რეგულარული ჩემპიონატის ბოლოსწინა ტურში, ნიუ ვიჟენ ჯორჯიანსმა და პსპ-მ მნიშვნელოვანი მატჩები მოიგეს, რითაც ზედა და ქვედა ოთხეულები დააკომპლექტეს. ჯორჯიანსელებმა მეორეობა, ფარმაცევტებმა კი მეოთხეობა, ამავე დროს მეტოქეებიც დაიბევეს. ფლეი აუტის კვარტეტის შემადგენლობას ბოლო ტური ვეღარ შეცვლის. შესაბამისად, ფლეი ოფში კსუ პსპ-ს დაუპირისპირდება, ნიუ ვიჟენი კი არმიას. ამ წყვილებში ორჯერ გამარჯვებული ორი გუნდი, ფლეი ოფის ფინალში ჩემპიონობისთვის შეერკინება ერთმანეთს და 3 მოგებით შეეცდება ოქროს მედლების მოპოვებას. ქვედა ოთხეულიც დაკოპლექტებულია - დინამო, სეუ, UG და FLC03. ისინი ფლეი აუტში 3 ტურს ჩაატარებენ და რეგულარულ ჩემპიონატში დაგროვილი ქულების გაზრდას შეეცდებიან. კვარტეტიდან ბოლოადგილოსანი ქვედა ლიგაში დაქვეითდება და იქ გამარჯვებულს ადგილს გაუცვლის, მე-7 ადგილზე გასული კი ქვედა ლიგის მეორეადგილოსანთან ფლეი აუტში ორი გამარჯვებისთვის იბრძოლებს. ბოო ოთხეულში მე-5 ადგილი დინამოს უკვე დაბევებული აქვეს, გასარკვევი ბოლო 3 პოზიცია დარჩა... თუმცა,  ეს მომავლის საქმეა, მანამდე კი მე-20 ტური მიმოვიხილოთ.

კსუ-ს 10-მატჩიანი წაუგებელი სერია, ლიგაში დარჩენისთვის მებრძოლმა UG-მ შეუწყვიტა. მართალია, კავკასიელებმა  UG-ს, ამ სეზონის ორივე მატჩი სოლიდურად (6:2 და 10:0) მოუგეს, მაგრამ ამჯერად კსუ სულ სხვა ვითარებაში გახლდათ. როგორფ ჩანს, წაუგებელმა სერიამ კავკასიელთა გუნდი გამოფიტა. ამას მოტივაციის სიმწირეც ზედ დაერთო და UG სენსაციის ავტორად მოგვევლინა. კსუ-სა და UG-ს მატჩი ორი განსხვავებული ტაიმისგან შედგებოდა. მე-9 წუთზე გიორგი ჩიმაკაძემ გახსნა ანგარიში და პირველი ნახევარი კავკასიელებმა მოიგეს. შესვენების შემდეგ UG-ს ჯერი დადგა. ლაშა კურტანიძემ 11 წუთში ჰეთ-თრიკი შეასრულა, რასაც დავით ჯერანოვმა ერთი გოლი დაუმატა. UG-მ 1:4 იმარჯვა, 13 ქულით მე-7 ადგილზე გამაგრდა და ბოლოზე მყოფ შევარდნებს უკვე 7 ქულით უსწრებს.

მიმდინარე სეზონში პსპ-ს არმიასთან სასურველი ბალანსი არ ჰქონდა. პირველ შეხვედრაში ლადო ბურდულის ბიჭებმა 4:3 იმარჯვეს, მეორე მატჩი კი უგოლოდ დასრულდა. ამჯერად, ორივე გუნდს ბევრად მეტი მოტივაცია ჰქოდა. თუ არმია მოიგებდა, ამ ტურის თამაშამდე, ქულით გაუსწრებდა ნიუ ვიჟენს და მეორე ადგილს დაიბრუნებდა. პსპ-ს კი მე-4 ადგილზე გამაგრებასა და ფლეი ოფში მოსახვედრად სჭირდებოდა გამარჯვება. ფარმაცევტებმა რიხიანად დაიწყეს მატჩი და სწრაფი გოლებით გვარიანი ფორა შეიქმნეს. მე-7 წუთიდან სამი წუთის განმავლობაში, ლევან სვანიძემ, ნიკოლოზ ფხაკაძემ, მელტონ ახალაიამ და ნიკოლოზ კურტანიძემ თითო ბურთი გაიტანეს, 0:4. არმიელებმა მეტოქეს, შესვენებამდე გიორგი ზუნტუროვის დუბლით უპასუხეს, 2:4. პსპ-მ მეორე ტაიმიც მოიგო - ახალაიამ და კურტანიძემ კიდევ თითო ბურთი გაიტანეს. ასევე ერთი გოლი მიითვალა გიორგი გაზდელიანმაც. არმიადან შაკო ცირამუამ კიდევ ერთი ბურთი გაქვითა. პსპ-მ 3:5 მოიგო, 35 ქულა დააგროვა, მე-4 ადგილთან ერთად ფლეი ოფიც გაინაღდა.

ნიუ ვიჟენმა და დინამომ ურთიერთშეხვედრებში თითო მატჩი მოიგეს. ჯორჯიანსელებმა 5:2 იმარჯვეს, დინამოელებმა კი 8:4 მოიგეს. ამ გუნდების დერბის მოტივაცია და ინტრიგა ამჯერადაც არ აკლდა. პსპ-სთან არმიელთა მარცხის გამო, ნიუ ვიჟენს მეორე ადგილის განაღდების შანსი მიეცა. მოგების შემთხვევაში დინამო მეოთხეობისთვის ბრძოლას გააგრძელებდა. ავთანდილ ასათიანის ბიჭებმა იძალეს, მე-8 წუთზე ნიკოლოზ გაბრიჩიძე ანგარიში გახსნა, 1:0. დინამოელებმა მეორე ტაიმში უპასუხეს - დავით ხუბუტიამ 28-ე წუთზე წონასწორობა აღადგინა, 1:1. ჯორჯიანსელებმა მეტოქეზე ზეწოლა გააძლიერეს და მატჩის ბოლო 4 წუთში შედეგიც მიიღეს. ნუკრი ჭუმბურიძემ ნიუ ვიჟენი კვლავ წინ გაიყვანა, ვახტანგ კეკელიამ საბოლოო ანგარიში დააფიქსირა. ჯორჯიანსელებმა 3:1 მოიგეს და 45 ქულით მეორე ადგილი გაინაღდეს.

სეუ-მ და შევარდნებმა ურთიერთში თითო თამაში მოიგეს - FLC03-მა 5:1 გაიმარჯვა, სტუდენტებმა კი 4:2. ამჯერად კი, შევარდნებს ბოლო შანსი ჰქონდათ, ბოლო ადგილზე არ დარჩენილიყნენ, მაგრამ ეს შესაძლებლობა ვერ გამოიყენეს. მე-6 წუთზე ნიკა სიდამონიძემ ანგარიში გახსნა. კიდევ 6 წუთში სანდრო ობოლაძემ სეუ-ს ფორა გააორმაგა, 2:0. ტაიმის დასრულებამდე გურამ ჩალიგავამაც გოლით გაახარა სტუდენტები. მატჩის მიწურულს კი ნიკა უთრუგაშვილმაც გაიტანა. სეუ-მ 4:0 იმარჯვა და 14 ქულით მე-6 ადგილზეა.