კსუ-მ შანსი ხელიდან არ გაუშვა, ფორა ბოლომდე შეინარჩუნა და რეგულარული სეზონის ჩემპიონი გახდა. ტურის ცენტრალურ მატჩში, ნიუ ვიჟენმა არმიას სძლია და მეორეზე გადაინაცვლა. თუმცა, მეორე ადგილისთვის ბრძოლა გრძელდება. აუტსაიდერთა ტრიოდან სეუ-მ იმარჯვადა მე-6 ადგილზე ფრით გამაგრდა. ეს და სხვა მოვლენები მოხდა მე-18 ტურში, რომლის მიმოხილვასაც აქვე გაეცანით.

პსპ-სა და კსუ-ს დერბის ინტრიგა არ აკლდა და შეხვედრა დაძაბულად წარიმართა. კავკასიელები სწრაფი გოლით დაწინაურდნენ, არჩილ სებისკვერაძემ პირველივე წუთზე გახსნა ანგარიში, 1:0. გავიდა 12 წუთი და გუნდის კაპიტამა ნიკა მანგოშვილმა სხვაობა გააორმაგა, 2:0. სტუდენტები ამას არ დასჯერდნენ. ფარმაცევტებმა მეკარიანად შეუტიეს.  მე-16 წუთზე გიორგი ჩიმაკაძემ სწორედ პსპ-ს მეკარე ნიკოლოზ ფხაკაძეს აართვა ბურთი, მცველებთან ბოლომდე იბრძოლა და ფორა გაზარდა, 3:0. ტაიმის ბოლოსწინა წუთზე ნიკოლოზ კოპლატაძემ ერთი ბურთი გაქვითა 3:1. მეორე ტაიმში ფარმაცევტებმა სტუდენტებს მთელი ძალებით შეუტიეს. თუმცა, კსუ-მ კარიც დაიცვა და მეტოქე გოლითაც დაასაჩუქრა. ბოლოსწია წამზე გიორგი ჩიმაკაძემ მეტოქის გადაცემა ჩაჭრა და ბურთი ცარიელ კარში შეაგორა. კსუ-მ 49 ქულა დააგროვა, მდევარს 10 ქულით გაუსწრო, 3 ტურით ადრე მდევრებისთვის მიუწვდომელი შეიქმნა და რეგულარული სეზონის ჩემპიონობა გაინაღდა. მე-4 საფეხურზე მყოფი პსპ 5 ქულით ჩამორჩა არმიას და მდევარ დინამოს ერთადერთი ქულით უსწრებს.

წინა ორი მატჩის მსგავსად, დინამო თბილისმა შევარდნები ამჯერადაც დაიფრინა. FLC03-მა დინამოელებს 13 წუთი გაუძლო, მერე კი კახაბერ მაისაიას ბიჭებმა მეტოქეს გატეხეს. მე-14 წუთზე გეგა კოშაძემ გახსნა ანგარიში 0:1. ამას დინამოელთა გოლების ფოიერვერკი მოჰყვა. თეიმურაზ ექიზაშვილმა და დავით ხუბუტიამ 2-2 ბურთი გაიტანეს. ლუკა ელიზბარაშვილმა და გიორგი თოთლაძემ თითო გოლი იკმარეს. შევარდნებიდან ბექა მირიანაშვილმა პრესტიჟის გოლი მიითვალა. დინამომ 1:7 იმარჯვა და მეოთხეზე მყოფ პსპ-ს მხოლოდ ქულით ჩამორჩება. რაც იმას ნიშნავს, რომ ფლეი ოფის ნახევარფინალში მოხვედრისთვის უკვე კარგი შანსი აქვს.

ნიუ ვიჟენ ჯორჯიანსისა და არმიას დაპირისპირება, ტურის ცენტრალური მატჩის საკადრისად წარიმართა. ამ სეზონში მეტოქებმა ერთმანეთს თითო მატჩი მოუგეს და ეს შეხვედრა ბევრს გააწყვეტდა. კერძოდ, ამ მატჩამდე, ჯორჯიანსელები მხოლოდ ქულით ჩამორჩებოდნენ არმიას და გამარჯვების შემთხვევაში მეორე ადგილზე აღზევდებოდნენ. თუ არმიელები იმარჯვებდნენ, ისინი მეორეზე გამაგრდებოდნენ და მდევარს 4 ქულით დაშორდებოდნენ. მოკლედ, ამ დერბის დაძაბულობა არ აკლდა და გოლებიც უხვად გავიდა. ნიუ ვიჟენი ირაკლი თოდუას  სწრაფი გოლით, მე-3 წუთზე დაწინაურდა, 1:0. თუმცა, არმიელებმა 3 წუთში უპასუხეს. გიგა ბერაიამ ანგარიში გაათანაბრა, 1:1.  ხუთ წუთში ბაკურ ნანეიშვილმა არმიელები წინ გაიყვანა, 1:2. ნიკა ხაჭაპურიძემ კი მე-13 წუთზე ფორა გააორმაგა, 1:3. ჯორჯიანსელებმა ვახტანგ ჯვარაშვილის გოლით უპასუხეს, 2:3. მეორე ტაიმის სტარტზე ნანეიშვილმა ფორა გააორმაგა, 2:4.  წუთში ვახტანგ კეკელიამ კიდევ ერთი გოლი გაქვითა, 3:4. ვანო ბექაურმა 28-ე წუთზე სტატუს კვო აღადგინა, 3:5. ჯორჯიანსელები არ გატყდნენ, თოდუამ და ჯვარაშვილმა კიდევ თითო ბურთი გაიტანეს და ანგარიში პირველად გათანაბრდა, 5:5. მატჩის ბოლო 3-წუთნახევარი დრამატული გამოდგა, რადგან ჯამში 5 გოლი გავიდა,აქედან ჯორჯიანსეებმა 3 ბურთი იზეიმეს. ნიუ ვიჟენმა 8:7 მოიგო და მეორე ადგილზე აღზევდა. ვახტანგ ჯვარაშვილმა ჰეთ თრიკი შეასრულა, ვახტანგ კეკელიამ და ირაკლი თოდუამ დუბლები მიითვალეს. ერთი ბურთი კი რონინიოს ანგარიშზეა. არმიადან ბაკურ ნანეიშვილმა და გიორგი ქურდაძემ ორ-ორი ბურთი გაიტანეს, თითო გოლი კი ბერაიამ, ხაჭაპურიძე და ცირამუამ. არმია 2 ქულით ჩამორჩება ნიუ ვიჟენს, შესაბამისად,  მეორე ადგილისთვის ბრძოლა გრძელდება.

რეგულარული  სეზონის დასრულებამდე 3 ტურით ადრე, ლიგაში დარჩენისთვის ბრძოლა კიდევ უფრო დაიძაბა. მას მერე რაც FLC03 დინამოსთან დამარცხდა, სეუ-სა და UG-ს დაწინაურების შანსი მიეცათ. ამ გუნდების წინა მატჩში საბრძოლო ფრე დაფიქსირდა (5:5), პირველ შეხვედრაში კი UG-მ სოლიდური სხვაობით იმარჯვა (1:6). ამჯერადაც UG დაწინაურდა, მე-18 წუთზე ვაჟა კვარაცხელიამ გახსნა ანგარიში (0:1), მაგრამ შესვენებამდე სანდრო ობოლაძე წონასწორობა აღადგინა,1:1.  მეორე ტაიმში ნიკა უთრუგაშვილმა სეუ წინ გაიყვანა, 2:1. მატჩის მიწურულს ლევან გუგუციძემ ანგარიში გაათანაბრა, 2:2.  თუმცა, ბოლო წუთზე ნიკა უთრუგაშვილმა გამარჯვების გოლი გაიტანა. სეუ-მ 3:2 მოიგო, 11 ქულით მე-6 ადგილზე გამაგრდა და მდევარ UG-ს უკვე 4 ქულით უსწრებს.