შეუჩერებელი კავკასიელები, რომლებმაც 8 მატჩიდან ყველა მოიგეს, ჯორჯიანსელებმა შეაჩერეს. უდანაკარგოდ მოასპარეზე მოქმედ ჩემპიონს პირველი მარცხი ნიუ ვიჟენ ჯორჯიანსმა აგემა და ცხრილის ლიდერი შეცვალა. ზედიზედ მეექვსე მოგებით, არმიელები ცხრილს სათავეში მოექცნენ. სწორედ ეს გახლდათ ამ ტურის გამორჩეული მოვლენა. ლიგის დებიტანთან პირველი წრის სენსაციური მარცხის შემდეგ, რევანში აიღო დინამო თბილისმაც. დანარჩენ ორ შეხვედრაში ფავორიტებმა იმარჯვეს და ცხრილი სხვა ცვლილება არ მომხდარა... ახლა კი მიმოხილვას თანმიმდევრობით  მივყვეთ.

ნიუ ვიჟენ ჯორჯიანსისა და კსუ-ს დერბი, ტურის ცენტრალური მატჩის საკადრისი გახლდათ. წინა ორი მოგებით გახელებულმა ჯორჯიანსელებმა, კავკასიელებთან რევანში ჩაიფიქრეს და ეს შეძლეს კიდეც. ამ მატჩის დაძაბულობაზე ისიც მეტყველებს, რომ საგოლე მომენტების მიუხედავად, ნახევარ ტაიმზე მეტი დრო მშრალად გაილია. თუმცა, ისიც უნდა ითქვას, რომ ორივე გუნდი უმთავრესად საკუთარი კარის უსაფრთხოებაზე იყო ორიენტირებული. მე-14 წუთზე ლუკა ფარცხვანია მარცხნიდან შეიჭრა საჯარიმოში, გამჭოლი პასით ნიკა მანგოშვილი მოძებნა და კსუ-ს კაპიტანმა ზუსტი დარტყმით ანგარიში გახსნა, 0:1. ნიუ ვიჟენმა სტუდენტებს სამიოდე წუთში უპასუხა. ნუკრი ჭუმბურიძემ სოლო-რეიდი განახორციელა, მისი პასით კი ირაკლი თოდუამ წონასწორობა აღადგინა, 1:1. ანგარიში არა თუ პირველ, არამედ, თითქმის მთელი მეორე ტაიმი აღარ შეცვლილა და ამაში ორივე გუნდის მეკარის, თორნიკე ბუკიასა და ალი ასლანის დამსახურებაა. თუმცა, მატჩის დასრულებამდე ორწუთნახევრით ადრე, რონიონიომ წამოწყებული შეტევა, მრავალსვლიანი კომბინაციის შედეგად, თავადვე გოლით დააგვირგვინა, 2:1. ნიუ ვიჟენ ჯორჯიანსმა კსუ-სთან იმ ანგარიშით მოიგო, რითაც პირველ წრეში დამარცხდა. კავკასიელები 24 ქულით მეორეზე ჩამოქვეითნენ, ჯორჯიანსი კი 18 ქულით მესამეზეა.

არმიელებმა შევარდნებს, პირველ წრეში 7-ბურთიანი სხვაობით (1:8) მოუგეს, მაგრამ, ამჯერად იგივეს გაკეთება ვეღარ შეძლეს. FLC03-მა არმიას ამჯერად 3 ბურთი გაუტანა და 3 გოლით წააგო (6:3). ლადო ბურდულის ბიჭებმა, FLC03-ს თითო ტაიმში 3-3 გოლი გაუტანეს. გიორგი ქურდაძემ დუბლი შეასრულა, შაკო ცირამუამ, თამაზ გოგსაძემ, ლაშა ფოფხაძემ და მეკარე ბექა გოგსაძემ, თითო ბურთი გაიტანეს. შევარდნებიდან საბა აბრამიშვილმა, ნიკას ხაჭაპურიძემ და ბექა მირიანაშვილმა თითო გოლი მიითვალეს. ამ გამარჯვებით არმია კსუ-ს ქულებით გაუთანაბრდა და ბურთების უკეთესი მაჩვენებლის წყალობით, პირველ ადგილზე აღზევდა. FLC03-ი კი 3 ქულით ისევ მეშვიდეზეა.

დინამო თბილისი ლიგის დებიუტანტ სეუ-სთან, პირველ მატჩში სულაც დამარცხდა (3:2), ამჯერად კი მეტოქეზე სრულფასოვანი რევანში აიღო. დინამოელებმა სტუდენტებს სოლიდური სხვაობით, 5:1 სძლიეს. ლაშა კაკაჩიამ და საბა ეგრისელაშვილმა ორ-ორი ბურთი გაიტანეს, ხოლო კახა მაღლაკელიძე ერთს დასჯერდა. სეუ-დან კი პრესტიჟის გოლი ლუკა ჯოლოხავას ანგარიშზეა. დინამოს, პსპ-ს მსგავსად 15 ქულა აქვს და მეხუთეზეა, სეუ კი 3 ქულით ბოლო საფეხურზეა.

UG-ს წინააღმდეგ პსპ ფავორიტად იყო მიჩნეული და ამჯერადაც მოიგო, მაგრამ ერთით ნაკლები გაიტანა. არა და, თამაშს სტუდენტები იგებდნენ - მე-12 წუთზე საბა დავითულიანის მიერ გატანილი ბურთით UG დაწინაურდა, 0:1. თუმცა, ამას პსპ-მ 6 გოლით უპასუხა. ფარმაცევტთაგან მელტონ ახალაიამ დუბლი შეასრულა, ნიკოლოზ კოპლატაძემ, გიორგი ქურხულმა, ლევან სვანიძემ და ნიკოლოზ კურტანიძემ თითო ბურთი გაიტანეს. პსპ-მ 6:1 მოიგო და 15 ქულით მე-4 ადგილზეა. UG-ს 6 ქულა აქვს და მეექვსეა.