ფუტსალის ლიგაში პირველი წრე, მე-7 ტურით დასრულდა. ტურით, რომელშიც ფავორიტებმა მოიგეს. კავკასიელებმა ტრიუმფის წრე შეკრეს და ქულათა მაქსიმუმით, დამსახურებულად ლიდერობენ. არმია კვლავ მეორეა და გმდევრებს გვარიანი ფორით უსწრებს. მეორე წრე უფრო საინტერესო იქნება, მანამდე კი ბოლოს გამართული შეხვედრები მიმოვიხილოთ.

სეუ-სთან გამარჯვების შემდეგ, FLC03-მა კსუ მიიღო. ბუნებრივია, ლიგის დებიუტანტის წინააღმდეგ, მოქმედი ჩემპიონი, უპირობო ფავორიტად იყო მიჩნეული და ეს მოლოდინი გაამართლდა კიდეც. ისიც უნდა ითქვას, რომ ანგარიშში სოლიდური სხვაობის მიუხედავად, კავკასიელებს იოლი გასეირნება არ ჰქონიათ. „შევარდნები“ მრისხანე მეტოქეს ეპიზოდურად მწვავედ და ორგანიზებულად უტევდნენ და გოლის გატანის არაერთი შანსიც ჰქონდათ. თუმცა, გამოცდილებისა და კლასის ხარჯზე, კსუ-მ მოწინააღმდეგე თითო ტაიმში ორ-ორი გოლით დაასაჩუქრა. მე-5 წუთზე, გიორგი ჩიმაკაძემ 10-მეტრიანით გახსნა ანგარიში, 0:1. მეოცე წუთზე ჯანიკო გიორგაიამ სხვაობა გააორმაგა. მეორე ტაიმის ბოლო 7 წუთში კსუ-დან, ნოდარ ქურცაძემ და ნიკა მანგოშვილმა თითო ბურთი გაიტანა. კავკასიელებმა 0:4 იმარჯვეს, პირველი წრე ტრიუმფით (შვიდიდან შვიდი მოგება), დამსახურებულად პირველ ადგილზე დაასრულეს. FLC03-ი კი კვლავ მეშვიდეა.

ზედიზედ 3 მარცხის შემდეგ, პსპ-მ მოგების გემო გაიხსენა. ფარმავეცტებმა სეუ-ს უმასპინძლეს და მათ ზედიზედ მეხუთე მარცხი აწვნიეს. თუმცა, სტუდენტების ძლევა მარტივი არ ყოფილა, ანგარიში სულაც სეუ-მ გახსნა. შესვენებამდე წუთნახევრით ადრე, პსპ-მ გაფრთხილებების ლიმიტი ამოწურა, მაგრამ ისე ჩაამთავრეს თამაში, რომ სტუდენტებს პენალტი არ მოაპოვებინეს. მეორე ტაიმი სეუ-ს სწრაფი გოლით დაიწყო, 22-ე წუთზე ბექა სამყურაშვილმა ჩინებული კომბიაცია გოლით დააგვირგვინა და სეუ დაწინაურდა 0:1. ფარმაცევტები გაბრაზდნენ, შეტევებს სიმწვავე შემატეს და 27-ე წუთზე ლევან სვანიძემ წონასწორობა აღადგინა, 1:1. აქედან 4 წუთში ნიკა გვაზავამ ვეტერინარები წინ გაიყვანა, 2:1. თუმცა, სტუდენტებმა ნახევარ წუთში უპასუხეს, სამყურაშვილმა მეორედაც გაიტანა და ანგარიში გაათანაბრა, 2:2. ზუსტად წუთში ალექსანდრე ორაგველიძემ გამარჯვების გოლი გაიტანა და ვეტერინარებმა 3:2 იმარჯვეს და ნიუ ვიჟენთან ერთად, 12-12 ქულით მესამე-მეოთხე ადგილს იყოფს.

დინამო თბილისთან მოულოდნელი მარცხის შემდეგ, ნიუ ვიჟენ ჯორჯიანსმა ისევ იმარჯვა. თუმცა, UG-სთან ანგარიშის გახსნა, მხოლოდ მე-9 წუთზე შეძლო, როცა ლაშა-გიორგი ობოლაძემ ჯორჯიანსელთა კომბინაცია გოლით დააგვირგვინა, 0:1. ავთანდილ ასათიანის ბიჭები ამას არ დასჯერდნენ და მე-14 წუთზე ნიკა ბიძინაშვილმა სხვაობა გააორმაგა, 0:2. ორიოდე წუთში ლაშა კურტანიძემ მეტოქის მეკარის გადაცემა ჩაჭრა და ანგარიშში სხვაობა მინიმუმამდე შეამცირა.  მეორე ტაიმი სტუდენტებმა უფრო აქტიურად დაიწყეს და 21-ე წუთზე ვაჟა კვარაცხელიამ კურტანიძის გამოზომილი პასით წონასწორობა აღადგინა, 2:2. ამან ჯორჯიანსელები გაახელა... მათ იერიშები გაამწვავეს, რამაც შედეგი გამოიღო. 24-ე წუთზე შოთა თოფურიას პასით, ვახტანგ კეკელიამ ნიუ ვიჟენი ისევ წინ გაიყვანა, 2:3. ჯორჯიანსელებმა გამარჯვებისკენ სწრაფვა გააგრძელეს და 32-ე წუთზე იშვითი კომბინაცია გოლით დაგვირგვინეს - ნუკრი ჭუმბურიძის ქუსლით დატოვებულ ბურთს, ობოლაძემ კარის ბადეში მიუჩინა ადგილი, 2:4. ნიუ ვიჟენმა ამ შედეგით მოიგო და პსპ-ს ქულებით გაუთანაბრდა.

ჯორჯიანსელებთან გამარჯვების შემდეგ, დინამო თბილისი არმიას დაუხვდა. ტურის ცენტრალურ მატჩად მიჩნეულმა ამ შეხვედრამ მოლოდინი სრულად გაამართლა. დაცვიდან თამაში და პრესინგი - დინამოელებმა არმიასთანაც იგივე ტაქტიკას მიმართეს. თუმცა, მრისხანე მეტოქესთან ხისტ თამაშს ვერ აცდნენ და მე-7 წუთზე ჯარიმების ლიმიტი ამოწურეს. არმიელებმა იძალეს და შაკო ცირამუამ მე-8 წუთზე ანგარიში გახსნა, 0:1. ლადო ბურდულის ბიჭებს, წუთში ფორის გაორმაგება შეეძლოთ, მაგრამ გიორგი ქურდაძის 10-მეტრიანისას, დინამოელთა მეკარე ზაურ კოტრიკაძემ ძელის დახმარებით ბურთი მოიგერია. თუმცა, მე-13 წუთზე ბაკურ ნანეიშვილმა ცირამუას იშვიათი პასი გოლად აქცია, 0:2. დინამო ვა-ბანკზე წავიდა და მეკარიანად შეუტია. შედეგად, მე-20 წუთზე ლუკა ელიზბარაშვილმა ბოლომდე იბრძოლა, მცველებით გარშემორტყმულმა, გამჭოლი პასით დავით ხუბუტია მოძებნა, რომელმაც სხვაობა მინიმუმამდე შეამცირა, 1:2. მეორე ტაიმი გაცილებით სანახაობრივი და დრამატული გამოდგა. დინამომ მეკარიანად შეტევები გააგრძელა, შესაბამისად, არმიამ კარის უსაფრთხოებას მეტი დრო დაუთმო. თუმცა, ლადო ბურდულის ბიჭები მწვავედაც უტევდნენ, მაგრამ დინამოს მეკარე კოტრიკაძემ არაერთხელ აშკარა გოლისგან იხსნა გუნდი. კიპერიანად შეტევის გამო, დინამო კარს ხშირად ტოვებდა ცარიელს, რითაც შაკო ცირამუამ ისარგებლა და 34-ე წუთზე ორბურთანი სხვაობა აღადგინა, 1:3. დინამოელებმა ბოლომდე იბრძოლეს, მაგრამ ერთზე მეტის გატანა ვერ შეძლეს - მე-40 წუთზე ომარ ასაშვილმა მახვილი კუთხიდან შეამცირა სხვაობა, 2:3. არმიამ მოიგო, მე-2 ადგილზე დარჩა და მდევრებს 6-6 ქულით უსწრებს. დინამო კი 9 ქულით მე-5 საფეხურზეა და მომდევნო ტურის ცენტრალურ მატჩში პსპ-ს შეეჭიდება.