ფუტსალის უმთავრესი ლიგის მე-6 ტური უხვგლიანი გამოდგა - 4 მატჩში 33 გოლი, რაც ერთ შეხვედრაში საშუალოდ, 8 გოლზე მეტის ტოლფასია. ნიუ ვიჟენისა და დინამოს მატჩი, ეს დინამიური შერკინება, გოლების წვიმამ დაამშვენა. ამას გარდა, ამ ტურში ორი მოულოდნელი შედეგი დაფიქსირდა. შევარდნებმა პირველად მოიგეს, თანაც მცირედი კი არა, სოლიდური სხვაობით. ასევე სოლიდური სხვაობით დინამომ ჯორჯიანსელებს სძლია. თუმცა, სჯობს ყველაფერს თანმიმდევრობით მივყვეთ.

არმიასა და პსპ-ს დაპირისპირება, ყოველთვის დერბია და ეს ტრადიცია ამჯერადაც არ დარღვეულა. არმიელები მალევე დაწინაურდნენ, მე-5 წუთზე გიორგი ქურდაძემ ანგარიში გახსნა, 1:0. ორიოდე წუთში ლაშა ფოფხაძემ მეტოქის გადაცემა ჩაჭრა და ფორა გააორმაგა, 2:0. პსპ თამაშში დაბრუნებას შეეცადა, მაგრამ უშედეგოდ. მე-18 წუთზე შაკო ცირამუამ მახვილი კუთხიდან გაისროლა, 3:0. ფარმაცევტებმა მეორე ტაიმში მეკარიანად შეუტიეს და 24-ე წუთზე ნიკოლოზ კოპლატაძემ სხვაობა შეამცირა, 3:1. თუმცა, ნახევარ წუთში ოთარ ბერეჩიკიძემ 3-ბურთიანი სხვაობა აღადგინა, 4:1. ფარმაცევტებმა ბრძოლა გააგრძელეს და მათი შეტევისას ლაშა ფოფხაძის ფეხიდან ასხლეტილი ბურთი კარის ბადეში აღმოჩნდა, 4:2. აქედან 6 წუთში გიორგი ქურხულმა ძლიერი დარტყმით, სხვაობა მინიმუმამდე შეამცირა, 4:3. ფარმაცევტებმა ბოლომდე იბრძოლეს, მაგრამ ანგარიში აღარ შეცვლილა. არმიამ ზედიზედ მესამე მატჩი მოიგო და 15 ქულით მეორე ადგილზეა. პსპ-ს 9 ქულა აქვს და ორ გუნდთან ერთად, მესამე-მეხუთე ადგილებს იყოფს.

FLC03-მა პირველი გამარჯვება მოიპოვა და ახლა უკვე მოუგებელი არცერთი გუნდი აღარაა. სეუ-სა და შევარდნების სტუდენტური დერბი საინტერესო გამოდგა. მე-12 წუთზე გიორგი ტაბახმელაშვილის გამჭოლი პასი ილარიონ ფიფიამ გოლით დააფასა, 0:1. წუთში შევარდნებმა ჯარიმების ლიმიტი ამოწურეს და სეუ-ს დაწინაურების შანსი მიეცა. სეუ-მ პენალტი ორჯერ გამოიმუშავა. მე-16 წუთზე გურამ ჩალიგავამ 10-მეტრიანი დარტყმით, ანგარიში გაათანაბრა, 1:1. ნახევარ წუთში კი იმავე ჩალიგავას დარტყმული ბურთი FLC03-ის მეკარე ლევან გიგოიძემ მოიგერია. შევარდნებმა მეორე ტაიმი მწვავე შეტევებით დაიწყეს და ეს შედეგშიც სათანადოდ ასახეს. 24-ე წუთზე ტაბახმელაშვილმა FLC03-ი წინ გაიყვანა, 1:2. წუთში დავით ბერაძე, თავისსავე მიერ წამოწყებული შეტევა გოლით დააგვირგვინა, 1:3. ათ წუთში ნიკოლოზ მონასელიძემ სხვაობა სოლიდური გახადა, 1:4, ბოლო წუთზე კი საბა აბრამიშვილმა საბოლოო შედეგი დააფიქსირა, 1:5. შევარდნებმა იმარჯვეს, მერვედან, მე-7 საფეხურზე აინაცვლეს და სეუ-ს ადგილი გაუცვალეს. 

სტუდენტურ დერბიში, კსუ-მ UG-ს უმასპინძლა, რომელმაც წინა ორი მატჩი მოიგო. ფავორიტად მიჩნეულმა კავკასიელებმა მოლოდინი ისევ გაამართლეს. მე-8 წუთზე ლუკა ფარცვანიამ გახსნა ანგარიში და ათიოდე წუთში მანვე დუბლი მიითვალა, 2:0. მეორე ტაიმში კსუ უფრო შედეგიანად წარმოჩნდა. 22-ე წუთზე ნოდარ ქურცაძემ სხვაობა გაზარდა, 3:0. ოთხ წუთში ბადრი კალანდაძემ ერთი ბურთი გაქვითა (3:1), მაგრამ ნახევარ წუთში კავკასიელებმა პენალტი მოიპოვეს, რომელიც მეკარე ალი ასლანმა გოლად აქცია, 4:1. ორიოდე წუთში საბა ტყეშელაშვილმა სხვაობა კიდევ გაზარდა, 5:1. გავიდა კიდევ 4 წუთი და ნიკა მანგოშვილმა სხვაობა სოლიდური გახადა, 6:1. UG-მ კიდევ ერთ ბურთი გაქვითა, დავით ჯერანოვმა, ტაბლოზე საბოლოო შედეგი დააფიქსირა, 6:2. კსუ-მ ექვსიდან ექვსი მატჩი მოიგო და ცხრილის სათავეშია, UG კი 6 ქულით, მე-6 ადგილზეა.

დინამოსა და ჯორჯიანსის შერკინებამ ტურის ცენტრალურ მატჩის სტატუსი აშკარად დაიმსახურა. მით უმეტეს, ეს თამაში გოლების წვიმამ (12 გოლი) დაამშვენა. მე-4 წუთზე შეტევაში წასულ ჯორჯიანსელთა მეკარე თორნიკე ბუკიას, ომარ ასაშვილმა ბურთი აართვა და დინამოს შეტევა გეგა კოშაძემ გოლით დააგვირგვინა, 0:1. დინამომ დაცვიდან თამაში, გააგრძელა, ხოლო ნიუ ვიჟენმა ისევ მეკარიანად შეუტია. მე-10 წუთზე, საბა ეგრისელაშვილმა ბოლომდე იბრძოლა, კონტრიერიში წამოიწყო და მანვე სხვაობა გააორმაგა, 0:2. ნიუ ვიჟენი გაცხარდა და წუთში პენალტი მოიპოვა, 10-მეტრიანი რონინიომ გოლად აქცია, 1:2. ჯორჯიანსელებმა მეკარიანად შეტევები გააგრძელეს, დინამომ კი დაცვიდან თამაში. მე-15 წუთზე დინამოელებმა მეტოქის იერიში ჩაჭრეს და ლაშა კაკაჩიამ შორეული, ზუსტი დარტყმით ორბურთიანი სხვაობა აღადგინა, 1:3. თუმცა, ტაიმის ბოლოს ვახტანგ კეკელიამ სხვაობა ისევ მინიმუმამდე შეამცირა, 2:3. ჯორჯიანსელებმა მეორე ტაიმი აქტიურად დაიწყეს და 24-ე წუთზე კეკელიამ მეორე გოლიც მიითვალა, 3:3. ხუთ წუთში კახა მაღლაკელიძემ მეტოქის იერიში ჩაჭრა და დინამო ისევ დაწინაურდა, 3:4. ორიოდე წუთში კახაბერ მაისაიას გოლით, სხვაობა ორამდე გაიზარდა, 3:5. კიდევ ორ წუთში კეკელიას მსგავსად, რონინიომაც დუბლი შეასრულა, 4:5. დინამოელებმა ირწმუნეს, რომ მოგება შეუძლიათ და ეს რეალობად აქციეს. 37-ე წუთზე ლუკა ელიზბარაშვილმა სხვაობა ისევ ორამდე გაზარდა, 4:6. ორ წუთში  ეგრისელაშვილმა მეორე გოლის გატანით, გამარჯვებულის ვინაობა გადაწყვიტა, 4:7. თუმცა, მატჩის ბოლო წუთზე მეკარე ზაურ კოტრიკაძემ მატჩს წერტილი დაუსვა, 4:8. დინამო ამ მოგებით პსპ-სა და ნიუ ვიჟენს გაუთანაბრდა და მომდევნო ტურში არმიას შეერკინება.