საქართვეოს ფუტსალის თასის გათამაშების 1/8 ფინალურ მატჩებში იმ გუნდების ვინაობა გაირკვა, რომლებიც 1/4 ფნალში იასპარეებენ. პსპ, დინამო თბილისი, დუშეთი, თსუ, ბსსა, ქუთაისი, ნიუ ვიჟენ ჯორჯიანსი და კსუ - თასისთვის ბრძოლას ეს გუნდები გააგრძელებენ. დაძაბულ ბრძოლაში, თასის გათამაშებას ერთ-ერთი ფავორიტი, არმია გამოეთიშა. სენსაცია ან მოულოდნელობა, ამჯერად არ ყოფილა და სჯობს დეტალური მიმოხილვისთვის, მატჩების თანმიმდევრობას მივყვეთ.

ევროპის უნივერსიტეტთან პსპ-მ გაილაღა და სოლიდური სხვაობით იმარჯვა, თანაც მშრალად. ფარმაცევტებიდან, გიორგი ხაბალაევმა, ბექა ბექაურმა, ლევან სვანიძემ, ნიკა ჩალაძემ, ნიკოლოზ კოპლატაძემ და გიორგი გაზდელიანმა, თითო გოლი გაიტანეს. ამას, ცოტნე ჩალიჩავას ავტოგოლი დაემატა და პსპ-მ 7:0 მოიგო.

SL ACADEMY-ს დინამო თბილისთან ტექნიკური წაგება (0:5) ჩაეთვალა და შესაბამისად თასის 1/4 ფინალში დინამო გავიდა. დუშეთისა და შევარდენი 2012-ის დაპირისპირება საინტერესოდ წარიმართა. სტარტზე ვახო ჭიკაიძემ, დუშელები დააწინაურა, 1:0. მალევე ლუკა გურეშიძემ წონასწორობა აღადგინა, 1:1. წუთში ნოდარ მწითურმა დუშეთი ისევ წინ გაიყვანა, 2:1. თუმცა, გიორგი ხიდეშელმა კიდევ ერთხელ გაათანაბრა ანგარიში. მეორე ტაიმში გიორგი ძიგრაშვილმა შევარდენი 2012 წინ გაიყვანა, 2:3. თუმცა, 7 წუთში ცოტნე ლალიაშვილმა ფრე დააფიქსირა, 3:3. დუშელებმა თავიანთი შანსი გამოიყენეს, 39-ე წუთზე გიორგი არაბულმა გამარჯვების გოლი გაიტანა და დუშეთმა 4:3 იმარჯვა.

თსუ-მ, რომელიც გასულ სეზონებში მთავარ ლიგაში ასპარეზობდა მთავარლიგელი UG თასის გათამაშებიდან გამოთიშა. თსუ-დან რომან კუხიანიძემ გახსნა ანგარიში, 0:1. ამას გიორგი თოდუამ ჰეთ თრიკი შეაგება. UG-დან ერთადერთი გოლი ლევან გუგუციძემ გაიტანა. თსუ-მ 1:4 მოიგო და მომდევნო რაუნდში გავიდა.

მთავარლიგელს, კიდევ ერთმა ქვედალიგოსანმა მოუგო, ბსსა-მ FLC03 თასის გათამაშებიდან გამოთიშა. საბა ქედელიძემ სწრაფო გოლით ბათუმელები დააწინაურა, 1:0. ამან FLC03 გააცხარა, ლევან კოშაძისა და გიორგი ტაბახმელაშვილის თითო გოლით, შევარდნები წინ გავიდნენ, 1:2. თუმცა, ზღვისპირელებმა მძიმე არტილერია აამუშავეს - ზურაბ შამილაძემ, ჯერ ანგარიში გაათანაბრა, მერე კი ბსსა წინ გაიყვანა, 3:2. მატჩის ბოლო წუთზე გიორგი ლორიამ საბოლოო ანგარიში, 4:2 დააფიქსირა.

ქუთაისმა რუსთავს თასის გათამაშება დაასრულებინა. იმერლებიდან ბაკურ გულუა, ომარ ცარიელაშვილი და გიორგი ფარღალავა თითო გოლით გამოირჩნენ. ქუთათურთა მეგოლე ირაკლი გვეტაძემ ჰეთ თრიკი შეასრულა. ამას რუსთაველთაგან პრესტიჟის გოლით, გიორგი არევაძემ უპასუხა. ქუთაისმა დამაჯერებლად, 6:1 მოიგო.

თასის მოქმედმა გამარჯვებულმა ნიუ ვიჟენ ჯორჯიანსმა, მიმდინარე სეზონში სეუ-ს ორჯერ დამაჯერებლად სძლია და გამარჯვება ამჯერადაც არ გასჭირვებია. ჯორჯიანსელთა მეგოლე ვახტანგ ჯვარაშვილმა ჰეთ თრიკი შეასრულა. ვახტანგ კეკელიამ, რონინიომ, ნიკა ბიძინაშვილმა, ლაშა-გიორგი ობოლაძემ, ნუკრი ჭუმბურიძემ და ნიკოლოზ გაბრიჩიძემ, თითო ბურთი გაიტანეს. სეუ-დან, ასევე თითო გოლით გამოირჩნენ გურამ ჩალიგავა და სანდრო ობოლაძე. ნიუ ვიჟენმა სოლიდური ანგარიშით, 8:2 მოიგო და მომდევნო რაუნდში გავიდა.

არმიელებისა და კსუ-ს დაპირისპირება,1/8 ფინალებში ცენტრალური მატჩი გახლდათ. ტრადიციულად, ამ გუნდების დერბი დაძაბულად და საინტერესოდ წარიმართა. ჩემპიონატში კავკასიელებმა არმიას ორივეჯერ მინიმალური სხვაობით მოუგეს და ახლაც მინიმალური სხვაობა დაფიქსირდა. მე-4 წუთზე, მახვილი კუთხიდან საბა მაჩიტიძის დარტყმული ბურთი, არმიელთა მეკარე ბექა გოგსაძემ მოიგერია, მაგრამ დამატებაზე ნიკა ხარატიშვილმა ყველას დაასწრო და ანგარიში გახსნა, 0:1. არმიელები ანგარიშის გათანაბრებას შეეცადნენ, მაგრამ საწყის 20 წუთში არაფერი შეცვლილა. მეორე ტაიმი გაცილებით დრამატული გამოდგა. არმიამ მთელი ძალებით შეუტია და კსუ-მ დაცვითი თამაში ირჩია. მეკარე ალი ასლანის თავგანწირული თამაშის წყალობით, სტუდენტებმა მეორე ნახევრის სტარტზე გაუძლეს, მაგრამ 26-ე წუთზე ოთარ ბერეჩიკიძემ ანგარიში გაათანაბრა, 1:1. თამაში კიდევ უფრო დაიძაბა და ორმხრივი შეტევების ფონზე ისევ არმიელებმა იმარჯვეს. 33-ე წუთზე ბერეჩიკიძემ მეკარისგან გრძელი პასი მიიღო და მახვილი კუთხიდან გატანილი ეფექტური გოლით არმია წინ გაიყვანა, 2:1. კავკასიელები მდევრის როლში ყოფნას არ შეეგუენ და ორიოდე წუთში ჯანიკო გიორგაიამ ანგარიში გაათანაბრა, 2:2.  სტუდენტებმა კვლავ კონტრშეტევებზე გადააწყვეს თამაში და თავიანთ შანსს დაელოოდნენ. ეს შანსი მატჩის ბოლო წუთზე მიეცათ - ჯანიკო გიორგაიამ თავისივე წამოწყებული კონტრიერიში გოლით დააგვირგვინა (2:3) და კსუ მომდევო რაუნდში გაიყვანა.