სეზონის მეორე წრე, დინამო თბილისმა რიხიანად, ფავორიტის ძლევითა და სრულფასოვანი რევანშით დაიწყო. იოლი გასეირნება სხვა ფავორიტებსაც არ ჰქონდათ, მაგრამ მაინც მოიგეს. მეორე წრის სასტარტო ტურს, სატურნირო ცხრილში, გუნდების პოზიციების ცვლილება არ გამოუწვევია. თუმცა, დინამომ პსპ გააწბილა და ქულებით გაუთანაბრდა კიდეც. ეს ტური იმითაც იყო გამორჩეული, რომ ერთ შეხვედრაში, ერთმა გუნდმა 4 პენალტი შეასრულა და ვერცერთ გამოიყენა, მაგრამ მაინც მოიგო. ასეთი იყო ამ ტურის მოკლე რეზიუმე, დეტალური მიმოხილვისთვის, თანმიმდევრობას მივყვეთ.

ნიუ ვიჟენ ჯორჯიანსის შემდეგ, დინამო თბილისმა კიდევ ერთ ფავორიტს ცივი შხაპი გადაასხა, ამჯერად პსპ-ს... არა და, ამ სეზონის პირველ ტურში, ფარმაცევტებმა 6:4 სძლიეს დინამოელებს და ამჯერადაც, უმეტესობა ფავორიტად მიიჩნევდა, მაგრამ დინამოს სხვა ჩანაფიქრი ჰქონდა, რომელიც განახორციელა კიდეც. ტურის ცენტრალური მატჩის საკადრისად, ეს შეხვედრა დაძაბულად და საინტერესოდ წარიმართა, განსაკუთრებით მეორე ტაიმი, რომელშიც 6 გოლი გავიდა. ანგარიში ტაიმის ბოლოს გაიხსნა, მე-20 წუთზე თეიმურაზ ექიზაშვილმა პსპ-ს იერიში შეაჩერა, ბურთი მოიპოვა და სოლო-რეიდი გოლით დააგვირგვინა, 1:0. დინამომ შესვენების შემდეგ, შეტევები კიდევ უფრო გაამწვავა და 27-ე წუთზე გეგა კოშაძემ სხვაობა გააორმაგა, 2:0. დინამოელები ამას არ დასჯერდნენ და 4 წუთში სხვაობას სოლიდური სახე მისცეს. 31-ე წუთზე ომარ ასაშვილის დარტყმისას პსპ-ს მეკარე ნიკოლოზ ფხაკაძემ ბურთი მოიგერია, მაგრამ დამატებაზე იმავე ასაშვილმა იმარჯვა და 3:0. ფარმაცევტებმა მეტოქეს ნახევარ წუთში უპასუხეს, ნიკოლოზ კოპლატაძის დარტმული ბურთი, დინამოს მეკარე ზაურ კოტრიკაძემ მოიგერია, მაგრამ დამატებაზე ნიკოლოზ კურტანიძემ ყველას დაასწრო და სხვაობა შეამცირა, 3:1. პსპ-მ მეკარიანად შეტევა გააგრძელა, დინამომ მორიგი იერიში ჩაჭრა და კახაბერ მაისაიამ სამბურთიანი ფორა აღადგინა, 4:1. წუთის შემდეგ, დინამოელთა მრავალსვლიანი კომბინაცია დავით ხუბუტიამ გოლით დაასრულა, 5:1. მალევე ლევან სვანიძემ გამოზომილი და ძლიერი დარტყმით კიდევ ერთი ბურთი გაქვითა, 5:2. დინამომ მე-4 გამარჯვება მიითვალა, 12 ქულით პსპ-ს გაუთანაბრდა და მეოთხე-მეხუთე ადგილებს სწორედ ეს გუნდები იყოფენ.

სტუდენტურ დერბიში, კავკასიელებმა სეუ მეორედაც დაამარცხეს, ამჯერადაც მშრალად, მაგრამ ერთი გოლით ნაკლები აკმარეს. მოქმედმა ჩემპიონმა ლიგის დებიუტანტის კარი, პირველ ტაიმში ორჯერ, მეორეში კი სამჯერ დალაშქრა. საგულისხმოა ის, რომ 5 გოლიდან ორი საგოლე შეტევა მეკარე ალი ასლანმა წამოიწყო, ერთი ბურთიც თავად მან გაიტანა. ბოლოს კი ასლანის დუბლიორმა, ნიკა გულორდავამ მეტოქის დარტყმული ბურთი მოიგერია, გარი წერეთელმა საკუთარი საჯარიმოდან, ბურთს სეუ-ს ცარიელ კარში მიუჩინა ადგილი, რითაც საბოლოო ანგარიში დაფიქსირდა, 0:5. კსუ-დან, წერეთლისა და ალი ასლანის გარდა, ნიკა მანგოშვილმა და გიორგი ზუნტუროვმა, თითო ბურთი გაიტანეს. გიორგი ჩიმაკაძის მიერ საჯარიმოში ჩაწოდებული ბურთი, სეუ-დან ნიკა უთრუგაშვილს ზურგში მოხვდა და კარში აღმოჩნდა. კსუ-მ რვიდან მერვე შეხვედრა მოიგო და ქულათა მაქსიმუმით კვლავ პირველზეა, სეუ კი 3 ქულით ბოლოზეა.

მიმდინარე სეზონის სასტარტო ტურში სოლიდური გამარჯვების (4:0), შემდეგ, ნიუ ვიჟენ ჯორჯიანსი FLC03-თან უპირობო ფავორიტად იყო მიჩნეული, მაგრამ შევარდნებმა ამჯერად უფრო ორგანიზებულად ითამაშეს, დაცვაშიც საიმედოდ გაისარჯნენ და ამიტომაც, ჯორჯიანსელებმა მხოლოდ მე-16 წუთზე შეძლეს ანგარიშის გახსნა. ეს პატივი კი ნიკა ბიძინაშვილს ერგო, 0:1. ტაიმი ამ შედეგით მთავრდებოდა, მაგრამ შოთა თოფურიამ ბოლომდე იბრძოლა, იშვიათი პასით ირაკლი თოდუა მოძებნა, რომელმაც, ბოლოსწინა წამზე სხვაობა გააორმაგა, 0:2.  მეორე ტაიმში შევარდნებმა უკეთ ითამაშეს. 28-ე წუთზე გიორგი ტაბახმელაშვილმა შორეული გადაცემა მიიღო და მახვილი კუთხიდან ანგარიშში სხვაობა მინიმუმამდე შეამცირა, 1:2. თამაში უფრო გამწვავდა და 35-ე წუთზე შოთა თოფურიამ საბოლოო ანგარიში დააფიქსირა, 1:3. ნიუ ვიჟენ ჯორჯიანსმა მოიგო და 15 ქულით მე-3 ადგილზეა, FLC03-ი კი 3 ქულით მე-7 საფეხურზეა. მომდევნო ტურის ცენტრალურ მატჩში ჯორჯიანსელები მოქმედ ჩემპიონსა და ცხრილის ლიდერ კსუ-ს დაუხვდებიან.

არმიელებმა UG-სთან კვლავ 3 ბურთიანი სხვაობით იმარჯვეს, მაგრამ პირველი ტურის მატჩისგან განსხვავებით (3:0), ამჯერად ერთი გოლი მიიღეს. ეს შეხვედრა ხისტი გამოდგა - პირველი ტაიმის დასრულებამდე 4 წუთით ადრე არმიელებმა ჯარიმების ლიმიტი ამოწურეს, მატჩის დასრულებამდე 9 წუთით ადრე კი სტუდენტებმა 5 გაფრთხილება მიიღეს, რაც ძვირად დაუჯდათ. ეს მატჩი იმით იყო გამორჩეული, რომ ოთხი 10-მეტრიანი დაინიშნა, ყველა სტუდენტების კარში და არმიელებმა ოთხივე პენალტი გააცუდეს. გიორგი ქურდაძემ ორი პენალტი ააცილა, ერთი ოთარ ბერეჩიკიძემ, ლაშა ფოფხაძის დარტყმა კი UG-ს მეკარე გიორგი ილურიძემ მოიგერია. რაც შეეხება გოლებს, ბაკურ ნანეიშვილმა მე-5 წუთზე გახსნა ანგარიში 0:1, ვანო ბექაურმა მე-20 წუთზე, სხვაობა გააორმაგა, 0:2. გიორგი ქურდაძემ 26-ე წუთზე სხვაობა გაზარდა, 0:3. გიორგი კურტანიძემ 35-ე წუთზე გიორგი კურტანიძემ ერთი ბურთი გაქვითა. 39-ე წუთზე ქურდაძემ მეორე ბურთიც გაიტანა, 1:4. არმიამ ზედიზედ მე-5 მატჩი მოიგო და 21 ქულით მე-2 ადგილზეა. UG 6 ქულით მეექვსეა.