ზამთრის თვენახევრიანი პაუზის შემდეგ, ფუტსალის მთავარ ლიგაში, სეზონი განახლდა. მე-12 ტურში ყველაზე ჯერჯერობით ყველაზე უხვგოლიანია, 31 გოლი გავიდა და აქედან ერთი გიორგაიას პოკერია... ამჯერად ორი რევანში დაფიქსირდა, პსპ-მ ნიუ ვიჟენთან, შევარდნებმა კი UG-სთან რევანში აიღეს. ამასთან, კავკასიური ტრიუმფი გრძელდება, თანაც 6 ქულიანი ფორით... ასეთია ამ ტურის მოკლე რეზიუმე, დეტალური ანალიზისთვის თანმიმდევრობას მივყვეთ.

სეზონის პირველ ნახევარში დაწყებული კავკასიური ტრიუმფი გრელდება. მეხუთე ტურის მსგავსად, კსუ-მ დინამო თბილისს ისევ მოუგო, ამჯერად ჯანიკო გიორგაიას პოკერით. კავკასიელებმა სტარტზევე გამოაჩინეს ბრჭყალები. პირველივე წუთზე, გიორგი ჩიმაკაძის დარტყმისას, დინამოს მეკარემ იმარჯვა, მაგრამ ჯანიკო გიორგაიამ ანგარიში გახსნა, 1:0. დინამოელები გამოცოცხლდნენ, მაგრამ ექიზაშვილმა შანსი ვერ გამოიყენა. მე-10 წუთზე სებისკვერაძემ მეტოქეს ბურთი მოპარა და მისი პასით ჩიმაკაძემ ფორა გააორმაგა, 2:0. ამან დინამო გაახელა. მათ მეკარიანად შეუტიეს, რამაც მოგვიანებით შედეგი გამოიღო. სწორედ მეკარე ზაურ კოტრიკაძის პასით, მე-17 წუთზე გეგა კოშაძემ სხვაობა მინიმუმამდე შეამცირა, 2:1. მეორე ტაიმის სტარტზეც სტუდენტებმა იძალეს. 21-ე წუთზე სებისკვერაძის გამჭოლი პასი გიორგაიამ გოლად აქცია, 3:1. წუთში ჯანიკო გიორგაიამ, იმავე სებისკვერაძის პასით, მსგავსი გოლი გაიტანა და სხვაობა გაზარდა, 4:1. დინამოეები ამას არ შეეგუენ და სხვაობა შეამცირეს. გეგა კოშაძის დარტყმისას ბურთი ჯერ ძელს მოხვდა, მერე მეკარე ალი ასლანს და ბადეში აღმოჩნდა, 4:2. მერე კავკასიელთა ჯერი დადგა, 31-ე წუთზე ჩიმაკაძის პასით გიორგაიამ პოკერი შეასრულა (5:2) და 10 გოლით ბომბარდირთა ცხრილში, მეორე ადგილზე მყოფ გიორგი ქურდაძეს გაუთანაბრდა. დინამოელები თამაშის გადარჩენას შეეცადნენ, მაგრამ მხოლოდ ერთი ბურთი გაქვითეს - 38-ე წუთზე ექიზაშვილმა სხვაობა ორამდე შეამცირა. კსუ-მ 5:3 იმარჯვა, ცხრილში პირველობა და 6 ქულიანი ფორა შეინარჩუნა, დინამო კი 21 ქულით მეხუთეა.

თუ მეხუთე ტურში არმიამ 7 უპასუხო გოლით სძლია სეუ-ს, ამჯერად მხოლოდ ორი ბურთის სხვაობით მოიგო. ამ მატჩის სტარტი დრამატული გამოდგა. პირველვე წუთზე გიორგი ქურდაძემ გახსნა ანგარიში, 0:1. წუთში სანდრო ობოლაძემ მეტოქეს ბურთი მოპარა და ანგარიში გაათანაბრა, 1:1. მე-5 წუთზე ოთარ ბერეჩიკიძემ არმიელები წინ გაიყვანა, 1:2. ლადო ბურდულის ბიჭები ამას არ დასჯერდნენ და გვარიანი ფორა შეიქმნეს. ვანო ბექაურმა და თამაზ გოგსაძემ თითო ბურთი გაიტანეს, 4:1. თუმცა, ობოლაძემ მეორე გოლიც მიითვალა და პირველი ტაიმი არმიელებმა 2:4 მოიგეს. მეორე ტაიმში ბექაურმაც მეორე გაიტანა, რასაც გიორგი ზუნტუროვის ერთი გოლიც მოჰყვა. ამას სეუ-მ შალვა გუგუნავას და გურამ ჩალიგავა თითო გოლით უპასუხა. საბოლოდ არმიამ 4:6 იმარჯვა და 27 ქულით მეორე ადგილზეა. სეუ კი 4 ქულით ბოლო საფეხურზე დაეშვა.

ჯორჯიანსელებმა, ბოლო მატჩებში პსპ დაჯაბნეს, რის გამოც ტურის ცენტრალურ შეხვედრაში, ფავორიტებად იყვნენ მიჩნეული, მაგრამ ფარმაცევტებმა რევანში შეძლეს და მრისხანე მეტოქეს მარცხი აგემეს. მე-6 წუთზე ხაბალაევმა პსპ დააწინაურა, 0:1. ოციოდე წამში რონინიოს გამჭოლი პასი თოდუამ გოლად აქცია, 1:1. ამ დრამატული სტარტის შემდეგ, თამაში უფრო საინტერესოდ გაგრძელდა. მე-13 წუთზე ჯვარაშვილმა პენალტი გამოიყენა და ნიუ ვიჟენი დაწინაურდა, 2:1. ტაიმი ასე დასრულდა, მაგრამ მეორე ნახევარი ფარმაცევტებისთვის უფრო შედეგიანი აღმოჩნდა. 25-ე წუთზე ხაბალაევმა მეორე ბურთი გაიტანა და ანგარიში გაათანაბრა, 2:2. მალევე მეტოქეებით გარემოცულმა სვანიძემ რთული ვითარებიდან გაისროლა და პსპ კვლავ წინ გაიყვანა, 2:3. ამას  ჩალაძის რეიდი მოჰყვა, რომელიც ორაგველიძემ გოლით დააფასა, 2:4. განსაკუთრებით დრამატული და უხვგოლიანი (4 ბურთი გავიდა), მატჩის ბოლო 3 წუთი აღმოჩნდა. წითელი ბარათის გამო ჯვარაშვილს მოედნის დატოვება მოუწია, მაგრამ ნიუ ვიჟენმა  სხვაობა მაინც შეამცირა - 38-ე წუთზე გაბრიჩიძემ მახვილი კუთხიდან გაიტანა, 3:4. ჯორჯიანსმა კვლავ მეკარიანად შეუტია, მაგრამ მეკარე ფხაკაძემ პსპ არაერთხელ იხსნა და იქითაც გაუტანა მეტოქეს... ფხაკაძის გარდა, დაუცველად დატოვებული ჯორჯიანსის კარი, კოპლატაძემ და ახალაიამაც შორეული დარტყმებით დალაშრეს და საბოლოოდ 3:7 იმარჯვეს. ამ მოგებით, პსპ-მ მეოთხეზე აინაცვლა, დინამოს ქულებით გაუთანაბრდა და მესამეზე მყოფ ნიუ ვიჟენს 3 ქულით ჩამორჩება.

სეუ-სთან მე-6 ტურში მოგების შემდეგ, შევარდნებმა ჩემპიონატში მეორე გამარჯვება იზეიმეს. არა და, პირველ წრეში, UG-სთან FLC03 გვარიანად დამარცხდა (5:2). ამჯერად კი შევარდნებმა რევანში აიღეს. მატჩი დაძაბულად წარიმართა. გარდამავალი უპირატესობის მიუხედავად, მეტოქეები ფრთხილობდნენ და პირველი ტაიმი უგოლო დასრულდა. 25-ე წუთზე კი ვაჟა კვარაცხელიამ მახვილი კუთხიდან გაიტანა და სტუდენტები დაწინაურდნენ, 0:1. წუთიც არ იყო გასული და გიორგი ტაბახმელაშვილმა სტუდენტების კომბინაცია ჩაჭრა, საბა აბრამიშვილმა კი წონასწორობა აღადგინა, 1:1. თამაში გარდამავალი უპირატესობით გაგრძელდა და ისევ შევარდნებმა იძალეს. 34-ე წუთზე ნიკოლოზ მონასელიძის გამჭოლი პასით აბრამიშვილმა დუბლი მიითვალა. FLC03-მ 2:1 მოიგო, 6 ქულით მეშვიდე ადგილზე აინაცვლა და მეექვსეზე მყოფ UG-ს, ახლა მხოლოდ ქულით ჩამორჩება.