მოქმედმა ჩემპიონმა და ცხრილის ლიდერმა კსუ-მ, ყოფილ ჩემპიონ ნიუ ვიჟენ ჯორჯიანსს, ამ სეზონში მეორედ მოუგო და 6-ქულიანი ფორა შეინარჩუნა. ნიუ ვიჟენის ამ მარცხით არმიამ ისარგებლა და მეორე ადგილზე 4-ქულიანი ფორით გამყარდა. ასევე იხეირა მეოთხეზე მყოფმა პსპ-მ, ჯორჯიანსელებთან ქულებში ჩამორჩენა 4-მდე შეამცირა და ახლა სამეულში მოხვედრის უკეთესი შანსი აქვს. აუტსაიდერთა ტრიო კვლავ დამარცხდა და ვითარების გაუმჯობესება ვერცერთმა შეძლო. ასეთია მე-15 ტურის მოკლე რეზიუმე. ტურისა, რომელშიც 37 გოლი გავიდა, რაც საშუალოდ ერთ მატჩში 9 გოლზე მეტის ტოლფასია და ჩინებული მაჩვენებელია. დეტალური ანალიზისთვის, სჯობს თანმიმდევრობას მივყვეთ.

კსუ-სა და ნიუ ვიჟენ ჯორჯიანსის დაპირისპირება, ტურის ცენტრალურ მატჩის საკადრისად წარიმართა. პირველ შეხვედრაში კავკასიელებმა 2:1 იმარჯვეს, მეორე მატჩი, ნიუ ვიჟენმა იგივე ანგარიშით მოიგო და ეს ფაქტორი, დერბის მეტ ინტრიგას სძენდა. კსუ-მ სტარტზევე იძალა და ორი სწრაფი გოლით დაწინაურდა. მეორე წუთზე საბა ტყეშელაშვილმა ანგარიში გახსნა, 1:0. წუთში არჩილ სებისკვერაძემ სხვაობა ორამდე გაზარდა, 2:0. ირაკლი თოდუამ, მე-7 წუთზე ერთი ბურთი გაქვითა (2:1), მაგრამ შვიდ წუთში ნოდარ მ. ქურცაძის დარტყმული ბურთი, რიკოშეტით ნიუ ვიჟენის კარში აღმოჩნდა, 3:1. მეორე ტაიმიც საინტერესოდ წარიმართა. 24-ე წუთზე ჯანიკო გიორგაიამ სხვაობა სამამდე გაზარდა, 4:1. თუმცა, 5 წუთში, ვახტანგ კეკელიამ სოლო-რეიდი გოლით დაასრულა, 4:2. კავკასიელებმა წუთში უპასუხეს - ტყეშელაშვილმა კვლავ შედეგიანად გაისროლა, 5:2. გოლებთან ერთად, სტუდენტებმა სიხისტესაც უმატეს და მატჩის დასრულებამდე თთქმის 8 წუთით ადრე, კსუ-მ გაფრთილებების ლიმიტი ამოწურა. თუმცა, კავკასიელებმა მატჩი კორექტულად ჩაამთავრეს და მეტოქეს პენალტის დარტყმის უფლება არ მისცეს. მიუხედავად ამისა, 36-ე წუთზე ნუკრი ჭუმბურიძემ მახვილი კუთხიდან ეფექტური გოლი გაიტანა და სხვაობა ორამდე შეამცირა, 5:3. ნიუ ვიჟენი თამაშის გადარჩენას შეეცადა და მეკარიანად შეუტია. ამით კარგად ისარგებლეს კავკასიელებმა და 39-ე წუთზე გიორგი ჩიმაკაძემ ტაბლოზე საბოლოო შედეგი დააფიქსირა. კსუ-მ 6:3 მოიგო.

არმიელებმა FLC03-ს ორჯერ დამაჯერებლად (8:1 და 6:3) მოუგეს, ამჯერად საკმაოდ გაუჭირდათ, მაგრამ ლადო ბურდულის ბიჭებმა 3 ქულა მაინც მოიპოვეს. რაოდენ გასაოცარიც არ უნდა იყოს, FLC03 თამაშს 3-ჯერ იგებდა, მაგრამ საბოლოოდ დამარცხდა. მე-8 წუთზე შევარდნებიდან ილარიონ ფიფიამ გახსნა ანგარიში, 1:0. არმიადან შაკო ცირამუამ წონასწორობა აღადგინა. ზუსტად წუთში, ფიფიამ მეორე ბურთიც გაიტანა. ტაიმის მიწურულს ცირამუამაც დუბლი მიითვალა და მეტოქეები შესვენებაზე 2:2 ფრით გავიდნენ. 31-ე წუთზე ლუკას მეურერმა FLC03 დააწინაურა, 3:2. არმია მდევრის როლში ყოფნას არ შეეგუა და ოთხ წუთში გიორგი ქურდაძემ ანგარიში გაათანაბრა, 3:3. მატჩის ბოლო წუთზე ლაშა ფოფხაძემ გაიტანა და არმიელებმა 3:4 მოიგეს. არმია 37 ქულით კვლავ მეორეზეა, FLC03 კი 6 ქულიღ კვლავ ბოლო საფეხურზეა.

მეორე ტურში სეუ-მ დინამო თბილისს სძლია (4:2) და ამ სეზონის პირველი სენსაცია შემოგვთავაზა. წინა, მე-15 ტურში ლიგის დებიტანტმა სეუ-მ მოქმედი ჩემპიონი შეაჩერა და მრისხანე კსუ-ს 5:5 ფრე ეთამაშა. სეუ-ელებს ისევ შეეძლოთ მოულოდნელობის ავტორობა, მაგრამ მცირედი დააკლდათ. დინამოელებმა მე-9 ტურში სეუ-ს დამაჯერებლად, 5:1 სძლიეს და ბევრი ამჯერადაც დინამოს მიიჩნევდა ფავორიტად. თამაში სწორედ ამ სცენარით დაიწყო. მე-2 წუთზე ლუკა ელიზბარაშვილმა დინამო დააწინაურა, 0:1. თუმცა, წუთიც არ იყო გასული და სტუდენტებიდან სანდრო ობოლაძემ ანგარიში გაათანაბრა, 1:1. ტაიმის შეაწელს დინამომ იძალა. მე-9 წუთზე ომარ ასაშვილმა დინამო ისევ წინ გაიყვანა (1:2). კიდევ 3 წუთში საბა ეგრისელაშვილმა ფორა გააორმაგა, 1:3. შვიდ წუთში, ეგრისელაშვილმა მეორე ბურთი გაიტანა და ფორა გაზარდა, 1:4. თუმცა, ნახევარ წუთში ნიკა სიდამონიძემ ერთი ბურთი გაქვითა და ტაიმი 2:4 დასრულდა. მეორე ნახევარში თამაში დაიძაბა. სტუდენტები მატჩის გადარჩენას შეეცადნენ. 34-ე წუთზე სანდრო ობოლაძემ ანგარიშში სხვაობა მინიმუმამდე შეამცირა. მატჩის დასრულებამდე 6 წუთით ადრე, ორივე გუნდმა გაფრთხილებების ლიმიტი ამოწურა, რაც იმას ნიშნავდა, რომ თამაშის ყოველი შემდეგ დარღვევაზე, პენალტი დაინიშნებოდა. 35-ე წუთზე სეუ-მ პენალტი მოიპოვა და ანგარიშის გათანაბრების რეალური შანსი მიეცა, მაგრამ გურამ ჩალიგავამ ბურთი კარს ააცილა. დინამომ 3:4 მოიგო, 25 ქულით მე-5 ადგილზეა და პსპ-ს 4 ქულით ჩამორჩება. სეუ კი 8 ქულით მეექვსე პოზიციაზეა.

სეუ-სთან სარეკორდო 11 გოლის გატანის შემდეგ, პსპ-მ საკუთარი რეკორდი გააუმჯობესა, ამჯერად 12 ბურთი გაიტანა და 10-გოლიანი სხვაობით იმარჯვა. ფარმაცევტებმა UG-ს 2:12 სძლიეს. სტუდენტებთან მატჩში, ლევან სვანიძემ ჰეთ თრიკი შეასრულა, მელტონ ახალაიამ და ნიკოლოზ კურტანიძემ 2-2 გოლი გაიტანეს. გიორგი ხაბალაევმა, გიორგი ქურხულმა, მერაბ აჭარაძემ, ნიკა ჩალაძემ და ლევან სარდანაშვილმა თითო ბურთის ავტორობა იკმარეს. UG-დან ლევან გუგუციძემ და გიორგი მანაგაძემ თითო გოლი ჩაიწერეს. პსპ 29 ქულით მე-4 ადგილზე დარჩა, UG კი 7 ქულით მეშვიდეზეა.