ამჯერად, ორი ცენტრალური მატჩი ვიხილეთ. ერთში რევანში შედგა და მისი ავტორი ნიუ ვიჟენ ჯორჯიანსია, მეორეში კი ეს არ გამოვიდა - პსპ-მ მრისხანე კსუ-სთან რევანში ვერ შეძლო. ჯორჯიანსელებმა არმია შეაჩერეს და ზედიზედ მე-5 მოგებით არმიელებს ქულებით გაუთანაბრდნენ. ფარმაცევტების მარცხით კარგად ისარგებლა დინამო თბილისმა და მე-4 ადგილზე აღზევდა. სეუ-სა და UG-ს დაპირისპირებაში, სეზონის პირველი ფრე დაფიქსირდა. მოკლედ, ასეთი იყო ფუტსალის უმთავრესი ლიგის მე-11 ტური. დეტალური მიმოხილვისთვის თანმიმდევრობას მივყვეთ.

დინამო თბილისმა ლიგის დებიუტანტი FLC03-ს მეორედაც დამარცხა, ამჯერად უფრო დიდი სხვაობით. თუმცა, შევარდნები თამაშს იგებდნენ... ლუკა ელიზბარაშვილმა ეფექტური დარტყმით, მეორე წუთზე გახსნა ანგარიში და დინამო დააწინაურა, 1:0. ამას შევარდნების მწვავე შეტევები მოჰყვა, რომელმაც შედეგი მოიტანა. მე-9 წუთზე დავით ბერაძემ წონასწორობა აღადგინა, 1:1. ხუთ წუთში კი საბა აბრამიშვილმა FLC03 წინ გაიყვანა, 1:2. ელიზბარაშვილმა წუთნახევარში მეორედაც გაიტანა, 2:2. ტაიმის მიწურულს კი საბა ეგრისელაშვილის გოლით დინამო დაწინაურდა, 3:2. მეორე ტაიმში დინამოელებმა იძალეს და 4-ჯერ დალაშქრეს მეტოქის კარი. ელიზბარაშვილის მსგავსად, კახა მაღლაკელიძემაც დუბლი შეასრულა. თეიმურაზ ექიზაშვილმა და დავით ხუბუტიამ კი თითო ბურთი გაიტანეს. დინამომ 7:2 იმარჯვა, 21 ქულით მე-4 ადგილზეა და 3 ქულით უსწრებს მდევარ პსპ-ს. FLC03-ი კი 3 ქულით ბოლო საფეხურზეა.

ამ სეზონის მე-4 ტურში, არმიამ 5:3 სძლია ნიუ ვიჟენ ჯორჯიანსს. ამჯერად, ტურის ცენტრალური მატჩში, ავთანდილ ასათიანის ბიჭებმა სრულფასოვანი რევანში აიღეს. მე-3 წუთზე რონინიომ მეტოქეს ბურთი მოპარა და ნიუ ვიჟენი დააწინაურა, 1:0. ჯორჯიანსელებმა არმიელებს გონზე მოსვლა არ აცალეს და წუთნახევარში ფორა გააორმაგეს. ვახტანგ კეკელიამ მეტოქის იერიში შეაჩერა, სწრაფ სოლო-რეიდს მეტოქის საჯარიმო მოედანზე ჩაწოდება მიაყოლა და მოულოდნელად ბერეჩიკიძემ ბურთი საკუთარ კარში ჩაჭრა, 2:0. ჯორჯიანსელებმა ეს არ იკმარეს და ნახევარ წუთში რონინიოს გამჭოლი პასით კეკელიამ პირველი გოლი გაიტანა, 3:0. ნიუ ვიჟენ ჯორჯიანსმა მეორე ტაიმიც აქტიურად დაიწყო და 23-ე წუთზე ვახტანგ კეკელიამ ეფექტური დარტყმით, დუბლი მიითვალა, 4:0. ჯორჯიანსელებმა კონტრშეტევებზე თამაში გააგრძელეს და მატჩის ბედი გადაწყვიტეს. 27-ე წუთზე არმიამ მეკარიანად შეუტია, ვახტანგ ჯვარაშვილმა მეტოქის გადაცემა ჩაჭრა და ცარიელ კარში შორეული ზუსტი დარტყმით სხვაობა სოლიდური გახადა, 5:0. ორიოდე წუთში ოთარ ბერეჩიკიძის ზუსტი პასი შაკო ცირამუამ გოლით დააფასა, 5:1. გავიდა 6 წუთი და გიორგი თოლორდავას პასით კეკელიამ ჰეთ თრიკი შეასრულა, 6:1. მატჩის ბოლო წუთზე, გიორგი ქურდაძემ კიდევ ერთი ბურთი გაქვითა. ნიუ ვიჟენ ჯორჯიანსმა 6:2 მოიგო და არმიას ქულებით გაუთანაბრდა და ახლა ეს გუნდები მეორე-მესამე ადგილებს იყოფენ. 

პსპ-სა და კსუ-ს შერკინება, ამჯერადაც ტურის ცენტრალური მატჩის საკადრისად წარიმართა. მართალია, პირველი წრის დარად (3:1), ახლაც სტუდენტებმა იმარჯვეს, მაგრამ მხოლოდ მინიმალური სხვაობით. თამაში სწრაფ ტემპში დაიწყო და დინამიურად წარიმართა. ორმხრივი შეტევების მიუხედავად, ტაიმის თითქმის 2/3 უგოლოდ გაილია. მე-15 წუთზე აუტიდან დაგორებული ბურთი საბა ტყეშელაშვილმა კარში დაარტყა. კავკასიელთა კაპიტანმა ნიკა მანგოშვილმა ბურთს მიმათულება შეუცვალა და ანგარიშიც ასე გაიხსნა, 0:1. შესვენებამდე შედეგი აღარ შეცვლილა. მეორე ტაიმიც დაძაბულად და საინტერესოდ წარიმართა. 30-ე წუთზე ტყეშელაშვილის პასით ნოდარ ქურცაძემ ბურთი შეუჩერებლად კარში გადაგზავნა, ბურთი ხარიხამ აისხლიტა, დამატებაზე ჯანიკო გიორგაიამ იმარჯვა და ფორა გააორმაგა, 0:2. პსპ თამაშის გადარჩნას შეეცადა და მეკარიანად შეუტია, მაგრამ მხოლოდ ერთი ბურთის გაქვითვა შეძლო. ნიკოლოზ კურტანიძის პასით ლევან სვანიძემ სხვაობა მინიმუმამდე შეამცირა, 1:2. კსუ-მ ამ შედეგით იამარჯვა და 6-ქულიანი ფორით ცხრილის სათავეშია. პსპ კი ერთი საფეხურით დაქვეითდა და ახლა 18 ქულით მეხუთეზეა.

სეუ-სა და UG-ს შორს, პირველი წრის მატჩში, UG-მ სოლიდური სხვაობით (1:6) იმარჯვა. თუმცა, ამჯერად ეს სტუდენტური დერბი უფრო დრამატული გამოდგა და არა მხოლოდ ამ გუნდებს შორის, არამედ, ამ სეზონის პირველი ფრე დაფიქსირდა. მე-5 წუთზე ანდრია ძიძიგურმა სეუ დააწინაურა, 0:1. წუთში გუგუნავამ ანგარიში გაათანაბრა, 1:1. მე-9 წუთზე ბადრი კალანდაძემ UG წინ გაიყვანა, 2:1.  თუმცა, ნახევარ წუთში ნიკა უთრუგაშვილმა წონასწორობა აღადგინა, 2:2. ხუთი წუთი გავიდა და ანდრია ძიძიგურმა, მეორე გოლი მიითვალა და სეუ წინ გაიყვანა, 2:3. მეორე ტაიმის სტარტზე ანდრია ძიძიგურმა ჰეთ თრიკი შეასრულა და სეუ-ს ორბურთიანი ფორა შეუქმნა. 24-ე წუთზე მეტოქის მიერ საკუთარ კარში ჩაჭრილი ავტოგოლის წყალობით, UG-მ ერთი ბურთი კიდევ გაქვითა, 3:4. გავიდა წუთი და ნიკა უთრუგაშვილმა, სეუ-ს ორბურთიანი ფორა აღადგინა, 3:5. UG-მ ბოლომდე იბრძოლა და გარჯაც დაუფასდა. 28-ე წუთზე ბადრი კალანდაძემ ანგარიშში სხვაობა მინიმუმამდე შეამცირა, 4:5. მატჩის ბოლოსწინა წუთზე საბა დავითულიანმა ანგარიში გაათანაბრა. საბოლოოდ მატჩი 5:5 საბრძოლო ფრით დასრულდა, რაც ამ თამაშისთვის ლოგიკური უფრო იყო, ვიდრე ალოგიკური. UG 7 ქულით მე-6 საფეხურზე დარჩა, სეუ კი 4 ქულით ისევ მეშვიდეა.