ფუტსალის თასის 1/4 ფინალურმა მატჩებმა ოვერტაიმისა და პენალტების სერიის გარეშე ჩაიარა, ოთხი ნახევარფნალისტი უკვე ცნობილია. თასის ერთ-ერთი გამარჯვებული ნიუ ვიჟენ ჯორჯიანსი, კსუ-მ გათამაშებიდან გამოთიშა. ნახევარფინალში გავიდა ქვედალიგოსანი ბსსა, რომელიც ფინალის საგზურისთვის დინამო თბილისს დაუპირისპირდება. პსპ კი კავკასიელებს შეეჭიდება. ასეთია მოკლე რეზიუმე, დეტალურად კი თანმიმდევრობას მივყვეთ.

დუშეთი აჭარლებს, კერძოდ კი ბათუმის სახელმწიფო საზღვაო აკადემიის (ბსსა) გუნდს დაუპირისპირდა, რომელიც 4 წლის წინ ფუტსალის მთავარ ლიგაში ასპარეზობდა. მთიულებმა აქტიურად დაიწყეს თამაში და მე-5 წუთზე თორნიკე თოდრიას გოლით დაწინაურდნენ, 1:0. ბათუმელებმა წუთში უპასუხეს - სპარტაკ ლომიძემ ანგარიში გაათანაბრა, 1:1. ხუთ წუთში იმავე ლომიძემ მეორედაც გაიტანა და ბსსა დაწინაურდა, 1:2. მეზღვაურები ამას არ დასჯერდნენ და მალევე ბესიკ ბალაძემ ფორა გააორმაგა, 1:3. ტაიმის დასრულებამდე ორი წუთით ადრე მოსე ჩიკიროვმა სხვაობა კიდევ ეფრო გაზარდა, 1:4. დუშელებმა მეორე ტაიმიც აქტიურად დაიწყეს და 24-ე წუთზე გიორგი ლაგაზაშვილმა სხვაობა შეამცირა, 2:4. მთიულებმა ბოლომდე იბრძოლეს, მაგრამ გოლი დაუგვიანდათ. ბოლო წუთზე გიგა ლაგაზაშვილმა გაიტანა, მაგრამ დუშელებისთვის ეს საკმარისი არ აღმოჩნდა. ბსსა-მ 3:4 მოიგო და ნახევარფინალში გავიდა.

ქუთაისს, მთავარ ლიგაში მოასპარეზე დინამო თბილისი ერგო მეტოქედ. ამ წყვილში ფავორიტად დინამო იყო მიჩნეული და ეს მატჩის შედეგშიც აისახა. დინამოელებმა ქუთათურებს შანსი არ დაუტოვეს და სოლიდური სხვაობით, 1:8 მოიგეს. თბილისელთაგან, მე-2 წუთზე გეგა კოშაძემ გახსნა ანგარიში და მან ჯამში ჰეთ თრიკი შეასრულა. კახა მაღლაკელიძემ და თეიმურაზ ექიზაშვილმა 2-2 ბურთი გაიტანეს. საბოლოო ანგარიში ალექსანდრე ცირეკიძემ დააფიქსირა. იმერელთა გუნდიდან პრესტიჟის გოლი ნიკა ქარელმა გაიტანა.

ქვედალიგოსანმა თსუ-მ ფავორიტი პსპ-ს წინააღმდეგ შედეგიანად დაიწყო თამაში და საწყის 15 წუთში დამაჯერებლადაც იგებდა, მაგრამ ფარმაცევტებმა არა მხოლოდ ქამბექი, მეტიც შეძლეს... მე-4 წუთზე ნიკა ოთინაშვილმა ანგარიში გახსნა, 0:1. ორ წუთში ლაშა ერქომაიშვილმა სტუდენტების ფორა გააორმაგა, 0:2. იმავე ერქომაიშვილმა მე-16 წუთზე სხვაობა გაზარდა, 0:3. პსპ გაცხარდა და შესვენებამდე დარჩენილ 4 წუთში 3 გოლი გაიტანა. ალექსანდე ორაგველიძემ ორჯერ დალაშქრა სტუდენტების კარი. ტაიმის დასრულებამდე 2 წამით ადრე ნიკოლოზ კურტანიძემ წონასწორობა აღადგინა, 3:3. შესვენების შემდეგ თამაში ფარმაცევტების დომინირებით წარიმართა. 30-ე წუთზე მერაბ აჭარაძემ პსპ წინ გაიყვანა, 4:3. ოთხ წუთში კი ორაგველიძემ მესამე ბურთიც გაიტანა და სხვაობა გააორმაგა, 5:3. გავიდა კიდევ ორი წუთი და მელტონ ახალაიამ ორწუთიან მონაკვეთში დუბლი შეასრულა, 7:3. ტაიმის ბოლო წუთზე, სტუდენტებიდან საბა დავითულიანმა და ლაშა ერქომაიშვილმა თითო ბურთი გაიტანეს. პსპ-მ 7:5 მოიგო და ნახევარფნალში გავიდა.

ბოლო 1/4 ფინალი, მთავარი მატჩი გახლდათ, რადგან ნიუ ვიჟენ ჯორჯიანსისა და კსუ-ს დაპირისპირება ყოველთვის დერბია და ეს ტრადიცია ამჯერადაც არ დარღვეულა. რეგულარული სეზონის პირველ შეხვედრაში უნივერსიტეტელებმა 2:1 იმარჯვეს. შემდეგ კი იგივე შედეგით უკვე ნიუ ვიჟენმა მოიგო. ბოლო მატჩი კი კავკასიელებმა დამაჯერებლად, 6:3 სძლიეს მეტოქეს. ფავორიტების ეს ჯახი იმდენად დაძაბული გამოდგა, რომ გარდამავალი უპირატესობით წარმართულ პირველ ტაიმში ანგარიში არ გახსნილა. 23-ე წუთზე თოდუას დაწყებული იერიში კეკელიამ გააგრძელა, ვახტანგ ჯვარაშვილმა კი  ეფექტური გოლით დააგვირგვინა, 1:0. კავკასიელებმა 5 წუთში უპასუხეს, გიორგაიას პასი გიორგი ჩიმაკაძემ დააფასა, 1:1. მატჩის ბოლო 3 წუთი განსაკუთრებით დრამატული აღმოჩნდა. 37-ე წუთზე საბა ტყეშელაშვილმა შორიდან გაისროლა და კსუ წინ გაიყვანა, 1:2. ჯორჯიანსელები ვა-ბანკზე წავიდნენ და მეკარიანად შეუტიეს. სტუდენტები კი დაცვაში გამაგრდნენ. 39-ე წუთზე კსუ-მ მეტოქის შეტევა ჩაშალა და ზურაბ ლუკავამ თავისი საჯარიმოდან ცარიელ კარში გაიტანა, 1:3. მატჩის დასრულებამდე წუთით და 3 წამი დარჩა და ნიუ ვიჟენი მძიმე მდგომარეობაში აღმოჩნდა. ჯორჯიანსელთაგან ნუკრი ჭუმბურიძემ ერთი გოლი გაქვითა, კსუ-მ 2:3 მოიგო და თასისთვის ბრძოლაში ერთ-ერთი ფავორიტი ჩამოიშორა.