ფუტსალის უმთავრეს ლიგაში მეორე წრე სარეკორდო ტურით დასრულდა. მე-14 ტურში, 43 გოლი გავიდა, რაც ქართული ფუტსალის ლიგის არა მხოლოდ მიმდინარე სეზონისთვისაა სარეკორდო. ასეთ უხვგოლიანი ტური, თანაც მხოლოდ 4 მატჩში, სხვა ქვეყნების ფუტსალშიც ძალზე დიდი იშვიათობაა. 43 გოლიდან ამჯერადაც ერთი პოკერია, ორიც ჰეთ თრიკი და რამდენიმე დუბლი. თავისივე რეკორდი გააუმჯობესა კსუ-მ, რომელმაც 12 უპასუხო ბურთი გაიტანა. გოლების სიმრავლით გამორჩეულ ამ ტურს, ცხრილში გუნდების პოზიციები არ შეუცვლია. თითქმის უცვლელი დარჩა ქულების ბალანსიც, მაგრამ ერთი გამონაკლისის გარდა - დინამოს მარცხით პსპ-მ ისარგებლა და ქულების ფორა ოთხამდე გაზარდა. ცხრილს 8 ქულიანი ფორით კვლავ კსუ ლიდერობს. საპირისპირო სურათია აუტსაიდერთა შორის. მე-5 ადგილზე მყოფი დინამო თბილისი, ორ მდევარს 14 ქულით უსწრებს, ერთს კი 15-ით. შესაბამისად, აუტსაიდერთა ტრიოში, UG და სეუ თითო ქულით უსწრებენ FLC03-ს. უკვე ცხადია, რომ რეგულარული სეზონის დასკვნით ტურში, ცხრილის ბოლო სამეულში ცხარე ბრძოლები გაიმართება და ყველა მათგანი სენსაციის ავტორობას შეეცდებიან. ყველაფერი ეს მომავლის საქმეა, მანამდე კი მეორე წრის დასკვნითი ტური თანმიმდევრობით მიმოვიხილოთ.

პირველ წრეში, ნიუ ვიჟენ ჯორჯიანსმა, UG-ს 4:2 სძლია, ამჯერადაც ორი ბურთი მიიღო, მაგრამ სანაცვლოდ 7 გაუტანა. ნიკოლოზ გაბრიჩიძემ, ვახტანგ კეკელიამ, ნუკრი ჭუმბურიძემ და ირაკლი თოდუამ თითო ბურთი იკმარეს. ვახტანგ ჯვარაშვილმა ჰეთ თრიკი შეასრულა. UG-დან ლევან გუგუციძე და გიორგი ქავთარაძე თითო გოლით გამოირჩნენ. ნიუ ვიჟენმა 7:2 მოიგო, 30 ქულით მე-3 საფეხურზეა, მდევარ პსპ-ს 5 ქულიანი ფორით უსწრებს და კვლავ ქულით ჩამორჩება არმიას. UG კი 7 ქულით მეექვსეზეა.

კსუ-მ თავისივე რეკორდი (10-ბურთიანი სხვაობით მოგება) გააუმჯობესა. კავკასიელებმა FLC03-სთან 12:0 მოიგეს და ბოლო ორ ტურში 22 გოლის გატანა შეძლეს. მიმდინარე სეზონში გატანილი ბურთების რაოდენობით, კსუ-სა და პსპ-ს საუკეთესო მაჩვენებელი აქვთ - 64-64 გოლი. თუმცა, ფუტსალის ლიგის რვა გუნდს შორის, ყველაზე ნაკლები, 13 გოლი კსუ-მ მიიღო. სტუდენტებიდან ნოდარ ვ. ქურცაძემ ჰეთ თრიკი შეასრულა, ნიკა მანგოშვილმა, ნიკა ხარატიშვილმა და ნოდარ მ. ქურცაძემ დუბლები მიითვალეს. საბა მაჩიტიძემ, გარი წერეთელმა და ლუკა ფარცვანიამ თითო ბურთი გაიტანეს. კსუ-ს 39 ქულა აქვს და 8 ქულიანი ფორით ლიდერობს. FLC03 კი 6 ქულით ბოლო საფეხურზეა.

მიმდინარე სეზონში, პსპ-მ ყველაზე დიდი, 7-ბურთიანი სხვაობით, FLC03-სთან მესამე ტურში იმარჯვა. ვეტერინარებმა ამჯერად სეუ-ს 9 ბურთიანი სხვაობით, 2:11 სძლია. 11 გოლიდან ნიკოლოზ კურტანიძემ პოკერი შეასრულა, ნიკა ჩალაძემ და ალექსანდრე ორაგველიძემ დუბლები შეასრულეს. ნიკოლოზ კოპლატაძე, ლევან სვანიძე და გიორგი ხაბალაევი თითო გოლით გამოირჩნენ. სეუ-დან გურამ ჩალიგავამ და ნიკა სიდამონიძემ თითო ბურთი გაიტანა. პსპ 25 ქულით მეოთხეა და მდევარ დინამოს 4 ქულით უსწრებს. სეუ კი 7 ქულით მეშვიდეზეა.

არმიასა და დინამო თბილისის დაპირისპირება ტურის ცენტრალური მატჩი გახლდათ. გასულ ტურში, ცხრილის ლიდერის მდევარი არმია, პსპ-მ ნულოვანი ფრით შეაჩერა. დინამოც შეეცადა მოეგო და პსპ-სთან ერთქულიანი ჩამორჩენა არ გაეზარდა, მაგრამ ეს ვერ შეძლო. თუკი პირველი წრის ბოლოს, არმიელებმა მხოლოდ მინიმალური სხვაობით შეძლეს დინამოელების ძლევა, ამჯერად ლადო ბურდულის ბიჭებმა უფრო დამაჯერებლად მოიგეს. პირველივე წუთზე შაკო ცირამუამ  არმია დააწინაურა და პირველი ტაიმიც ასე დასრულდა. მეორე ტაიმი დრამატული და უხვგოლიანი გამოდგა 24-ე წუთზე გიგა ბერაიამ სხვაობა გააორმაგა, 2:0. თუმცა წუთში საბა ეგრისელაშვილმა სხვაობა მინიმუმამდე შეამცირა, 2:1. გარდამტეხი გამოდგა ტაიმის შუაწელი, რომელშიც შაკო ცირამუასა და გიორგი ქურდაძის გოლებმა არმია გამარჯვებას დაუახლოვა. ამის მერე მეტოქეებმა მონაცვლეობით ორ-ორი გოლი გაიტანეს. საბოლოოდ, არმიადან ცირამუამ და ქურდაძემ დუბლები შეასრულეს, ბერაიამ და გოგსაძემ თითო ბურთი გაიტანეს. დინამოდან ეგრისელაშვილმა დუბლი მიითვალა, მაისაიამ კი ერთი ბურთი გაიტანა. არმიამ 6:3 მოიგო და 31 ქულით მეორეა, დინამოს კი 21 ქულა აქვს და მე-5 საფეხურზეა.