მეორე წრის ბოლოსწინა, რიგით მე-13 ტური საკრალური და ამავე დროს შედეგიანობით გამორჩეული აღმოჩნდა. სარეკორდო, 10-ბურთიანი სხვაობა, პირველად დაფიქსირდა. ისევე როგორც მიჯრით ზედიზედ მეორე პოკერი და ეს კავკასიელთა ანგარიშზეა. ამას გარდა, რევანში ორი სხვადასხვა გუნდის ავტორობით, სეზონის პირველი უგოლო ფრე, თანაც დერბიში. ყველაფერი ეს, ამ ტურში მოხდა... ახლა კი ყველაფერს თანმმდევრობით მივყვეთ.

ჯორჯიანსელთა მძლეველი პსპ არმიას შეეჭიდა. ეს შეხვედრა ტურის ცენტრალური მატჩის საკადრისად წარიმართა. მეტოქეებმა ბრძოლის გარდა, სანახაობრივად მდიდარი და საგოლე მომენტებით დახუნძლული თამაში შემოგვთავაზეს. მოკლედ, ყველაფერი კარგი იყო გარდა ერთისა, მატჩი უგოლოდ დასრულდა. ხიფათი ორივე კართან შეიქმნა და ხან მეტოქე გუნდის მეკარეები მარჯვობდნენ და ხანაც შემტევი გუნდი დამაგვირგვინებელ ფაზაში მოიკოჭლებდა. ერთი სიტყვით, მე-13 ტური ორივე ამ გუნდისთვის საკრალური აღმოჩნდა, რადგან ორივემ 2 ქულა დაკარგა. ამ ფრით კსუ-მ და ნიუ ვიჟენმა იხეირეს. არმიას სწორედ ჯორჯიანსი წამოეწია, ცხრილის ლიდერმა კსუ-მ, მდევარ არმიასთან ფორა 8 ქულამდე გაზარდა. ნიუ ვიჟენმა კი პსპ-სთან ქულათა აქტივი 5 ქულამდე გაზარდა.

სეუ-სთან დამარცხებულმა დინამო თბილისმა, ოთხ ტურში მრისხანე ნიუ ვიჟენ ჯორჯიანსს მოუგო და თავად გახდა სენსაციის ავტორი, ეს პირველ წრეში მოხდა. ამჯერად კი ჯორჯიანსელებმა რევანში აიღეს. ნიუ ვიჟენმა მატჩის სტარტზევე გამოაჩინა ბრჭყალები და ანგარიშის გახსნაც შეეძლო, მაგრამ ირაკლი თოდუამ ეს ვერ მოახერხა. სანაცვლოდ, დინამოელებმა პირველივე რეალური მომენტი გამოიყენეს და ლაშა კაკაჩიამ ანგარიში გახსნა, 1:0. კაკაჩიას დუბლის შესრულებაც შეეძლო, მაგრამ ჯორჯიანელთა მეკარე ბექა ტყემალაძემ იმარჯვა და როგორც აღმოჩნდა საგოლე შეტევაც წამოიწყო, რომელიც რონინიომ გატანილი ბურთით დააგვირგვინა, 1:1. ორიოდე წუთში ვახტანგ კეკელიას გამჭოლი პასით ნიკოლოზ გაბრიჩიძემ ნიუ ვიჟენი წინ გაიყვანა, 1:2. ავთანდილ ასათიანის ბიჭები ამას არ დასჯერდნენ და მეორე ტაიმი სწრაფი გოლებით დაიწყეს. 21-ე წუთზე რონინიოს პასით თოდუამ ფორა გააორმაგა, 1:3. წუთნახევარში მათ როლები გაცვალეს - თოდუას პასით, ახლა უკვე რონინიომ გაიტანა, თან დუბლი მიითვალა, 1:4. დინამოელებმა ბრძოლა გააგრძელეს და 31-ე წუთზე გეგა კოშაძემ, სხვაობა შეამცირა, 2:4. აქედან 7 წუთში თოდუას გრძელი პასი გაბრიჩიძემ გოლად აქცია, დუბლიც მიითვალა და საბოლოო ანგარიში დააფიქსირა, 2:5. ამ მოგებით ჯორჯიანსმა მესამე ადგილზე პოზიციები გაიმყარა - მდევარ პსპ-ს 5 ქულით გაუსწრო და მერეზე მყოფ არმიას მხოლოდ ქულით ჩამორჩება. დინამო კი 21 ქულით ისევ მეხუთეზეა.

მიმდინარე სეზონის მე-6 ტურში კსუ-მ UG-ს 6:2 სძლია. ამჯერად კი სტუდენტურ დერბიში კავკასიელთა ტრიუმფი შედგა, მათ 10 უპასუხო გოლით დააჯილდოვეს მეტოქე. სხვათა შორის, ამ სეზონში 10-ბურთიანი სხვაობით ჯერ არავის მოუგია დსა ეს სარეკორდოა. ამ შეხვედრაში კავკასიელთა ფორვარდმა ჯანიკო გიორგაიამ ბენეფისი მოიწყო, წინა ტურის მსგავსად, ამჯერადაც პოკერი შეასრულა. ზედიზედ ორი პოკერით გიორგაიას 14 გოლი დაუგროვდა და ბომბარდირთა ცხრილში ერთპიროვნულად გალიდერდა. საბა მაჩიტიძემ დუბლი შეასრულა. ნოდარ ვ. ქურცაძემ, ნოდარ მ. ქურცაძემ და ზურაბ ლუკავამ თითო გოლი გაიტანეს. საბოლოო ანგარიში კი ვაჟა კვარაცხელიას ფეხიდან, ავტოგოლით დაფიქსირდა, 0:10. ამ გამარჯვებითა და არმიელთა ფრით, ცხრილის ლიდერმა კსუ-მ, 8-ქულიანი ფორა შეიქმნა. UG კი 7 ქულით მეექსეზე დარჩა.

მეორე წრე დასასრულს უახლოვდება და ლიგაში დარჩენისთვის ბრძოლა კიდევ უფრო დაიძაბა. თუ პირველ წრეში FLC03-მა სეუ-ს სძლია (1:5) და მაშინ სეზონის პირველი გამარჯვება იზეიმა, ამჯერად სტუდენტებმა შევარდნებზე რევანში აიღეს. არა და, FLC03 თამაშს ორჯერ იგებდა, მაგრამ სტუდენტებმა არა თუ ფრე გაახერხეს, მოიგეს კიდეც. თამაში სწრაფი გოლებით დაიწყო. პირველივე წუთზე საბა აბრამიშვილმა FLC03 დააწინაურა, 1:0. ორიოდე წუთში გიორგი წიქვაძემ ანგარიში გაათანაბრა,1:1. თუმცა, მე-11 წუთზე დავით ბერაძემ შევარდნები კვლავ წინ გაიყვანა, 2:1. თუმცა, ანდრია ძიძიგურმა წონასწორობა აღადგინა, 2:2. განსაკუთრებით დრამატული მატჩის ბოლო 2 წუთი აღმოჩნდა. 29-ე წუთზე ძიძიგურმა დუბლი შეასრულა და სეუ წინ გაიყვანა 2:3. ორმოციოდე წამში სანდრო ობოლაძემ თავისივე გამომუშავებული პენალტი გოლად აქცია, 2:4. ამ მოგებით სეუ ქულებით UG-ს გაუთანაბრდა (7-7 ქულა) და ცხრილში ბოლოდან მე-7 ადგილზე აინაცვლა. FLC03 კი 6 ქულით ბოლო საფეხურზეა.