რეგულარული სეზონის დასრულებამდე 4 ტრით ადრე, კსუ-მ არმიას მესამედაც სძლია და ფორა 9 ქულამდე გაზარდა. რაც იმას ნიშნავს, რომ კავკასიამ პირველობა პრაქტიკულად გაინაღდა. ცხრილის ბოლოს მყოფ ტრიოს ამჯერადაც არ გაუმართლა. შევარდნებმა და სეუ-მ წააგეს, UG დინამოს ორჯერ უგებდა, მაგრამ მაინც დამარცხდა. აი, ეს ამბები მოხდა მე-17 ტურში. დეტალური მიმოხილვისთვის თანმიმდევრობას მივყვეთ.

პსპ-მ ორჯერ უკვე მოუგო შევარდნებს და მესამედაც გაიმარჯვა. თუმცა,  ფარმაცევტებს ამჯერად იოლი გასეირნება არ ჰქონიათ. თამაში პსპ-ს უპირატესიობით წარიმართა, მაგრამ გოლი ძალზე დაუგვიანდათ. მე-18 წუთზე მელტონ ახალაიამ პსპ დააწინაურა (1:0) და ტაიმიც ასე დასრულდა. ფარმაცევტები მეორე ნახევარშიც უტევდნენ. შევარდნები თავიანთ შანსს კონტრშეტევაზე ელოდნენ და მათი მოლოდინი 30-ე წუთზე გამართლდა - საბა აბრამიშვილმა კონტრიერიში წამოიწყო და მისი პასით ლუკას მეურერმა ანგარიში გაათანაბრა, 1:1. ფარმაცევტებმა წუთში უპასუხეს, ალექსანდრე ორაგველიძემ ეფექტური გოლით პსპ ისევ წინ გაიყვანა, 2:1. პსპ ამას არ დასჯერდა და მატჩის ბოლო წუთნახევარში, ოცწამიან შუალედში გიორგი ქურხულმა, ახალაიას ასისტენტობით ორჯერ დალაშქრა მეტოქის კარი. ფარმაცევტებმა 4:1 მოიგეს და 32 ქულით მე-4 ადგილზე დარჩნენ. შევარდნები კი 6 ქულით კვლავ ბოლო საფეხურზე არიან.

ჯორჯიანსელებმა სეუ-ს სოლიდურად მოუგეს. მე-9 წუთზე ნიკა ბიძინაშვილმა გახსნა ანგარიში. წუთში ირაკლი თოდუამ ფორა გააორმაგა, 2:0. მეორე ტაიმში ნიკა სიდამონიძემ სხვაობა მინიმუმამდე შეამცირა, 2:1. თუმცა, ვახტანგ კეკელიამ სტატუს კვო აღადგინა, 3:1. სეუ-მ გაიბრძოლა და ეს ანგარიშშიც ასახა. ანდრია ძიძიგურისა და ლუკა ჯოლოხავას თითო გოლით ანგარიში გათანაბრდა, 3:3. ნიუ ვიჟენი გაცხარდა და ნიკოლოზ გაბრიჩიძემ ჰეთ თრიკი შეასრულა. ამას, სეუ-ელთა ერთი ავტოგოლი დაემატა და ჯორჯიანსელებმა 7:3 მოიგეს. ნიუ ვიჟენი 36 ქულით მესამეზეა, მაგრამ არმიას მხოლოდ ქულით ჩამორჩება. სეუ კი 8 ქულით მე-6 საფეხურზეა.

ტურის ცენტრალურ მატჩს ინტრიგა არ აკლდა. თუ კსუ იმარჯვებდა, მაშინ რეგულარულ სეზონში პირველობას პრაქტიკულად გაინაღდებდა. თუ არმია მოიგებდა, მაშინ კსუ-სთან ჩამორჩენას 3 ქულამდე შეამცირებდა და დარჩენილ ტურებში გადასწრების შანსიც ექნებოდა. შესაბამისად, ლადო ბურდულის ბიჭებმა, ტურის ცენტრალური მატჩის სტარზევე შეუტიეს მეტოქეს, მაგრამ შანსი ვერ გამოიყენეს და მე-12 წუთზე ჯანიკო გიორგაიას პასით, არჩილ სებისკვერაძემ ანგარიში გახსნა, 0:1. არმიამ შეტევები გააგრძელა. მე-16 წუთზე ნიკა ხარატიშვილი მოედნიდან გააძევეს და 2 წუთის განმავლობაში არმიელებს რიცხობრივი უპირატესობა ჰქონდათ, მაგრამ ვერ გამოიყენეს. არმიამ მეორე ტაიმი აქტიურად დაიწყო, სტუდენტები საიმედოდ იცავდნენ კარს და კონტრშეტევებით ცდილობდნენ მეორე გოლის გატანას. 33-ე წუთზე გიორგი ქურდაძემ წონასწორობა აღადგინა და არმიელებს არასრული 7 წუთი ჰქონდათ დაწინაურებისთვის, მაგრამ... არმიელთაგან განსხვავებით, კსუ-მ მატჩის ბოლო შეტევა გამოიყენა. გარი წერეთლის დარტყმისას ზურაბ ლუკავამ ბურთს მიმართულება შეუცვალა და გამარჯვების გოლი გაიტანა. ამ გოლით კსუ-მ ფორა 9 ქულამდე გაზარდა და რეგულარულ სეზონში პირველობა პრაქტიკულად გაინაღდა.

დინამო თბილისმა ორჯერ უკვე სძლია (3:0 და 5:1) UG-ს, მაგრამ მესამე მატჩში ორჯერ აგებდა… სტუდენტებმა სტარტზევე შეუტიეს მეტოქეს. მოგვიანებით დინამომ ბურთი დაიჭირა და მეკარიანადაც შეუტია. დინამოელებს ანგარიშის გახსნა შეეძლოთ, მაგრამ ბურთი ხარიხამ აისხლიტა. მალევე UG-მ კონტრშეტევაზე იხეირა, მე-10 წუთზე ლაშა კურტანიძის პასით, დავით ჯერანოვმა სტუდენტები დააწინაურა, 0:1. დინამოელებს წუთშივე შეეძლოთ წონასწორობის აღდგენა, მაგრამ ლუკა ელიზბარაშვილის წაქცევისთვის დანიშნული პენალტი ვერ გამოიყენეს - საბა ეგრისელაშვილის დარტყმული ბურთი, უნივერსიტეტელთა მეკარე რამაზ ბუჯიაშვილმა მოიგერია. დინამომ მოგვიანებით მაინც უპასუხა - მე-17 წუთზე ეგრისელაშვილის პასით ელიზბარაშვილმა ანგარიში გაათანაბრა, 1:1. სტუდენტებმა მეორე ტაიმიც აქტიურად დაიწყეს, 23-ე წუთზე მეკარე ბუჯიაშვილის გრძელი პასი ჯერანოვმა გოლად აქცია და UG ისევ წინ გაიყვანა, 1:2.  დინამოელები გაცხარდნენ, მეტოქე წნეხში მოაქციეს და 32-ე წუთზე ეგრისელაშვილმა ანგარიში გაათანაბრა, 2:2. წუთში ელიზბარაშვილმა დინამო დააწინაურა, 3:2. მატჩის ბოლო ორი წუთი დრამატული აღმოჩნდა - 39-ე წუთზე კახაბერ მაისაიამ გაიტანა, წუთში კი სტუდენტებმა ბადრი კალანდაძის გოლით უპასუხეს. დინამომ 4:3 იმარჯვა, 28 ქულით მე-5 ადგილზეა და 20 ქულით გაუსწრო მდევარ UG-ს.