და მე-3 საფეხურზე არიან. ჯორჯიანსელები კი მეოთხეზე დაეშვნენ.

ტურის დასკვნით შეხვედრაში, დინამო თბილისმა შევარდნები დაიფრინა. საწყის 26 წუთში, დინამოელები მეტოქეს 5 უპასუხო გოლით უგებდნენ და დარჩენი დროში FLC03-მა 3 ბურთი გაიტანა. დინამოდან ლაშა კაკაჩიამ დუბლი შეასრულა, კახა მაღლაკელიძემ, ლუკა ელიზბარაშვილმა და ლაშა ჯიქიამ თითო ბურთი მიითვალეს. შევარდნებიდან, ორი გოლი საბა აბრამიშვილმა ჩაიწერა, ერთი კი გიორგი ექსეულიძემ. დინამო ამ მოგებით, ნიუ ვიჟენ ჯორჯიანსს დაეწია (6-6 ქულა) და ცხრილში მე-5 ადგილზეა. უქულოდ მყოფი ერთადერთი გუნდი  FLC03 ბოლო საფეხურზეა.