ორი საბრძოლო ფრე ერთ ტურში, ამ სეზონში ეს პირველად მოხდა. ერთი ფრით ლიგის დებიუტანტმა სეუ-მ, მოქმედი ჩემპიონი და ცხრილის ლიდერი კსუ შეაჩერა. მეორე ფრე დინამომ გაახერხა და ფლეი ოფის ნახევარფინალის საგზურისთვის ბრძოლაში, პსპ-ს ფორა არ გააზრდევინა. ასეთი იყო, მესამე წრის სასტარტო ტური, რომელშიც სარეკორდო, 36 გოლი გავიდა. გოლები ვახსენეთ და ერთიც უნდა აღვნიშნოთ. სეუ-მ კსუ-ს,  მატჩის ბოლო 4 წუთში 3, მთელ მატჩში კი 5 გოლი გაუტანა. ეს ის კსუ-ა, რომელსაც ამ სეზონში მხოლოდ ერთხელ გაუტანეს 3 ბურთი. მეტიც, 15 ტურში, ყველაზე ნაკლები (18) გოლი აქვს გაშვებული და ყველაზე მეტი გატანილი (69)... ასეთია, ტურის მოკლე რეზიუმე, ვრცელი მიმოხილვისთის თანმიმდევრობას მივყვეთ...

პსპ-მ სეზონის პირველ ტურში დინამოს სძლია, მაგრამ მეორე წრეში დამარცხდა, ამჯერად კი ნახევარფინალის ერთი საგზურისთვის, სწორედ ეს ორი გუნდი იბრძვის. მოკლედ, ამ დერბის ინტრიგა არ აკლდა და თამაში ტურის ცენტრალური მატჩის საკადრისი გამოვიდა. ტაიმის ნახევარი უგოლოდ გაილია. მე-11 წუთზე ფარმაცევტების მეკარე ფხაკაძის გრძელი პასი, გიორგი გაზდელიანმა ეფექტურ გოლად აქცია, 1:0. ორიოდე წუთში შემთხვევითი ავტოგოლით  ანგარიში გათანაბრდა, 1:1. დინამო ამას არ დასჯერდა და მე-17 წუთზე ექიზაშვილის კონტრშეტევა, გეგა კოშაძემ გოლით დააფასა, 1:2. ფარმაცევტებმა ბრძოლა გაგრძელეს და ტაიმის ბოლო წუთზე ნიკოლოზ კურტანიძემ ანგარიში გაათანაბრა, 2:2. მეორე ტაიმის სტარტზე, ახალაიას მოპოვებული პენალტით კურტანიძემ პსპ ისევ წინ გაიყვანა, 3:2. სამიოდე წუთში კოშაძემ მეტოქეს ბურთი მოპარა და წონასწორობა აღადგინა, 3:3. ეს დაძაბული მატჩი საბრძოლო ფრით დასრულდა და ამ გუნდებს შორის არსებული ბალანსიც არ შეცვლილა - მე-4 ადგილზე მყოფი პსპ, მეხუთეზე მყოფ დინამოს კვლავ 4 ქულით უსწრებს.

ნიუ ვიჟენ ჯორჯიანსმა, ლიგის დებიუტანტ FLC03-ს მესამედაც მოუგო. თუმცა, ამჯერად თამაშს შევარდნები იგებდნენ, თანაც ორი მშრალი ბურთით და ჯორჯიანსელებმა მხოლოდ მე-14 წუთზე შეძლეს ერთი გოლის გაქვითვა. FLC0-მ ფსიქოლოგიური წნეხის გარეშე იბრძოლა და მე-5 წუთზე გიორგი ტაბახმელაშვილის გამჭოლ პასს, რიკოშეტი და ავტოგოლი მოჰყვა, შევარდნები დაწინაურდნენ, 0:1. ორიოდე წუთში დავით ბერაძემ ეფექტური გოლით სხვაობა გააორმაგა, 0:2. ჯორჯიანსელები გაცხარდნენ და 9-ჯერ დალაშქრეს მეტოქის კარი. ირაკლი თოდუამ, ვახტანგ კეკელიამ და ვახტანგ ჯვარაშვილმა ორ-ორი ბურთი გაიტანეს. ნიკოლოზ გაბრიჩიძემ, ნიკა ბიძინაშვილმა და იური ჩანგელიამ კი თითო ბურთი იკმარეს. FLC03-დან ნიკა აბრამიშვილმა დუბლი შეასრულა. საბოლოოდ, ნიუ ვიჟენმა 9:4 მოიგო, მესამე ადგილზეა და ქულით ჩამორჩება მეორეზე მყოფ არმიას. FLC03 კი 6 ქულით ბოლო საფეხურზეა.

არმიამ UG მესამედაც დაჯაბნა, მაგრამ ლადო ბურდულის ბიჭებს იოლი გასეირნება მაინც არ ჰქონიათ. არმიელები სტარტზე დაწინაურდნენ. მე-5 წუთზე, შაკო ცირამუამ გახსნა ანგარიში, 1:0. წუთნახევარში ბაკურ ნანეიშვილმა სხვაობა გააორმაგა, 2:0. ამას სტუდენტებმა ათ წუთში უპასუხეს. ვაჟა კვარაცხელიამ, სხვაობა შეამცირა და ტაიმიც ასე დასრულდამ 2:1. მეორე ნახევარი დრამატულად დაიწყო. ჯერ სტუდენტებმა იმარჯვეს და 22-ე წუთზე დავით ჯერანოვმა ანგარიში გაათანაბრა, 2:2. მერე კი არმიელთა ჯერი დადგა. წუთშივე გიორგი ქურდაძემ არმია წინ გაიყვანა, 3:2. კიდევ წუთი გავიდა და ვანო ბექაურმა ორბურთიანი სხვაობა აღადგინა, 4:2. ტაიმის შუაწელს ნიკა ხაჭაპურიძემ საბოლოო ანგარიში დააფიქსირა, 5:2. ამ მოგების შედეგად არმიამ მეორე ადგილზე დარჩა და ცხრილის ლიდერს 6 ქულით ჩამორჩება. UG კი 7 ქულით მე-7 საფეხურზეა.

კავკასიელებმა, ლიგის დებიუტანტ სეუ-ს ორჯერ მოუგეს, თან ორივეჯერ მშრალად და ჯამში 11 გოლი გაუტანეს. შესაბამისად, ფავორიტად მოქმედი ჩემპიონები იყვნენ მიჩნეულნი, მაგრამ ეს სტუდენტური დერბი, სეუ-მ მოულოდნელობად აქცია. მეორე ტურში, დინამოსთან გამარჯვების შემდეგ, სეუ-ელებმა, ჩემპიონი შეაჩერეს და კიდევ ერთი სენსაციის ავტორებად მოგვევლინენ. თუმცა, შეხვედრა ლოგიკური სცენარით დაიწყო: მე-4 წუთზე ჯანიკო გიორგაიამ გახსნა ანგარიში, ექვს წუთში გარი წერეთელმა სხვაობა გააორმაგა, კიდევ წუთში ლუკა ფარცვანიამ გაასამა. მერე გიორგაიამ მეორეც გაიტანა და კსუ-მ პირველი ტაიმი სოლიდურად, 4:0 მოიგო. ეს შედეგი მხოლოდ 30-ე წუთზე შეიცვალა - სანდრო ობოლაძემ ერთი ბურთი გაქვითა, 4 წუთში კი ანდრია ძიძიგურმა სხვაობა ორამდე შეამცირა, 4:2. მართალია, წუთნახევარში საბა ტყეშელაშვილმა, სხვაობა ისევ სამამდე გაზარდა (5:2), მაგრამ მერე სეუ-ს ჯერი დადგა... ნიკა სიდამონიძემ, შალვა გუგუნავამ და ანდრია ძიძიგურმა, თითო ბურთი გაიტანეს და თამაში საბრძოლო ფრით, 5:5 დასრულდა. შედეგად, კავკასიელებმა 2 ქულა დაკარგეს და ახლა ცხრილს 6 ქულით ლიდერობენ. სეუ-მ მეექვსე ადგილზეა და აუტსაიდერ FLC03-ს ორი, ხოლო UG-ს ერთი ქულით გაუსწრო.