ფუტსალის მთავარი ლიგის მეათე ტური, კავკასიელებისთვის წარმატებული აღმოჩნდა. მათ მეორედაც მოუგეს არმიელებს და პირველობა დამსახურებულად დაიბრუნეს. დინამომ, ნიუ ვიჟენ ჯორჯიანსმა და პსპ-მ, ამჯერადაც სძლიეს მეტოქეებს და ტურმა სენსაციების გარეშე ჩაიარა. ასეთია მოკლე რეზიუმე, დეტალური მიმოხილვისთვის, სჯობს თანმიმდერობას მივყვეთ.

დინამო თბილისთან გამარჯვების შემთხვევაში, UG მეხუთეადგილოსან მეტოქესთან რევანშს იზეიმებდა და  9-ქულიან ჩამორჩენას 6-მდე შეამცირებდა. ეს მატჩში სწრაფი გოლებით დაიწყო და ანგარიში სწორედ სტუდენტებმა გახსნეს. ბადრი კალანდაძის დარტყმული ბურთი, დინამოს მეკარე ზაურ კოტრიკაძემ კი მოიგერია, მაგრამ დამატებაზე დავით ჯერანოვმა ორ მეტოქეს დაასწრო და მე-2 წუთზე UG დაწინაურდა, 1:0. სტუდენტების სიხარულმა ნახევარ წუთს გასტანა, კახაბერ მაისაიამ გამოზომილი პასით,  თეიმურა ექიზაშვილი მეტოქის მეკარესთან პირისპირ გაიყვანა და მანაც წონასწორობა აღადგინა, 1:1. ტაიმის მომდევნო 17 წუთი მშრალად გაილია. დინამოელებმა მეორე ნახევრის სტარტზე იყოჩაღეს და ფორაც შეიქმნეს. 24-ე და 26-ე წუთებზე საბა ეგრისელაშვილმა ორჯერ დალაშქრა UG-ს კარი, 1:3.  ოთხ წუთში ლაშა კაკაჩიამ მატჩის ბედი გადაწყვიტა, 1:4. დინამოელებმა მწვავე შეტევები გააგრძელეს და ეგრისელაშვილმა საბოლოოდ ჰეთ თრიკი შეასრულა, 1:5. მეხუთე საფეხურზე მყოფი დინამო, UG-ს უკვე 12 ქულით უსწრებს და მის წინ მყოფ პსპ-ს 2 ქულით ჩამორჩება. სტუდენტები კი 6 ქულით მეექვსეზე არიან.

კსუ-სა და არმიას შერკინება ტურის ცენტრალური მატჩის საკადრისად წარიმართა. მიმდინარე სეზონის პირველ წრეში, კავკასიელებმა არმიელებთან, ჯანიკო გიორგაიას ერთადერთი გოლის წყალობით იმარჯვეს. იმ მატჩის მსგავსად, არაერთი საგოლე მომენტის მიუხედავად, ამჯერადაც პირველი ტაიმი უგოლოდ დასრულდა.  მეორე ნახევარიც ორმხრივი შეტევებით წარიმართა, მაგრამ უფრო შედეგიანად სტუდენტები წარმოჩნდნენ. 26-ე წუთზე არჩილ სებისკვერაძის დროული პასი, გიორგი ჩიმაკაძემ გოლად აქცია, 1:0. არმიელებმა სტუდენტებს 3 წუთში უპასუხეს. რაოდენ გასაოცარიც არ უნდა იყოს, შეტევაში ჩართულმა მეკარე ბექა გოგსაძემ მოულოდნელად კარში დაარტყა და წონასწორობა აღადგინა, 1.:1. კავკასელებმა მეტოქეზე წნეხი გააძლიერეს და 31-ე წუთზე ისევ გაწინაურდნენ. ნოდარ ქურცაძემ მოედნის ცენტრში ბოლომდე იბრძოლა, ორ მეტოქეს ბურთი არ დაანება და გიორგაიას უპასა, რომლის გადაცემით ჩიმაკაძემ დუბლი მიითვალა, 2:1. დარჩენილ 9 წუთში არმია ანგარიშის გათანაბრებას შეეცადა, მაგრამ კსუ-მ დაცვაში საიმედოდ ითამაშა და საბოლოოდ მეტად მნიშვნელოვანი მატჩი მოიგო. ამ გამარჯვებით კავკასელებმა პირველი ადგილი დაიბრუნეს და მეორეზე მყოფ არმიასთან 3-ქულიანი უპირატესობა აქვთ.

პირველ წრეში ნიუ ვიჟენ ჯორჯიანსმა, სეუ-ს 3-ბურთიანი ფორით მოუგო, ამჯერად კი ამას არ დასჯერდა და 10 ბურთი გაუტანა. ჯორჯიანსელებმა 3:10 სძლიეს სტუდენტებს. ათი ბურთიდან ვახტანგ ჯვარაშვილმა ჰეთ თრიკი შეასრულა, ბრაზილიელმა რონინიომ კი დუბლი მიითვალა. გიორგი აფციაურმა, ვახტანგ კეკელიამ, ლაშა-გიორგი ობოლაძემ, ნიკა ბიძინაშვილმა და ნუკრი ჭუმბურიძემ თითო ბურთი გაიტანეს. სეუ-დან სანდრო ობოლაძემ დუბლი გაახერხა, ერთი გოლიც გიორგი წიქვაძის ანგარიშზეა. მესამეზე მყოფი ნიუ ვიჟენი 3 ქულით უსწრებს პსპ-ს და ამდენივეთი ჩამორჩება არმიას. თუმცა, მომდევნო ტურში ჯორჯიანსელები სწორედ არმიელებს შეერკინებიან და შანსი ეძლევათ მათ ქულებით გაუთანაბრდნენ.

ამ სეზონის მესამე ტურში პსპ-მ FLC03-ს 10:3 მოუგო. აღსანიშნავია ისიც, რომ ფარმაცევტები მოწინააღმდეგეს მე-20 წუთზე, უკვე 5:2-ს უგებდნენ. ამჯერად კი მხოლოდ მე-20 წუთზე გახსნეს ანგარიში - პსპ-ს სასარგებლოდ დანიშნლი 10-მეტრიანისას, ლევან სვანიძის დარტყმული ბურთი, შევარდნების მეკარე ავთანდილ სართანიამ მოიგერია, მაგრამ დამატებაზე სვანიძემ იმარჯვა და ფარმაცევტები დააწინაურა, 0:1. პსპ-მ მეორე ტაიმის სტარტზე გატანილი ორი გოლით თამაშის ბედი პრაქტიკულად გადაწყვიტა. 22-ე წუთზე ჯერ სვანიძემ გაიტანა მეორე ბურთი, ნიკოლოზ კოპლატაძემ კდევ უფრო გაზარდა ანგარიში, 0:3. ამას ნიკა ჩალაძე და ნიკოლოზ კურტანიძემ თითო გოლი დაუმატეს და საბოლოოდ ფარმაცევტებმა 0:5 იმარჯვეს. დინამოს მსგავსად, პსპ-ს 18 ქულა აქვს და ეს გუნდები მეოთხე-მეხუთე ადგილებს იყოფენ. FLC03 კი 3 ქულით მეშვიდეზეა.