ოთხი სტუდენტური გუნდიდან სამმა იმარჯვა, მეოთხეს, სეუ-ს კი არმიასთან შანსი არ ჰქონდა. კსუ-ს ზეობა გრძელდება, კავკასიელებმა გამარჯვებების სერია ხუთამდე გაზარდეს. UG-მ ზედიზედ მეორე მატჩი მოიგო. ნიუ ვიჟენის უნივერსიტეტის გუნდმა, ტურის ცენტრალურ მატში პსპ-ს სძლია. ასეთია ფუტსალის უმთავრესი ლიგის მე-5 ტურის მოკლე რეზიუმე. დეტალური მიმოხილვისთვის, სჯობს თანმიმდევრობას მივყვეთ.

ჯორჯიანსის, არმიისა და პსპ-ს ძლევის შემდეგ, კსუ-ს დინამო თბილისთან მოუწია შეჭიდება. კავკასიელებმა აქტიურად დაიწყეს თამაში და სწრაფი გოლით დაწინაურდნენ - მე-3 წუთზე გიორგი ჩიმაკაძემ მარცხენა ფრთაზე სოლო რეიდი განახორციელა და მახვილი კუთხიდან გაისროლა, ბურთი ძელმა აისხლიტა, მაგრამ ჯანიკო გიორგაიამ მცველებს დაასწრო და კსუ დააწინაურა, 0:1. ამან დინამოელები გაახელა და ორიოდე წუთში თეიმურაზ ექიზაშვილს ეფექტრი დარტყმით შეეძლო წონასწორობის აღდგენა, მაგრამ ბურთი ხარიხამ  აისხლიტა. სტუდენტები მინიმალურ უპირატესობას არ დასჯერდნენ და მე-10 წუთზე კსუ-ს მრავალსვლიანი კომბინაცია გარი წერეთელმა დააგვირგვინა, 0:2. დინამოელებმა ბრძოლა გააგრძელეს, მეკარიანადაც შეუტიეს და პრესინგსაც მიმართეს, რამაც შედეგი გამოიღო. მე-16 წუთზე საბა ეგრისელაშვილმა სტუდენტების პასი ჩაჭრა და მისი ფეხიდან ასხლეტილი ბურთი კარის ბადეში აღმოჩნდა, 1:2.  კავკასიელებმა მეორე ტაიმი მწვავე შეტევებით დაიწყეს და 21-ე წუთზე გიორგი ჩიმაკაძემ ორბურთიანი ფორა აღადგინა, 1:3. კსუ-მ მეტოქეს გონზე მოსვლა არ აცალა და ორიოდე წუთში ჩიმაკაძის გადაცემით არჩილ სეფისკვერაძემ სხვაობას სოლიდურ სახე  მისცა, 1:4. დინამომ შეტევები გააგრძელა და 32-ე წუთზე ექიზაშვილის პასით კახა მაღლაკელიძემ სხვაობა ორამდე შეამცირა, 2:4. თუმცა, მატჩს კავკასიელებმა დაუსვეს წერტილი, 39-ე წუთზე გიორგი ჩიმაკაძემ გამორჩეული, სამსვლიანი კომბინაცია გოლით დააგვირგვინა და ტაბლოზე საბოლოო შედეფი დააფიქსირა, 2:5. კსუ-მ ცხრილში ლიდერობის გარდა 3-ქულიანი ფორა შეინარჩუნა. დინამო კი 6 ქულით მე-5 საფეხურზე დარჩა.

სეუ-სთან გამარჯვების შემდეგ, UG-მ მეორე მოგება იზეიმა, უნივერსიტეტელებმა ამჯერად შევარდნები დაიფრინეს. მირიან ჯანგავაძის ბიჭებმა ამჯერადაც დამაჯერებლად მოიგეს, 5:2. UG-დან ლაშა კურტანიძემ და მიქაელ იორამაშვილმა დუბლი შეასრულა, ერთი ბურთი კი ვაჟა კვარაცხელიამ გაიტანა. FLC03-დან ბექა მირიანაშვილმა და გიორგი ტაბახმელაშვილმა თითო ტაიმში თითო გოლი მიითვალეს. UG 6 ქულით დინამო თბილისს ქულებით გაუთანაბრდა და მე-6 ადგილზეა. შევარდნები კი ისევ უქულოდ, ბოლო საფეხურზე არიან.

ჯორჯიანსელებთან გამარჯვების შემდეგ, არმიელებს სეუ-სთან ბენეფისი მოიწყვეს და 7:0 იმარჯვეს. შაკო ცირამუამ ჰეთ თრიკი შეასრულა, ოთარ ბერეჩიკიძემ დუბლი მიითვალა, გიორგი ქურდაძემ და ბაკურ ნანეიშვილმა თითო ბურთი გაიტანეს. ამ მოგებითა და 12 ქულით არმია მეორე ადგილზე აღზევდა. სეუ კი 3 ქულით მე-7 საფეხურზეა.

პსპ-სა და ნიუ ვიჟენ ჯორჯიანსის შერკინება, ტრადიციულად დერბია და ამჯერადაც ტურის ცენტრალურ მატჩად იყო მიჩნეული. არმიასთან მარცხის შემდეგ, ნიუ ვიჟენს მოგება სჭირდებოდა და მათ ეს შეძლეს კიდეც. ავთანდილ ასათანის ბიჭებმა თამაში მწვავე შეტევებით დაიწყეს და სტარტზევე დაწინაურდნენ. მე-4 წუთზე რონინიოს მიერ წამოწყებული იერიში, ნუკრი ჭუმბურიძემ გოლით დააგვირგვინა, 0:1. ფარმაცევტები ანგარიშის გათანაბრებას შეეცადნენ, მაგრამ ეპიზოდებში სიხისტე ზედმეტი მოუვიდათ და უკვე მე-14 წუთზე, ჯარიმების ლიმიტი ამოწურეს. ჯორჯიანსელები თავს საიმედოდ იცავდნენ,  მეტოქესაც სუსხიანი იერიშებით პასუხობდნენ და გატანაც არაერთხელ შეეძლოთ, მაგრამ პსპ მეკარე ნიკოლოზ ფხაკაძემ იხსნა. მე-16 წუთზე ნიუ ვიჟენსაც აღარ დარჩა გაფრთხილებები ლიმიტი და შესაბამისად დაძაბულობამ კიდევ უფრო იმატა. მე-17 წუთზე ტკაჩოვმა ტაქტიკური ჯარიმა აიკიდა და ლაშა-გიორგი ობოლაძემ 10-მეტრიანი გოლად აქცია, 0:2. წუთში უკვე პსპ-ს მიეცა პენალტით გოლის გატანის შანსი, მაგრამ გიორგი ქურხულმა ბურთი კარს გადააცილა. ამის გამო პსპ დაისაჯა და მე-20 წუთზე შოთა თოფურიამ რონინიოს რეიდი გოლით დააფასა, 0:3. თუმცა, ნიკოლოზ კურტანიძემ, ტაიმის ბოლო წამზე ერთი ბურთი გაქვითა, 1:3. ფარმაცევტებმა მეორა ტაიმი აგრესიულად დაიწყეს და არასრულ 5 წუთში უკვე ჯარიმების ლიმიტი მინიმუმამდე შეამცირეს. ჯარიმების გარდა, ნიკოლოზ კოპლატაძემ მეტოქის გადაცემა ჩაჭრა და ანგარიშის სხვაობაც მინიმუმამდე შეამცირა, 2:3. ორიოდე წუთში კოპლატაძეს მეორე ბურთს გატანაც შეეძლო. ნიუ ვიჟენმა თამაშის სადავეები დაიბრუნა და 30-ე წუთზე პენალტის დარტყმის უფლება მოიპოვა, მაგრამ ობოლაძემ ამჯერად არ გაუმართლა, ბურთი კარს გადააცილა. ფარმაცევტები ვა-ბანკზე წავიდნენ და მეკარიანად შეუტიეს. 37-ე წუთზე ჯორჯიანსელთა მეკარე ბექა ტყემალაძე ბურთს დაეუფლა, საკუთარი კარიდან მეტოქის ცარიელ კარში გადაგზავნა, რითაც საბოლოო ანგარიში დააფიქსირა, 2:4. მარცხის მიუხედავად პსპ მე-3 ადგილზე დარჩა. ნიუ ვიჟენი ამ მოგებითა და 9 ქულით,  პსპ-ს ქულებით გაუთანაბრდა და მე-4 საფეხურზეა.